خناقة العيد

يوميات الاخبار

سارة الذهبى
خالد واصحابه ؟؟ مش قولت امبارح عندك ميتنج مع مدير الفرع ؟!!!! والا انت كنت بتضحك عليا وخرجت مع صحابك وسبتنى أنا والعيال محبوسين بين أربع حيطان؟
صباح الفل والياسمين والجمال وال....
- ايه ده كله... ايه ده كله؟
=انهارده العيد يا محمود.. كل سنة وانت طيب يا حبيبي
- بمعني؟؟ عايزين فلوس؟؟ المحفظة فاضية اتأكدى بنفسك!
=فلوس ايه بس؟ عيد... يعنى خروج... انبساط.... فرفشة...
- نامى يا دينا واستهدى بالله يا حبيبتي.. العيد اللى أعرفه صلاة عيد ونوم وكحك وترمس غير كده شكليات فارغة ...
=لأ اصحى .. انت رجعت من صلاة العيد واديتها نوم وخلاص العصر أذن
- يووووه! هتبصيلى فى النومة كمان؟؟؟؟!!!!! العيد ده يا دينا يعنى نوم وراحة ونفرد جسمنا اللى اتهد طول السنة... ونهدى ونقول هدينا... نهدى ونقول ايه؟؟؟؟
=طب ايه رأيك نروح نتغدى بره فى أى مكان أوبن اير؟؟ الجو يجنن..
- لا مش قااااادر جسمى مكسر والله...هقوم أصلى وأرجع انام بس ساعة وأفوق كده.. و بعدها وعد هنروح المكان اللى انتى عايزاه..
الساعة 7 بالليل
= مساء الفل والجمال والسكر يا حوووودة
- صحتينى ليه؟؟ هى الساعة كام؟
= انا سيبتك نايم لحد الساعة 7 أهو، عشان تصحى مزاجك حلو وتخرجنا خروجة حلوة ! ايه رأيك نتغدى بره فى أى حتة نفسك فيها؟؟؟
- غدا ايه بقي؟؟ قصدك عشا !
و بالذمة ينفع حد يروح يتعشى من غير ما يتغدي!!
ده حتى ميصحش...انا حتى مشبعتش من أكل الكحك! انت هتدمرى معتقدات العيد بعمايلك دي!
وبعدين أنا نفسى رايحة للفسيخ والرنجة.. يلا نضربلنا أكلة فسيخ محترمة وبكرة من النجمة هوديكى المكان اللى تشاورى عليه..
= فسيخ ايه ورنجة ايه يا محمود؟! احنا متجوزين بقالنا 14 سنة و و انت بتمضى على عقد الجواز حلفت عليا ميت يمين الحاجات دى متدخلش بيتنا!!
- طيش شباب يا حبيبتي. حد ياخد على كلام راجل يوم كتب كتابه! الموقف بيبقى ليه رهبة برضه وبيخلى الواحد مش واعى لكلامه.. أنا أصلًا ندمان على كل لحظة مأكلتش فيها رنجة و فسيخ.. و جه الوقت عشان أصلح غلطتي.
= يا سيدى حتى لو مشيت مع كلامك وصدقتك.. معدة مين اللى نستحمل فسيخ ورنجة وبصل أخضر الساعة 8 بالليل، ده احنا هناكل وبعدها العيال دى مش هتلاقى حد يربيها! انت عايز تموتنا يا محمود؟! تعالى نخرّج الولاد انهارده وليك عليا بكرة هعملك وليمة رنجة وفسيخ متحلمش بيها...
- ماشى .. انا قايم اهو.... آاااااه... ايه ده؟ يا ساتر يارب!!
= مالك يا محمود؟ ألف سلامة!
- سمانة رجلى قافشة عليا من امبارح لما لعبت كورة مع خالد وصحابه!
= خالد واصحابه ؟؟ مش قولت امبارح عندك ميتنج مع مدير الفرع ؟!!!! والا انت كنت بتضحك عليا وخرجت مع صحابك وسبتنى أنا والعيال محبوسين بين أربع حيطان؟
- ايوه فعلًا يا دندونة قلبي، انا كنت مع مدير الفرع...انا بس الجوع بيشتت انتباهى ما انتِ عارفة..
مش بقولك عايز أنام... شكلى بخرّف....
= طب بص تعالى نخرج مع أى حد من صحابك اللى بتحبهم ومراته.. مع أحمد ومنة مثلًا؟؟
- منة عاقلة وراسية مش متدلعة زيك... مبتشوفش الشارع... ودايماً فى الأعياد تقول لأحمد يريح فى البيت عشان بيشقى و بيتعب... مش زى ناس ولا فارقلها صحة جوزها!!
= هى مين دى بس اللى مبتشوفش الشارع ؟؟ أنا لسه شايفاها فى كارفور وقالتلى متقوليش لمحمود يقول لأحمد!!! وبعدين انت عارف طبع منة منين وليه ؟
- لأ بصى انا مش هتجرّ للسكة دي... خناقة العيد دى أنا حافظ نكدها صمّ !
أنا لا أعرف منة ولا غيرها وملناش دعوة بحد.... انا هموت وأنام.. هغفّل بس لحد ما تلبسى و تلبّسى العيال..
