إحنا بنشترى راجل

يوميات الأخبار

سارة الذهبى
بص يا شريف انا هقترح عليك چورچ الجواهرجى ده العيلة كلها بتتعامل معاه من زمان والخاتم الألماظ عنده ب 200 ألف بس.. ده مجرد اقتراح طبعاً عشان أسهّل عليك مش أكتر..
الصراحة يا عمى أنا هدخل فى الموضوع علطول من غير مقدمات، أنا ليا الشرف أطلب إيد بنتك الآنسة دعاء.. والصراحة لو لفيت الدنيا كلها مش هلاقى واحدة فى أخلاقها وتربيتها...
= والله يا ابنى إحنا مش هنلاقى أحسن منك، ووالدك إنسان محترم وعِشرة عمر، ده انا أعرفه من أول ما وعيت على الدنيا وإحنا عيلة واحدة من زمان والا إيه رأيك يا أم دعاء؟
طبعًا يا حاج هو فى زى دكتور شريف! والا أخلاق دكتور شريف.. ده أنا طول عمرى كنت حاطه عينى عليك لدعاء والله..
= فى ايه يا أم دعاء ما تتقلى شوية... ههههههه هى أم دعاء كده تموت فى الهزار زى عنيها..
- تسلم يا عمو.. تسلمى يا طنط... ده العشم برضه والله
أنا جيت النهارده لوحدى عشان بس الحاج تعبان والمرة الجاية يكون معايا إن شاء الله هو والست والدتي..
= يا حبيبى ألف سلامة، ده بيتك... إوعى تقول كده.. تنورنا أى وقت...
ده بيتك ومطرحك يا حبيبي، ده انت لو عايز نسخة من مفتاح البيت نطلعلك هو انت غريب، ده انت فى غلاوة ايهاب ابننا بالظبط..
= فى ايه يا أم دعاء انتِ داخلة فى الراجل كده ليه، مفتاح ايه اللى نعمله نسخة منه ده لسه أول مرة يدخل لنا بيت من عشرين سنة!! هههههههه هى أم دعاء كده لما بتحب حد مبتاخدش بالها من كلامها.. ههههه...
خلاص يا اخويا هسكت... كل كلمة بتقفلى فيها على الواحدة، ما تسيب الواحد يتكلم براحته!
- تسلم يا عمي، تسلمى يا طنط.. طيب احب اعرف طلباتكم إيه؟
- طلبات؟ احضرينا يا أم دعاء ده شريف بيقول طلباتنا ايه؟ والله عيب يا شريف!! ده انت ابني!! إنت مش عارف إنك فى معزِّة ايهاب ابنى والا إيه؟ ده احنا من ثانية كنا هنطلعلك نسخة من مفتاح الشقة يا راجل، لحقت تنسى... ههههههه.
- عارف يا عمى والله وربنا يديم المعروف، بس عشان ابقى مرتاح ويهمنى حضرتك تبقى متطمن على دعاء.. انا عارف انها بنتك الصغيرة وليها غلاوة زيادة حبتين...
= انا متطمن عليها بدل هتبقى معاك يا شريف إحنا بنشترى راجل يا حبيبى والا ايه يا أم دعاء..
يا حبيبى طلبات ايه بس ده انت تاخدها بشنطة هدومها، دى بتحبك من لما كنا بنصيف معاكم سوا فى العجمى من تمنتاشر سنة.. قال طلبات قال..
= يا أم دعاء ادخلى حضريلنا لقمة ناكلها بدل ما انتِ بتلبسينا فى الحيط كل ما تتكلمي، معلش يا ابنى متآخذهاش هى بس تقّلت فى الغدا حبتين فكابس على نفسها ومش واعية للكلام اللى بتقوله، دعاء دى قطة مغمضة لا ليها فى حب ولا الكلام الفاضى ده..
- انا عارف يا عمى ان مفيش فى أخلاق دعاء.. وحضرتك زى والدى تمام والله.. فمعلش ريحني..
= إحنا بنشترى راجل يا حبيبي، أنا أهم حاجة عندى بنتى تعيش مع راجل يصونها ويحافظ عليها وكل الماديات تغور..
