«جوزي عرف واحدة عليا وحلفت على المصحف إنه لو كلمها تاني أبقى طالق منه».. أمين الفتوى: «مش هقدر أجاوبك»

ورد سؤال إلى الشيخ عمرو الورداني، أمين عام الفتوى بدار الإفتاء، تقول صاحبته: «جوزي عرف واحدة عليا.. وحلفت على المصحف إنه لو كلمها تاني أبقى طالق منه، وعرفت إنه كلمها تاني، ومش عارفة أعمل إيه؟ وهل أنا عليا ذنب؟».
وقال الورداني، خلال برنامج «ولا تعسروا»، عبر قناة مصر الأولى، اليوم الإثنين، إنه لا يستطيع الإجابة عليها في وقوع الطلاق من عدمه في هذه الحالة، مؤكدًا أنه يجب أن يتواصل مع الزوج أولًا ليتحقق منه، لكي يحكم بوقوع الطلاق من عدمه، معقبًا: «مسألة الطلاق وقع ولا موقعش مش هقدر أجاوبك فيها، هو اللي لازم يكلمنا عشان نتتحق منه، ونقدر نجاوب عليه».
وطالب أمين الفتوى «المتصلة» بضرورة الجلوس مع زوجها، ومعرفة سبب المشكلة من الأساس، متابعًا: «هو بيعمل عمل فاسد ويحاسب عليه أمام الله، بس لازم نقعد ما بعض ونعرف هو عمل كده ليه؟ ونحل سبب المشكلة».
وأضاف: «إنتي بتعملي حاجتين غلط، أولًا بتفتشي في التليفون، وثانيًا بتسيبي أصل المشكلة وتمسكي في الفرع إنه بيكلم واحدة ست، أصل المشكلة إنه علاقتهم محتاجة تعود إلى الاتزان والتوافق، أول حاجة تقعدي مع جوزك وتعرفي هو بيعمل كده، وتقولي له كلمينى كصديقة أنا عايزة أعرف إيه الحكاية؟ أنا عارف إن الأمر ممكن يكون صعب عليكي. نصحيتي لحضرتك لازم تتكلمي معاه بوضوح وبصراحة، ولو معرفتوش تتفاهموا، تعالوا على مركز الإرشاد الزواجي».