معركة الدايت

يوميات الأخبار

سارة الذهبى
ياريت يا اسراء تطلعى ماما من نفوخك شوية وركزى فى خناقاتنا اللى زادت أوى الفترة دى.
-حبيبتى انا هبدأ دايت بكرة مش هوصيكى بقى عايز كل حاجة هيلثى من فضلك.. هيلثى يا شيماء.. واضح؟
- طبعاً يا روحي، انا أصلاً من زمان وأكلى كله هيلثي...
- صح عشان كده جنابى بقت مدلدلة جنبى وبسند عليهم زى المخدات وكرشى كل العيلة بتنام عليه ولا أجدعها مرتبة!! عامة ادينى قولتلك وهنشوف..
أول يوم دايت:
- يا شيماااااااء... انا جيت... عملتى ايه للغدا؟
- محشى وحمام يا ايهاب.
- نعم يا اختى!! محشى!!! يحشوكى ديناميت يا شيخة!!
- اصبر بس... ده أكلنا انا والعيال انت بقى عملالك خضار سوتيه ومعاه حته ستيك مشوية؛ أظن كده عدّانى العيب..
- وأزح يا غالية!! بس ايه طبق الفتة اللى هناك انا شامم ريحته من أول الشارع؟
- دى جارتنا هدى بعتاه، فتة باللحمة الضانى عشان بعتلها من شوية مولتن كيك بالنوتيلا عملتها عشان أحلّى بيها أنا والعيال بعد الغدا.
- مولتن كيك، يا ما شاء الله!! حبكت يا شيماء يعني!!
- ما انا قولت بلاش اعمل بلح الشام عشان بتحبه.
- فا قولتى بقى اعمل مولتن كيك عشان يرفّص ع الأرض برجله وهو شايفنا بناكلها لوحدنا صح؟!
- ما انا مقطعالك سلطة فواكه يا ايهاب!! اعملك ايه تاني!!! وفى جوه عصير برتقان فريش لو عطشت..
- وانتو هتشربوا ايه ان شاء الله؟ ازازة شربات بمناسبة الدايت؟ والا مربى فراولة دلقتيها فى إزازة!! ما هو أصل الافترا وحش.
- لا والله عملت عصير مانجا بس ايه! كل حتة هتنزل فى بُؤك قد فخدة الواد آدم ابنك... كلها قطع مانجا مقولكش!
- حرام عليكى يا شيخة اتقى ربنا، ده انتى حلال فيكى الطلاق.
- فى ايه يا ايهاب؟! يعنى مناكلش انا وعيالك عشان حضرتك عامل دايت!! ده احنا فى طور نمو!!
- طب هما فى طور نمو ماشى لكن حضرتك لسه فى نفس الطور بأمارة ايه؟؟ مش الطور ده تقريبا خلص من 30 سنة!! ده انتى ناقص تاكلينى يا ماما!! قال نمو قال!! مش كفايه بقى؟ عامة ناولينى الفتة... اااه قصدى الخضار السوتيه ده وصحتى بالدنيا أصلاً.. ولا هتهز من الاغراءات دى وأصلاً الفيتنس محتاج ارادة وانا كلى ارادة وعزيمة واصرار..
- اتفضل يا حبيبي.
- شيموووو... بقولك هى اللحمة الضانى طعمها حلو؟
- ااااه بتدوب فى البؤ دووووب والله.
- طب المحشي؟
- يهبل! كرنب وورق عنب وبتنجان من اللى قلبك يحبهم والرز مفلفل.
- منك لله يا شيخة، ايه الصراحة اللى نزلت عليكى فجأة دى!!
- احطلك سوتيه تاني؟
- لا هحط انا هى ايدى اتقطعت؟ طب قوليلى المولتن كيك بتنقّط شكولاته كده؟ بتبُظ يعني؟
- آه تفتحها تلاقى بركان شكولاتة طفح فى وشك قصدى طلع فى وشك يا ايهاب.