- الله يطمنك يا عمي... وأنا هشيل دعاء فى عينى إن شاء الله..
= عينك إيه بقى.. إيه رأيك نشيلها فى شقة فى التجمع كده والا الرحاب.. عشان مبقاش قلقان عليها.. ههههههه والا ايه رأيك يا أم دعاء؟ والا اقولك خلاص متقوليش حاجة لحسن انتِ مش مضمونة بالمرة... ههههههه.
- حاضر يا عمي.
= بص، هو الأحسن تكون جوه كومباوند عشان أبقى متطمن أكتر.. إنت عارف القلق اليومين دول والا إنت رأيك إيه؟ أهو تبقى بتمشى براحتها وحتى لما تبقى لوحدها متسبهاش وانت قلقان عليها... انا بفكر فيك وفى مصلحتك والله... احنا ولا فارقلنا كومباوند من شقة ده ليكو انتو...
- بس لو كده مش هقدر أجيب الا شقة صغيرة طالما هتبقى فى كومباوند..
= ولا يهمك يا حبيبي 200 متر صافى كفاية...
إحنا بنشترى راجل يا شريف والله.. والماديات دى آخر حاجة نتكلم فيها...
وبالنسبة للعفش كله عليك وإحنا هنجيب تِلت الأجهزة
الكهربائية، هنجيب مراوح السقف والشفاط وانت هتجيب التكييفات والبوتاجاز البيلت إن والتلاجة والغسالة والمكنسة والميكرويف والسخان والدفاية... فى حاجة ناقصة كده يا أم دعاء؟
آه انت نسيت الكيتشن ماشين وغسالة الأطباق وصانعة السندوتشات والقلاية الكهربا يا حاج ههههههه مش قولتلك عَجزت وبقيت بتنسى ههههههه.
= آه والله ليت الشباب يعود يوماً ههههههه... صحصحى معايا كده عشان منساش حاجة بقى..
وبالنسبة للعفش النص بالنص، إنت هتجيب السفرة والصالون والليڤينج وأوضة ماستر بحمام منفصل عشان الخصوصية انا قلبى عليكو والله و2 أوضة نوم أطفال وأوضة للدادة عشان لما ربنا يفتحها عليك ان شاء الله وتجيب دادة متبقاش محتاس تنيمها فين... ههههههه واحنا هنجيب الكليم، قصدى السجاجيد وانت عليك الستاير...
- طب ليه 2 أوضة أطفال يا عمى ما كفاية واحدة!
= عشان لو جبتوا ولد وبنت هتعوزوا أكيد تفصلوا بينهم لما يكبروا فمن أولها كده نعمل حساب المستقبل... انا قلبى عليكو والله.... هههههه.
- بس ما يمكن نجيب ولاد بس أو بنات بس.. ايه لازمتها بقى الأوضة الزيادة دي؟
- أهى هتبقى أوضة زيادة، أبقى آجى أريَّح فيها أنا وأم دعاء والا من أولها مش عايزينا نيجى نزوركم... هههههه.
- لأ طبعاً يا عمى تآنسوا وتنوروا أى وقت...
طيب وأوضة دادة ليه؟
= يا لهوي!! بنتنا مش واخدة على الشقا يا ابني... دى عايشة معانا هنا ملكة متوّجة..
- بس دى كانت لسه بتمسح الصالون وأنا داخل دلوقتى وقامطة راسها وقالتلي أرفع رجلى وكانت ريحتها كلها فنيك عشان تسيأ تحت رجلي!
= لأ ده ظرف طارئ يا حبيبي، أصل الدادة بتاعتنا عندها رباط صليبى من اصابة ملعب فا مريحة شوية..ههههههه...
