ما يطلبه المتزوجون

يوميات الأخبار

سارة الذهبى
- فاكرة يا خويا بس دى غلطة ومش هتتكرر تانى.. لكل جوادٍ كبوة..
حبيبى
= يا نعمين
- حبيبي...
=نعم يا ست الكل، قولنا نعمين مش نعم واحدة، اعمل ايه تاني؟ اغنيها؟
- مالك قافش كده ليه يا سِحس.. ده انت حبيبي!
= اللهم انى لا اسألك رد القضاء ولكنى اسألك اللطف فيه..
- ليه كده بس يا سِحس؟
= اديكى قولتيها.. سِحس؛ لأ وكمان حبيبى يعنى فى مصيبة هتنزل ترّن فوق نافوخى دلوقتي.. عشان انا حافظ النغمة دى كويس.. آخر مرة قولتيهم سوا كومبو كده كنت هدفع قسط المدارس الأخير اللى العيال معتبوهاش ترم كامل.. يعنى ألوفات مؤلفة.. وفى الآخر انتِ اللى عملتيلهم المشاريع وهما كانوا بيأزأزوا لب..
- لا أبداً والله... انت حبيبى بجد ومن غير أسباب...
= قالوا للحرامى احلف !! طب انجزى الله يباركلك عشان ورايا شغل بكرة الصبح وبفضل لابس الكمامة 8 ساعات فخلقى ضيق خِلقة... انجزى يا منال.. انجزى الله يباركلك..
- بص احنا كنا عايزين شوية هد.......
= يا مرارك الطافح يا حسن!! (احنا وعايزين وشوية) ال 3 كلمات دول يودوا فى ستين داهية!! انتِ متخيلة الكلام ده هيتدفع فيه قد ايه؟ انا هقوم انام قبل ما اتجلّط منك.. هروح اتخمد عشان ترتاحى يا منال وتعتقينى !
- تقوم تنام إيه.. اصبر بس والله دى حاجات بسيطة للعيال لزوم العيد..احنا لينا مين غيرك نطلب منه يا سحس!
= اسكووووووووتي... هو انتِ مش دريانة والّا إيه؟ هو محدش قالك ان فى اللى ما تتسمى كورونا وقالبة العالم كله... شكلك كنتِ بتعملى المواعين ساعتها ومحستيش...معلش، كان الله فى العون برضه... المهم من الآخر كده مفيش نزول ولا طلوع.. يبقى شوية حاجات ليه؟... ما تهدى يا منال وتقولى هديت كده... ده آخر مرة عيالك شافوا فيها الشارع كانت من أيام المطرة..و ابنك الصغير بيحكى عن أيام المدرسة كأنها من أيام الهكسوس..نزول إيه وطلوع إيه يا شيخة !
- يا راجل ما البلد فتحت... هو انت مدرتش...العيال كمكمت من القعدة فى البيت وهيفطسوا مني، خلينا ننزل نجيبلهم لبس عيد واطلبلهم بيچامات اونلاين عشان يحسوا ببهجة العيد..
= اونلاين تانى يا منال!! هعتبر نفسى مسمعتش حاجة عشان عِشرة السنين اللى بيننا... انتِ ما بتحرميش يا بنتى ولّا انا عجّزت خلاص وبقيت عضمة كبيرة ومحدش بقى بيعملى اعتبار فى البيت ده، تانى دخلتى على جروبات وسألتى «هاو ماتش» وهتجيبيلنا هلاهيل وتقوليلى معلش يا سِحس اتضحك عليا المرة دى بس، واللى اتكسر ممكن يتصلح وشرف البنت زى عود الكبريت والبنطلون المأزعر هخليه بنتاكور والفستان الضيق هشيله لحفيدتك ان شاء الله كمان 20 سنة لما بنتك تتجوز وتخلّف ومفيش حاجة بتعدّى أسرع من الأيام... فاكرة ولّا مش فاكرة؟ فاكرة لون الفستان كان عامل ازاى أساساً ولّا نسيتي... كنتِ طلباه أزرق نيلى جالنا أحمر بطيخى ببذره وقالولك ده بسبب فلاش الموبايل لما صوروه... وانتِ زى الهبلة صدقتى !!و انا كعيت من سكات عشان مخربش عليكى مش اكتر...
- فاكرة يا خويا بس دى غلطة ومش هتتكرر تاني.. لكل جوادٍ كبوة..
