أديب لمرتضى: «مابضربش على قفايا وارجع أعتذر..يا أنا يا أنت في البلد»

رد الإعلامي عمرو أديب، اليوم الإثنين، على الهجوم الذي تعرض له على يد رئيس نادي الزمالك، مرتضى منصور، عضو مجلس النواب، قائلًا: «أنا مش بضرب على قفايا وأرجع أعتذر تاني، والله يا أنا يا أنت في البلد دي، وكلنا عارفين مصايبك القديمة مع الريان، أنا مش بتاع سيديهات أنا بتاع مستندات، ده أكبر كذاب في البلد، مفيش وراه غير الكذب، بس أنا مش هسكت، ومش هعتذر، ومش هتصالح، لو آخر يوم في حياتي».
أضاف أديب، خلال تقديمه برنامج «القاهرة اليوم»، عبر قناة «اليوم»، «إما اعتدلت أو اعتزلت، وأنا ورالك، خلاص فاض الكيل، أنا بقولك حمرا بقى، هي مش عذبة ولا إحنا ملسوعين على قفانا، إحنا أشراف وطول عمرنا أشراف، والله لو نجحت في وقف البرنامج ده لأعمل قناة حتى ولو على يوتيوب، يوم ما اتسجنت ابنك جالي هنا عشان نطلعك، ومراتك كانت بتعيطلي عشان أدخلك الأكل».
تابع: «كل الناس خلاص عرفت إنك بتألف، أبو لمعة، وأنا مكنش نفسي أعمل فيك كده أو أنزل للمستوى ده، كده كفاية أوي ولمّ نفسك، وإلا هفتح كل حاجة، هتكلم عن الشاهد الزور يا مرتضى، فاكره؟ أنا بقى اللي هقفلك، وإنت مش مستشار، زي ما توفيق عكاشة مش دكتور، وخليك فاكر إني أول حد طلعك في الإعلام، عندي هنا، في القناة السعودي، فاكر يا مرتضى».
استكمل: «أوعوا تخافوا من مرتضى تاني، اللي عايز يقول رأيّه فيه يقول، واللي عنده بلغ يقدم، واللي مرتضى ظلمه يقول، آن الأوان إن محدش يخاف منه، وأنا النهاردة بكسر حاجز الخوف ده، البلد دي خلاص الخوف فيها انتهى، وأنا كل اللي يهمني إني أنام مرتاح، وأنا هفضل عمرو أديب وإنت هتفضل مرتضى منصور، كل الناس عارفك، وكل الناس عارفاني، وأنا والله ما هسكت لو أي حد في الدولة وقف معاه، بقولها صريحة أهوه».