الساعة 10 بالليل
= محموووود....اصحي......انا زهقت.....هتفضل راقد فى السرير كده طول العيد....العيال فضحونى من كتر العياط ومش راضيين يتحركوا من قدام باب الشقة عشان مستنين حضرتك تصحي!! ما تيجى نتعشى ونروح سينما؟
- و مين فيه دماغ للسينما؟؟ انا بطنى وجعانى من عشا امبارح باين... الممبار والكفتة كانوا دسمين بزيادة، منه لله الواد اسلام
ممبار؟؟؟ كفتة ؟؟ واسلام؟؟؟؟ وخالد؟؟؟؟؟ وماتش كورة؟؟؟؟ اعتبر دى تخاريف نوم برضه؟؟؟
- والله من كتر التعب يا قلبي... تعالى افردى جسمك بس، واتدفيّ... الأرصاد بتقول درجات الحرارة غير متوقعة... وأنا بخاف عليكى انتِ والعيال من الهوا الطاير...
هستفاد ايه لما نخرج وأرجع ألاقى روح قلبى جالها برد! مش هقدر أعيش من كتر تأنيب الضمير...
= انت بتتكلم عنى أنا يا محمود؟؟ الله يرحم لما كنت بتسيبنى أنزل أوصّل العيال الحضانة والمطرة بترّخ علينا ورقدت فى السرير أسبوع حرارتى 41 !! قوم البس يا محمود عشان أنا جبت أخرى خلاص!
- طب بذمتك لسه هنلبس وننزل ونسوق ونقعد!!! ما احنا قاعدين سوا اهو؟!!!! والله لو كنت قادر كنت وديتك الجنة يا عمرى بس بجد تعبان أوى أوي.
استهدى بالله واقلعى لبس الخروج ده واضربى بيچامة العيد وطلعى كيس بانية يفك مع شوية مكرونة ولتر بيبسى ونتفرج على مسرحية العيال كبرت، ايه هنعوز ايه تانى من الدنيا والا هو افترا وصرف فلوس وخلاص؟!
وبعدين عايزة تروحى فين؟؟؟
مطاعم وكافيهات زهق أوي... وفلوس كتير أوووووي
تعالى نطلع نقعد فى البلكونة ونشرب كوبايتين شاى ..
ولو سينما مفيش أفلام عدلة..
نروح فين؟؟ جونينة فى نص الليل؟؟ ده حتى مفيش أماكن تشجع، قعدة البيت دى تساوى مليون جنيه عندى استحالة افرط فيها!!!! قعدة حلوة و وجه حسن.. يا بختى والله العظيم
وأصلًا مفيش معايا ولا مليم بعد مصاريف رمضان ودخلة العيد...
= متشيلش هم.. هنخرج بفلوس العيدية
- و ليه يا ماما؟ ما الفلوس دى احنا أولى بيها..
= العيال نفسهم يروحوا ملاهى يا محمود ويشتروا لعبة للعيد؟
- يروحوا ملاهي؟! اوعى يكون قصدك الملاهى أم ماركت ملبوس دي... بشحن ب 200 جنيه والكارت بيخلص على لعبتين، والعيال بيقعدوا يلعبوا جوه وأنا أشحن لحد ما بخرج من الملاهى وأنا راهن كليتي! وعلى الله بيتبسطوا فى الآخر، كل واحد صوت عياطه ونواحه بيكون جايب آخر المول و لا كإنى كنت بشغلهم سُخرة مش بلاعبهم عشان يتبسطوا!! على جثتى نروح الملاهى أم كارت دي...
= طب نفسهم فى الوجبات اللى فيها لعبة..
- انتِ مصممة تجلطينى يا دينا.. قصدك على الوجبة اللى فيها سندوتش قد البلية وصباعين بطاطس بالعدد ومعاها لعبة بلاستيك متسواش 5 جنيه.. أهبل انا عشان أدفع فلوس فى الوجبات دى وبعدها بخمس دقايق يعيطولك عشان هيموتوا من الجوع!!
= ما كفاية نكد بقى يا محمود... ويقولك أصل الستات هى اللى نكدية !
- طب بصى تعالى نروح لماما.. وهقولها تعملهم سندوتشات فول وتحطيلهم قرص طعمية بسمسم هدية مع الساندوتش ولا أجدعها هابى ميل
= فول وهابى ميل و قرص طعمية؟؟ قدرت تقولها يا محمود! انت عايز العيال تروح مني؟!
- طيب بصى يا دينا آخر الكلام... أنا رب الأسرة وتعبان ومش قادر أخرج ومعاييش فلوس اشتريلهم حتى كيس شيبسي... اهدى بقى وبطلى نكد وجمعولى العيديات دى عشان هصادرها لأن اللى زيكم لازم يتحجر عليهم ... ولو ايه حصل مش نازل ولا خارج.. و ياريت تبطلى نكد بقى عشان أنا زهقت .. قلّعى العيال هدومهم واعمليلنا أى حاجة ناكلها.. سديتى نفسي..
تررررررررن.....تررررررررن
- الوووو....ميدووووو حبيب قلبي....انتوا فين؟؟ على أنهى قهوة طيب؟؟ مش مشكلة لو بعيدة مفيش مشكلة... نص ساعة هكون عندكوا ان شاء الله.. ما تتعششوش دينا كانت مكسلة تنزل طول اليوم ومحطتش حاجة فى بؤي...
ايه؟؟؟ عايزين تروحوا سينما ميد نايت؟؟ يا عم أنا معاكوا فى أى حاجة... الواحد نفسه والله يغير جو... سلام..
- فى ايه يا دينا؟؟ مالك مبرقالى ليه؟؟ ايه الساطور والأكياس دي؟؟ هو عيد اللحمة جه وانا معرفش؟؟ كل سنة وانتى طيبة يا قلبي......
الحقووووووونى الحقوووووووووني... خلاص هخرجك.. توبت إلى الله... سامحينى يا ديناااااا...أنا كنت بهزر معاكى ...الحقوووووني.