- بس استنى ده المولتن دى طلع فيها مليار سعر حرارى يا ولية!! دى أنيل من بلح الشام!! ياريتك عملتى بلح الشام وريحتينا.
- اخزى الشيطان يا بيبو وكُل.. وابقى العب عشرة بطن بعدها وخلاص.
- عشرة بطن!! ده انا هحتاج العب مليون بطن وضغط واجرى على التريد ميل من هنا لحد روسيا!! ده هيبقى فيه كمية سليوليت ودهون محتاجة تتشفط بمكنسة 5000 وات يا شيماء!! وتقولى 10 بطن!!!
- طيب عندك آيس كريم جوه؟
- آه ڤانيليا.
- طيب حطيلى 3 مغارف آيس كريم عليها عشان منأڤورش وناولينى كوباية مانجا من اللى فيها لهاليط منجا دى قد فخدة آدم بس استنى اعملى طبق محشى وشوية فتة على حتة لحمة ضاني... هو الحمام محشي؟
- اه مليان فريك لحد زوره!!
- طيب تمام اعملك شاى دلوقتى مع المولتن؟ اه بس متحطيش سكر عادي.. خليه من بتاع الدايت... ومنك لله يا شيماء، اشوف فيكى يوم؛ لأ يوم ايه حسبى الله ونعم الوكيل فيكى يا شيخة بس قبل ما يجرالك حاجة متنسيش بكرة نفسى فى مكرونة بشاميل وعليها طبقة جبنة من فوق من اللى بتمط دى وبعدها نحلى بقى ببلح شام من ايدك الحلوة وبعد ما نخلص تطلعى زى الشاطرة على بيت ابوكى عشان اعرف اروح الچيم واتنيل اعمل ام الدايت ده!! فين الحمااااااااام؟؟؟ ناولينى جوزين كده وهاتيلى بيبسى دايت من التلاجة ابلّع..
اعتذار الستات
كنت عايزة أقولك حاجة... أنا آسفة.
= خلاص، حصل خير يا اسراء.
- ما أنا بقولك آسفة، هو ايه اللى حصل خير؟! اعملك ايه تانى عشان تقبل اعتذاري؟!
= على فكرة انا معترضتش، بقولك ان مفيش حاجة وحصل خير وقبلت اعتذارك!
- معلش أصلاً ايه الجريمة اللى عملتها عشان أتذللك كل ده عشان تصالحني؟!
= هو فين الذل ده؟ أنتِ من أول ما قولتى آسفة قبلت اعتذارك والموضوع فعلاً خلص..
- ايووووووه ما هو لولا إن أنا اللى جيتلك ودوست على كرامتى كانت الخناقة هتكبر ومش هتكلمنى وتروح تشتكى لطنط وأخواتك كإنى معيشاك فى جحيم ويقعدوا يحايلوك ويقولولك استحمل عشان الولاد وبعدها تروح لصحابك على القهوة وتطنشنى وترجع وش الفجر! صح والا أنا بفترى عليك!!
= هو انتِ عايزة ايه؟ مش انتِ اللى غلطتى وأنا قبلت اعتذارك؛ اعمل ايه تانى والا هو عكننة وخلاص!!
- هى حصّلت عكننة!! انت حياتك معايا بقت عكننة طيب متقولهاليش فى وشى كده، مهّدهالي! خلاص بعت كل ذكرياتنا سوا عشان خناقة هبلة! وبعدين انت مش ملاحظ انت بتذلنى قد ايه؟ جه خيرك يا هشام!! متشكرة أوى الصراحة!
= مضيقاكى أوى كلمة عكننة! اومال اللى احنا فيه ده اسميه ايه؟ خط الضحك والفرفشة. مش معقولة كل ما نتخانق تكبّرى الموضوع كده مع انه ممكن يتلم بمنتهى السهولة اللى فى الدنيا! انا بجد زهقت!
