جالى عريس...كلاكيت عاشر مرة !

يوميات الأخبار

متنساش ان زى ما انت عندك ظروف ضغطاك، كل الناس عندها ظروف زيك ويمكن أكتر، فمش شرط اللى استحملك واستوعب عصبيتك النهارده هيقدر يستوعبك بكرة..
خير يا سمر... جيبانى على ملا وشى ليه؟ اتصلتى بيا فوق الخمسين مرة ومصممة ننزل نتقابل حالاً فى عز الحر ده ليه؟
ده انا من كتر الزّن كنت هرمى الآيفون من الدور العاشر وانتِ عارفة غلاوة الآيفون بالنسبالي..
طبعاً وانت هتعرف منين ما انت طول عمرك على قلبك مراوح، انا اللى قللت من نفسى وسمحتلك تبيع وتشترى فيا بالشكل ده!
شايف واحدة مدلوقة عليك وتتمنالك الرضا ترضى ودايسة على كرامتها طول الوقت.
ايه يا سمر جو الصعبانيات ده كله؟! وايه حكاية دايسة على كرامتى ببلدوزر والجو ده؛ هو كل يوم هسمع نفس الأسطوانة! كفاية نكد يا حبيبتى انتى لما بتزعلى بتطلعى غُلبك فى الأكل وبتتخنى وبتكتئبى أكتر وبتطلعى كل ده على نافوخي، ما عاش ولا كان اللى يزعلك.
قصدك انى تخنت وبقيت قد الدبة وانى مش مالية عينك؟
يتقطع لساني، هو انا مستغنى عن عمري، انا مقصدش والله بس بفكرك احنا بنوصل لإيه كل مرة عشان ترتجعى بس.. ها خير فى ايه يا حب الحياة؟
انا جالى عريس امبارح.
وايه الجديد يا سمر ده انتِ بيجيلك عريس مرتين فى اليوم تقوليش «أنتي-بيوتك» ده حتى بقى فى مضادات حيوية فى السوق بتتاخد مرة واحدة مش مرتين!! مش حاسة انه بيتقدملك عرسان كتير بزيادة والا انا بيتهيألي؟
اقعد انت استظرف لحد ما أضيع من ايدك.
يا سمر ما انتِ كل يوم بتحسسينى ان نص شباب مصر سايب حاله ومحتاله ومكرسين حياتهم عشان يتقدّمولك... كل دول عرسان يا سمر طب باصى لصحباتك كام واحد طيب، مش كده! سبحان الله فى مشكلة عنوسة فى مصر كلها بس عندك انتى ماسورة وانفجرت اللهم لا حسد!
انت كمان بتستقل بيا!! وبتقول عليا فشّارة! لاحظ ان كلامك جارح.. وعامة بابى قالى المرة دى انه مش هيرفضه..
طب بغض النظر عن كلمة بابى اللى أول مرة تقوليها وعايشالى فى دور مش دورك بس كملى انا سامعك اهو.. الحاج حنفى قالك انه هيوافق على ده خلاص يعني..
بص... هو كله مميزات الصراحة.
عظيم.
وسيم كده شبه توم كروز فى عز شبابه أيام mission impossible
الجزء الأول والا الجزء التانى عشان بتفرق؟
مش هرد عليك ولا كإنى سمعت حاجة.
عنده دوبلكس فى كومباوند فى التجمع وهياخد شقة كمان فى العاصمة الإدارية..
ايه هيفتحهم على بعض؟
ولا هرد برضه.. بيحضّر الدكتوراه فى جامعة هارفرد.
هارفرد فرع حلوان؟
انا قايمة يا عمرو.
لأ خلاص والنبى لا انتِ مكملة ده انا اتشديت للموضوع أوى ويا ترى نوع عربيته ايه؟
BMW
شئ متوقع طبعاً.
ومقطوع من شجرة وميت فى دباديبي.
يا سمر بطّلى فَشر بقى! ميت فى دباديبك ازاى وهو لسه شايفك امبارح ده لو كان الفنان مصطفى قمر بذات نفسه مكانش لحق يدوب فى دباديبك... دباديبو دباديبووووو..
انت هتغنى يا عمرو، عامة لو انت مش عايز تصدق براحتك.
و كان عايش فى أمريكا طول عمره ومعاه الجنسية.
أمريكا وهارفرد الاتنين!! طب عملها ازاى دى!! موقفتيش عند النقطة دى خالص ولا حسيتى ان فيها تحوير!
لأ عادى انا طول عمرى باخد كل كلامه ثقة.
طول عمرك ايه يا سمر انتوا معدّاش على معرفتكم 48 ساعة يا شيخة! وبعدين نسيت اسألك أهم سؤال.. هو اسمه ايه بقى؟
آسر.
اسم متوقع طبعاً وسبحان الله هيكون أول حد فى جيله يتسّمى الاسم ده لإنه لسه طالع جديد من بعد آسر ياسين بس ما علينا... طب أكيد بقى معاكى نمرته.
آه طبعاً، ده فاتورة مش كارت وجو فليكسات زيك.
ما انبهرتش يعنى واحد راكب BM أكيد مش هيستلف على النوتة يعني... طب انتِ لسه بتحبينى يا سمر؟
طبعاً يا حبيبى اومال انا جيالك جرى ليه؟
طب وحياة حبنا هطلب منك طلب صغنن، تكلميلى آسر باشا يشوفلى عنده شغلانة بعد ما تتجوزوا..