= لأ يا حبيبتى،ياريتها كانت كبوة واحدة كنت بلعتها ! ده حتى الكمامات مسلمناش منها... طلبتى علبتين كمامات طلعوا حتت مطبخ قد الكف مربوطين بأستيك فلوس من ورا واستخدمناهم بدل بكر التواليت.. والأستيك بقيت ألسوع بيه العيال فى قفاهم.. نسيتي؟؟! والّا ناسية لما اشتريتى مشبك الكمامات بعشرين جنيه ودفعتى عليه شحن 60 جنيه وهما بيتباعوا فى المترو بجنيه وبيرموه فى حجرنا يعنى فرى ديليڤيري...معرفش انتِ مصممة تدفعينى دم قلبى ليه، كأن فلوسى فلوس حرام...
انسى حوار الاونلاين ده خالص...السيرة دى بتلبش جتتي!
- طب خلاص نخلينا فى المولات
= مولات ايه يا ولية! بقولك فى كورووووونا!! احترمى الڤيروس شوية عيب كده..
- ما احنا هناخد احترازاتنا واحتياطاتنا وهلبس العيال كمامتين فوق بعض عكس عكاس وهدفى صدرهم بجرايد وهرش ايديهم بكحول وهمشى أرش أى حاجة بكلور مخفف.. وهخليهم يشربوا لتر برتقان عشان المناعة برضه وهديهم معلقتين عسل صبح وليل عشان نبقى فى السليم..
= طيب عشان أثبتلك انك حافظة مش فاهمة، اشرحيلى هتدفى صدرهم بجرايد ليه.. هااا؟؟ وازاى نسيتى تلبسيهم الفانلات بالمقلوب احتياطى بدل ما انتِ واعية أوى كده ومحدش فاهم الڤيروس قدك !! انتِ أم انتِ... ده انتِ مفيش فى قلبك رحمة صحيح!
بصى مفيش نزول يعنى مفيش نزول.. وسيبينى أدخل انام قبل ما يطير النوم من عينى هو كمان زى ما انتِ عايزة تطيرى اللى باقى من المرتب ! وبعدين تعالى هنا... فين لبسهم اللى جبناه آخر الشتا اللى فات فى الأوكازيون وبسببه غضبتى عند أهلك 3 أسابيع لحد ما جبته... ده انا كنت كاعع فيه دم قلبي! وقولتيلى ساعتها ان فى تخفيض 5٪ وان ده عرض محصلش وجبتى كسوة سنتين قدام... راحوا فين بقي؟؟
- هو انا مقولتلكش... ؟؟
= لأ يا حبيبتى مقولتيليش... راحوا فين بقي؟؟ اشجيني!
- لأ مش هقدر أقولك..
= بصى قولى عشان حاسس بكرشة النَفَس اللى بتجيلى وانا لابس الكمامة فى الشغل ومعايا عميل رغاى ورذل... اخلصي... راحوا فين؟ لو اديتيهم لمنار أختك لفّة هاتيهم منها عادي... انتوا اخوات برضه والضفر ميطلعش من اللحم..
- ياريت...
= ما تقولى انا ركبى بتخبط على الجيران.. فلوسى راحت فين؟؟
- اللبس كله صغر عليهم!
= غسلتيهم وكشّوا يعنى ؟
- لأ... كنت جايباه يدخل فيهم حشرعشان الدنيا كانت زحمة ساعتها ومعرفتش أقيسلهم فا جبت اللبس بالويم كده وبعدين هما كبروا اسم الله عليهم من كتر اللغ اللى بيلغوه طول اليوم فمبقاش حد بيدخل فيه حاجة.. فالمشكلة مش منى يعني.. كده كده كانوا هيصغروا عليهم..
= اه يا حوستى السودااا يانا يا امّا.... طب ارمى عليكى اليمين دلوقتى والا ارمى نفسى من البلكونة والا اعمل ايه بس عشان ترتاحى ! طب خلاص خلى الصغير يلبس من الكبير واهو نبقى انقذنا ما يمكن انقاذه..
- لأ مش هينفع برضه...هو انا مقولتلكش !!!
= يادى النيلة ! يادى النيلة ! لأ مقولتيليش يا اختى !!! سبحان الله كنتِ فاقدة الذاكرة طول السنة اللى فاتت ورجعتلك دلوقتى !