- الله الله... وكمان زهقت، طب ما تطلقنى وترتاح بدل عيشتى بقت نكد كده وكلها أرف!
= اسراء ممكن كفاية بقى لحد كده..
- قول لنفسك يا استاذ!! رفقاً بالقوارير يا بشمهندس!! والا انت بس حافظ مثنى وثلات ورباع!! معرفش ايه الجحود اللى نزل عليك ده، بس أنا عارفة مصدره، الست والدتك نفسها نتطلق عشان تجوزك مى بنت خالك.. انت فاكرنى نايمة على وداني! انا ساكتة بمزاجى.
= هو انتِ بعد ده كله كده ساكتة!!
- اومال، ده انا لولا عاملة حساب للعِشرة كان زمان فى كلام تانى خالص بس هقول ايه (كلكم مصطفى أبو حجر)، ده انت دشدشت القارورة يا بشمهندس!!
= طيب ايه لازمته العياط دلوقتي؟
- صِعبت عليا نفسى أوى أوى.. تجرح قلبى أنا؟؟ تقسى عليا أنا؟؟؟ انا لو حبيبك مكنتش يوم تسيبنى..
= ازاى بتقول نصيبك وهان عليك تبيعنى.
- انت بتستخف بمشاعرى وبتكمل الأغنية يا هشام!؟؟
= يا ستى ولا بستخف ولا نيلة، انا اندمجت بس عشان بحب الأغنية دى.. وعامة حصل خير..
- تانى هتعصبنى وتقولى حصل خير!! هو انا قتلتلك قتيل وأنا مش واخدة بالى!!
= خلاص يا ستى حقك عليا وآدى راسك أبوسها..
- يا ستى!! طب ما تقولى يا مدام اسراء بدل العلاقة بيننا بقت رسمى أوى كده!! انا عارفة مين اللى قَلَبك عليا! عارفاها كويس أوى!
= مين بقى ان شاء الله؟
- حماتى.. هو فى غيرها، مش كان نفسها تجوزك لحنان بنت أختها..
= بس حنان متجوزة من قبل ما نتجوز!
- وايه المشكلة.. لو حنان اتجوزت قبلنا يبقى أكيد كانت عينها على بسمة أختها... المهم تخرب علينا وتجوزك واحدة من بنات أختها.. وفاكرين انى نايمة على ودنى، لاااااا ده أنا مصحصحالكم أوى..
= ياريت يا اسراء تطلعى ماما من نفوخك شوية وركزى فى خناقاتنا اللى زادت أوى الفترة دى..
- عليك نووووور... اعترف بقى ان انا السبب فى كل البلاوى دي، وانت الملاك البرىء أبو قلب طيب أووووى على رأى عمرو دياب، وصحيح الشىء بالشىء يُذكر مش بتغنيلى ليه زى ما عمرو بيغنى لدينا؟ والا انا مشبهشى!
= يووووه هى دى خناقة جديدة والا ايه، يا بنتى ارحمينى أبوس رجلك انا زهقت والله.
- زهقت منى! ما هو طبعاً بعد ما خدتنى وردة مفتحة دلوقتى ترمينى بعد ما كسرتنى وقهرتنى وقضيت على طموحاتى..
= انا سايبلك البيت ونازل.
- مش هتنزل قبل ما تقول انا آسف..
= نعاااااام هو انا اللى زعلتك والا انتِ؟؟
- هتقول آسف والا قسماً بالله العظيم أنكد عليك.
= هو انتِ لسه هتنكدى! لأ أبوس رجلك كفاية لحد كده انا آسف.. آسف قسماً بالله العلى العظيم آسف..
قال نكد قال! عايزنى أزعله وكمان أصالحه.. جديدة دى! يلا مبدهاش بقى اعتذارك مقبول عشان تعرف انى أجدع منك..
= انتى هتقوليلى.
تقصد ايه؟
= لاااااا ولا أى حاجة بكرر اعتذارى.
ايوه اظبط كده...