أمين الفتوى يحذر «متصلة» على الهواء: إنتي في خطر (فيديو)

ورد سؤال إلى الشيخ عمرو الورداني، أمين عام الفتوى بدار الإفتاء المصرية، تقول صاحبته: «أنا وزوجي على خلافات منذ شهرين، إحنا متزوجين من 13 سنة، الأول مكنش يسمعني ولا يتكلم معايا، كان رافض أي حوار بيني وبينه، والمشكلة دلوقتي إني وصلت لمرحلة إني أنا اللي مش عايزة أتكلم معاه، أنا اللي رافضة الكلام، أنا مش عارفه أعمل إيه؟ مش قادرة أتكلم أو أتعامل معاه».
وقال «الورداني»، خلال برنامج «ولا تعسروا»، عبر قناة مصر الأولى، اليوم السبت: «إنتي في خطر، الحالة دي خطر شوية، خطر إنك تبقي مش عايزة تتكلمي مع جوزك».
وأضاف: «إذا كان هو ابتدى عايز يتكلم، ابتدي معاه بوقت قصير للكلام، مثلا 10 دقائق، حاولي تيجي على نفسك، نصيحتي أوعي تسمعي للشعور اللي عندك ده، الشعور ده بيجيب حاجة اسمها الاحتواء البديل».
وتابع: «هتروحي لحد يسمعك، أنا عارف إن إحنا عندنا أخلاق وبنخاف ربنا، بس لازم نسد هذه الأبواب، لأن أحيانًا بيكون في طرف خارجي مستني، اطلبي من جوزك إنه يساعد تخرجي اللي جواكي».