انا ممكن اسوقلكم ال BM وانتوا تقعدوا ورا ومتشيلوش هم الزحمة لإن أجمد عربية ركبتها كانت 132 وأبويا كان بيعلّقنى لما بسوقها من وراه.
انت لسه بتستظرف يا عمرو؟ طب والحب اللى بيننا راح فين؟
حب مين يا ماما، ده واخد فى العاصمة الإدارية وعنده دوبلكس انت متخيلة هو معاه فلوس قد ايه! ده بغض النظر عن ال BM طبعا.
طب ووعودك ليا؟
تبقى هبلة يا سمر لو فارقلك وعودى ومش فارقلك البى إماية اللى هتركبيها، ده انتِ بترقصى عشرة بلدى لو لحقتى عربية السيدات المكيفة فى المترو... اقسم بالله يا سمر لو ما اتجوزتيه لهاخدك من ايدك وأكون انا الشاهد على جوازكم.... ده انا لو معملتش كده يبقى فعلاً مبحبكيش ولا عايزلك الخير ده انتِ بايضالك فى القفص يا بنتي..
تصدق يا عمرو انا اتخدعت فيك!
طبعاً ما هو اللى بيدور على مصلحتك ويخاف عليكى زى أخته يبقى معندوش دم واتخدعتى فيه.
دلوقتى بقيت زى أختك.
اه طبعاً انا بس كنت عايز أقولك حاجة بس مُحرج شويتين.
قول يا حبيبي، انا عارفة انك عايزنى استناك وأصبر عليك شوية لحد ما تبقى جدير بيا وتتقدملي.
تستنى مين وجدير بيكى ايه بس!! فوقى بقى من جو المسلسلات التركى اللى انتِ عايشة فيه ده انا محتاج سنين ضوئية عشان أجبلك شقة ايجار جديد فى الإسكان الشعبي.. انا كنت هسألك لو آسر باشا عنده أخته وينفع اتقدملها وتوصيه عليا هبقى شايلك الجميل ده فوق راسى طول عمرى واهو نبقى عيلة واحدة وزيتنا فى دقيقنا لإنك خلاص بقيتى زى أختى يا سمر واستحالة هفكر فيكى تانى من بعد اللحظة دى عشان مخونش أمانة آسر بيه... انا فقير اه بس أعرف فى الأصول.
انا ميشرفنيش أعرفك تاني.
انا اللى مش عايز رقمك يرن عليا تاني... انتِ مبقتيش بتاعتى يا سمر وهآجى على قلبى فى سبيل سعادتك وهدوس عليه عشان مصلحتك..
قد ايه انت....
لا من غير غلط.. عشان انتِ بتحورى عليا أصلاً زى ما حورتى عليا فى قصة شهاب بتاع وكالة ناسا اللى كان بيزحف على ركبه عشان تتجوزيه والصراحة انا تعبت منك ومن حواراتك وصدّعت اقسم بالله... يلا اجرى بقى من هنا وألف مبروك على أى جوازة تجيلك وابقى سلميلى على آسر بيه..
ويلا عشان هنرش ميه!
الفصلان نعمة
فى مبدأ فى العلاقات الإنسانية بيقول:
(ظروفك الخاصة لك وحدك.. وأدبك فى الكلام حق للجميع.. لا تخلط مشاكلك وظروفك النفسية بتعاملك مع الآخرين).
عشان كده بحترم أوى الناس اللى بتعرف تفصل..
اللى مش بتمشى تخبّط فى خلق الله عشان مزاجها مش رايق..
اللى بتفصل بين مين مزعلها ومين ملوش ذنب..
مش شخص ماشى بزعابيبه ومطرح ما تيجى تيجي..
مش عشان متخانق مع زميلك فى الشغل ترجع تطلع غُلبك فى مراتك وولادك.. وتتعصب عليهم وتطلّع نار من بؤك!
مش عشان شدّيتى مع جوزك تسوّدى عيشة اللى حواليكي..
مش عشان مشربتش فنجان القهوة بتاعك تتعصب على مخاليق ربنا..
الفصلان ده نوع عالى جداً من النضج والاحترام..
انسان بيتحكم فى أعصابه عشان ميأذيش اللى حوليه أو يجرحهم بكلام بيتقال فى لحظة غضب..
مبياخدش حد بذنب حد..
بيفكر.. مش ضاربها صرمة واللى يزعل يتفلق..
وحتى لو اتعصب مرة بيلّم الليلة وبيعتذر مش بيقاوح..
محدش مجبر يستحمل حد مهما كان بيحبه خصوصاً لو كان سايق فيها ومش بيفكر فى مشاعر غيره..
اللى بيستحملك بيستحملك محبة وجدعنة مش اجبار ولا انت لاوى دراعه ولا ده حق مكتسب..
ومتنساش ان زى ما انت عندك ظروف ضغطاك، كل الناس عندها ظروف زيك ويمكن أكتر، فمش شرط اللى استحملك واستوعب عصبيتك انهارده هيقدر يستوعبك بكرة فممكن تخسر أعز حبايبك لو مفرملتش نفسك..
الفصلان ده نعمة وممكن تكتسبها مع الأيام وانك تمرّن نفسك عليها.. منها هتتعلم تتحكم فى أعصابك ومش أى حاجة تشيلك وتهبدك وهتحافظ على صحتك من ضغط وسكر وخلافه ومنها هتصون علاقاتك باللى حوليك..
الفصَلان أدب وتربية ودماغ متكلفة..
شد الفيشة واتعلم تفصل هترتاح وهتريح اللى حواليك.