كنت نسيت أقولك ان حاجة المطبخ هتكون بالنص برضه عشان منتقّلش عليك... انت عليك الصينى والأركوبال والبايركس والحلل التيڤال والصوانى والألمونيا وإحنا هنجيب الشفاشق والكوبايات والمعالق والشوك وملهاش لازمة السكاكين... هنجيب من كل حاجة ستة ملوش لازمة طقم كامل تمام كده؟
اه يا حبيبى وعمك نسى يقولك تجيب معاك فى إيدك البطاطين والإلحفة واحنا هنساعدك ونجيب الملايات وطبعاً النجف والكريستالات وطقم الحمام والسيراميك والباركيه على العريس معروفة يعني؟ انت ساكت ليه يا شريف؟؟
- ...........
= صحيح انت مبتردش ليه يا شريف؟
عامة احنا هنحتاج تشطيب الشقة يعمله مهندس ديكور تبعك عشان منكلفكش كتير بدل ما نتعاقد مع شركة عشان الشركات أغلبهم حرامية وإنت فى مقام ايهاب ابني.. وأكيد هتجيب أحسن مهندس ومش هتستخسر...
متكلمتوش على الشبكة يا أبو دعاء.... هههههه.... يا راجل صحصح شوية بقى.. غلّبتنى.
= هههههه، لأ كله الا الشبكة يا أم دعاء خلّى عندك ذوق ومفهومية، دى بقى بتبقى هدية العريس للعروسة فا مش هنتدخل فيها ونقلّ ذوقنا والا إيه يا أم دعاء... ههههههه
طبعًا يا حاج وإنت أبو الذوق كله وشريف زى ايهاب ابننا وانت عارف بيحب دعاء قد ايه بس احنا والله مش عايزين نضغط عليه فى أى حاجة..
= بص يا شريف انا هقترح عليك چورچ الجواهرجى ده العيلة كلها بتتعامل معاه من زمان والخاتم الألماظ عنده ب 200 ألف بس.. ده مجرد اقتراح طبعاً عشان أسهّل عليك مش أكتر..
= شريف انت معانا يا حبيبي؟ هو وشه أصفر والا انا بيتهيألى يا أم دعاء؟!
ما علينا..... وبالنسبة للفرح فا جرى العُرف إنه على العريس فا مجرد بس نعمله فى ريكسوس العلمين وأهو يبقى اسمنا غيرنا جو إحنا محبوسين بسبب الكورونا دى بقالنا زمن وعشان يبقى مكان مفتوح ومفيش منه قلق، والمعازيم نحجزلهم يوم هناك على حسابنا والا أقولك هيبقى كده كتير عليك.. وإنت زى ايهاب ابننا...
هنعمله فى الفورسيزونز أو ممكن JW MARRIOT عشان مش عايز أتقّل عليك والله.. شوف الأنسب ليك... وممكن أديك رقم wedding planner شغله هايل عشان نشوف هنجيب مين مع حماقي لأن دودو بتحب حماقى أوي....
وطبعًا فستان الفرح على العريس فا هنجيبه من تصميم هانى البحيرى عشان منتقلش عليك والخطوبة هنعملها على الضيق عندنا فى البيت عشان دي علينا وهنجيب فيها بقسماط وكيك وتورتاية هتعملها أم دعاء فى البيت، واوعى تفكر انها هتعملها استرخاص، ده أم دعاء فاتحة صفحة على الفيس بوك للحلويات والمحاشى اسمها توتى كيتشن عشان ده دلع تفيدة ومش بنلاحق على الأوردرات بس عاملة المشروع ده فى السر عشان متتحسدش.... وبالنسبة لفستان دعاء هتاخده لفة من حنان بنت خالتها عشان إنت عارف المصاريف وحنان لسه فاسخة أساساً وملحقتش تلبسه... وهنجيب فِراشة من عند عم حودة هتبقى حلوة أوي...
والله يا شريف أنا قلبى ارتاحلك من ساعة ما شوفتك!!
إنت متعرفش إنك أغلى حاجة عندى والا إيه...هااا... نقرا الفاتحة؟
هو الواد ساكت كده ليه؟؟ انا شاكك انه قطع نفس يا أم دعاء!! جيل فرافير صحيح استنى بقى كده لما يفوق لوحده وبعدها نقرا الفاتحة على بركة الله ان شاء الله.. ما تسمعينا زغروطة يا ام دعاء....هههههههه...