بالراحة طيب وهفهمك...ما انا حاولت أئيف اللبس اللى صغر عشان ييجى على قد الصغير بدل ما هو مبهوأ عليه عشان أوفرلك فشوفت ڤيديوهات على اليوتيوب فالهدوم باظت منى وانا بطبق الكلام اللى شوفته مع انى عملته بالحرف...معلش بقى لكل جواد كبوة !
- مش ملاحظة ان حياتك معايا كلها كبوات بس يا منال والا انا بيتهيألى !! فهمينى بس تانى كده...شوفتى ايه يا روح قلبى فالهدوم باظت منك؟! ڤيديوهات !! يقطع النت على اللى بتشوفوه من على النت... انا هفصل الراوتر ده حالاً وهدشدشه قدام عينك عشان ترحمينا من عمايلك السودا دى واهو بالمرة تعتقينا من وصفات الأكل العَجَب اللى بتجبيها من على الزفت ده برضه واحرمك من الجروبات اللى بتجيبى أزفت ما فيها والبس انا فى تمنه فى الآخر..
كل الستات بتجيب وصفات من النت وبتفلح الا انتِ وكل الستات بتشترى حاجات لُقط من على المدعوء ده إلا انتِ... اعمل فيكى ايه بس؟ اجرجرك من شعرك دلوقتى على بيت أهلك ولّا اعمل فيكى ايه! راعى عشرة السنين اللى بيننا يا منال وارحمى جوزك بقي! بالمنظر ده هيتقبض عليا..افهمهالك ازاى ؟؟
- طب سماح المرة دى طيب.. وبلاش نكسر بخاطر العيال ده العيد فرحة..
= هتحتاجى كام؟
- فى حدود تلات اربع تلاف جنيه ده إن كفوا حاجة.. العيال معندهاش حاجة تلبسها !
= سامحينى أصلها مشكلتى انا معلش... طيب وعايزة لحمة العيد صح اللى قعدتى تعيطى عليها الأسبوع اللى فات كأن عمرنا ما دخلناها بيتنا..
- آه طبعاً اومال هنقضيه أورديحي.
- صحيح... لازم لحمة العيد عشان محدش يقول علينا حاجة أصل لو أول يوم أكلنا فراخ هيمشوا فى الميكرفونات يقولوا اللى بياكلوا فراخ أهم..طب مش عايزة حاجة تاني؟
- عايزين نروح يومين اسكندرية كده نشم هوا..
= وماله يا حبيبتي.. شموا... هو انا حايشكم..
- حبيب قلبى يا سِحس.. يعنى افرّح العيال واروح اقولهم اننا هننزل دلوقتى نجيب الهدوم ونشترى اللحمة وهنروح اسكندرية فى العيد؟
= لأ هنروح المالديفز ان شاء الله... اسكندرية مش مقامكم يا حبيبتي.. وبالنسبة للّبس هجيبه وانا فى باريس أهو يبقى أرخص وهوصيلكم على غنم من أغنام المارينو بيقولوا لحمته حلوة أوى وملبّسة ابن الإيه..
- انت بتهزر يا حسن؟
= اومال الطم يا منال؟ ما انا لو مهزرتش هتنقط.. بقولك نص المرتب دفعته فى الجمعيات ومعانا اللى يعيشنا بالزّق تقوليلى لبس عيد وفُسح.. طب اعملى اعتبار للكورونا اللى هزقتيها على الآخر دي! تقول علينا ايه دلوقتي.. وبعدين قومى افتحى شوفى مين بيرن علينا الساعة دي..
- حاضر
= مين يا منال؟
- ده بتاع الغاز
= بتاع الغاز هييجى الساعة 8 بالليل يا ولية؟!
انتِ بتعملى ايه... بتلمى هدومك ورايحة فين... فهمينى هنا..
- أصل انا كنت طالبة أوردرات اونلاين ب 1500 جنيه فهروح عند أهلى لحد ما أدبرهم...
= لأ لو كان كده بالسلامة يا منال وخدى الباب فى ايدك ولو الأوردر ده طلع مهبب زى كل مرة ورقتك هتوصلك لحد عندك...
على آخر الزمن هتلففينا على محاكم الأسرة عشان هاو ماتش... هتشردى أسرة بحالها عشان هاو ماتش!! ربى انى لا اسألك رد القضاء ولكنى أسألك اللطف فيه..اقول فيكى ايه وانت فيكى كل العبر!! يارب تبقى ارتاحتى يا منال دلوقتى وانت مقضية العيد فى بيت أهلك !! قال هاو ماتش قال !!