والدة صاحب رسالة «سامحت من ظلمني»: لقينا جثته بعد 8 أيام (صور)

8 أيام تقف وتناديه بجوار نهر النيل عند كوبرى 15 مايو إلى جانب منزلهم في بنها بالقليوبية: «يا حبيبى اطلعلى إنت فين يا ضنايا؟»، حتى تملّكها اليأس، فقد جرّفت المياه جثته ثانى أيام العيد وتم دفنه، تحول الفرح إلى «وجع قلب»، تلومه أمه «كده يا قلبى تحرق قلبى عليك، عملتها ورميت نفسك!».
اتخانق مع مراته
لم تتخيل والدة أحمد رمضان، الشهير ب«أبوسجدة»، عامل بإحدى الشركات، نهايته المأساوية «ده مات وهو صايم يا نور عينى»، ولا يتوقف حكيها وسط صفوف المعزين عن اليوم المشؤوم لما أكل قلبه الحزن وترك منزله حتى عاد إليها جثة هامدة: «ده اتخانق مع مراته، أواخر شهر رمضان الماضى على مصاريف البيت والعيال، وإحنا تحاملنا عليه لما قالنا إن زوجته علت صوتها عليه وفرجت الناس عليهم عند مستشفى الطب، وحينها طالبنا بالذهاب لمحيط المكان لمراجعة كاميرات المراقبة لإثبات صحة كلامه».
أم «أحمد»، الشاب الثلاثينى، تضرب بيدها صدرها غير مصدقة مصيبتها، وهى تروى تطور الأحداث «أخدت مرات ابنى عندى تبات هي وعيالهم التلت بنات، عشان أقصر الشر، وقلت لابنى: (خليك إنت في شقتك، إحنا في أيام مفترجة)، وزوجته أرسلت ابنتهما الكبرى- بالصف الثالث الإعدادى- تطالبه ب200 جنيه فلوس الدرس الخصوصى، ليطلب منها ابنى المغادرة على أن يأتى وراءها لزوجته لإعطائها الأموال، إلا أنه منذ تلك اللحظة غاب عنا».
يا أبوالبنات أنا ربيتك بشقايا
قبل أن يُغادر «أبوسجدة» منزله، دوّن على حسابه بموقع «فيسبوك»: «طالما إنتم عارفين الحقيقة ومطلعنى كداب أنا هريحكم منى كلكم.. الموت راحة وأهون عليا من سنين عذاب جايه كتير، سامحت من ظلمنى».. ظلت رسالته غامضة مع اختفائه لساعات، وفق أمه: «قلت ابنى عمره ما يعملها ولا يمكن أن ينهى حياته، لأنه لا يفوّت فرض ربنا»، وتكمل: «غيابه طول قوى، قلبى حسّ إنه عمل حاجة في نفسه، كل يوم والتانى قبل الإفطار كنت أروح لكوبرى 15 مايو وأنادى على ابنى لحد ما أتعب ويشيلونى الناس على البيت».
قبيل خروج جثمان «أحمد» من النيل، والدته كانت ترجوه: «يا عينى رد عليّا مش لاقياك يا روحى.. يا أبوالبنات يا حبيبى يا ابنى.. يا أبوالبنات أنا ربيتك بشقايا وعرقى ارجعلى»، تكشف: «رحت قسم الشرطة وقلت للضباط: (ابنى ملوش عداوات مع حد)، ورحت لكل أصدقائه وجميعهم أكد إنه محدش يعرف عنه شىء ولا زار حد فيهم».
محيط منزل «أحمد» في عزبة الموالح تحول لسرادق عزاء، وفوجئت الأم بقدوم العشرات من جيرانها وأصدقاء نجلها سألتهم ودموعها تسبق كلامها: «لقيتوه؟»، وكان الجميع يخشى الإجابة الصادمة، وهى بإحساسها توجهت إلى كوبرى 15 مايو، حيث تواجدت عناصر الشرطة بكثافة مع قوات الحماية المدينة، لتخترق صفوفهم: «ابنى فين؟»، لتطالع جثته، تصفُ اللحظة: «مقدرتش أمسك نفسى، قربت منه وقبلته وودعته، وقلت له: سامحنى يا حبيبى»، تردد: «ابنى طيب.. طول عمره طيب».
العيال قلبهم محروق على أبيهم
الأم الثكلى تقول: «راح ضنايا ترك 3 بنات، أصغرهن عمرها 5 سنوات، كلنا في حاجة إليه، ومن فرط طيبته كتب على حسابه ب(فيسبوك) إنه سامح كل من ظلمه وتخلى عنه».. ووالده يبكى ابنه البكرى: «ده أول فرحتى، حالته النفسية كانت كويسة وكان لاعب كرة قدم، وينظم الدورات لزملائه بالعمل ومع أبناء منطقته».
زوجة «أحمد» اعتزلت الناس ولا تدرى كيف تجيب أطفالها عن سؤالهم المتكرر «بابا فين؟»، أهلها يؤكدون: «العيال قلبهم محروق على أبوهم، ولا حد فيهم شاف عيد ولا لبس هدومه الجديدة».
النيابة العامة صرحت بدفن جثمان الشاب، وشيعت جنازته ثالث أيام العيد، بعد ورود تحريات أجهزة الأمن بعدم وجود شبهة جنائية، وتأكيد تقرير مفتش الصحة أن سبب الوفاة «إسفكسيا الغرق».