ملحوقة على ايه!

يوميات الأخبار

يا حسرة! شوبينج ايه! ملحقتش أتهني.. الواد يوسف ابني أول ما دخلنا المول ولسه بنقول بسم الله الرحمن الرحيم تاه مني، ببص يميني وشمالي فص ملح وداب
في شهر العسل:
محمود: بصي يا بنت الحلال، مادام اتجوزتيني طلباتك كلها مُجابة وانتِ قاعدة في البيت معززة مكرمة.. أي حاجة تحتاجيها أو حتي تفكري فيها قوليهالي.. وانا هعملها.. أنا بكره الرجالة اللي بترمي المسئوليات علي الستات ويجننوهم عقبال ما ينفذوا طلباتهم.
ربنا يخليك ليا يا حبيبي.. يا سندي يا ضهري.
بعدها بشهر:
محمود يا حبيبي.. الحنفية بتنقّط ممكن تنادي السباك يصلحها..
طبعًا يا حبيبتي من عنيا.. انهارده تلاقيه عندك.
تسلم وتعيش يا حبيبي.
بعدها بأربعة شهور:
محمود يا حبيبي الحنفية غرّقت الحمام كله! والسخان بايظ والشتا داخل علينا؛ ممكن تكلم السباك لإن كده السيراميك كله هيطق وهنحتاج نغيره واحنا معناش فلوس لكل ده..
حاضر من عنيا.. بس كده.. هجبلك انهارده أحسن سباك وكهربائي فيكي يا مصر..
ربنا يخليك ليا يا سيد الناس.
بعد مرور سنة :
يا محمود أرجوك أنا جاتلي نزلة من كتر ما بستحمي بمياه ساقعة وسيراميك الحمام طق كله عشان الحنفية بقت شغالة زي سماعة الدش مش بتفصل 24 ساعة والسخان بقي قطعة ديكور في الحمام ملهاش أي فايدة.. أنا عارفة إنك مشغول ممكن تخليني أنا أكلم السباك والكهربائي ييجوا يشوفولنا حل بدل ما نتصعق في مرة! في حاجة مش مظبوطة في الكهربا وفي أسلاك ملمسة!
لا طبعًا تكلمي مين، انتِ ملكيش راجل والا ايه! تكلمي مين وأنا موجود! ده علي جثتي.. بكرة بالكتير هيكونوا عندك.
بعد 8 سنين:
يا محمود ارحمني وارحم ابنك وبنتك!
مايا مبقتش بتروح المدرسة طول الشتا عشان بتخرج من دور عيا تلضم في الدور اللي بعده ! وابنك بنلف بيه علي كل دكاترة مصر! هتنادي للسباك امتي بقي هو والكهربائي؟ الواد اتكهرب من يومين من السلك العريان!
ما خلاص يا مها.. المياه الساقعة دي مناعة علي فكرة بس انتِ لو تاخدي بالك من أكلهم وصحتهم مكانش ده بقي حالهم ومكانوش من شوية ماية ساقعة في الشتا يتعبوا وتجيلهم نزلة! ركزي في دورك كأم بدل ما تزّني عليا كل شوية!
بعد مرور 30 سنة:
يا محمووووود... كح كح... البت مايا جاية هي وعيالها وبيصرخوا لما مايا تقولهم رايحين عند جدو وتيتة عشان بيخافوا من الحنفية اللي بتضرب في وشهم وهنا بنت عُمر حرمت تيجي تبات عندنا في الشتا عشان السخان وأنا الروماتيزم مبهدلني من المياه المتلجة دي! كلم السباك بقي أبوس ايدك..
ما بس بقي يا مها.. كفاية زن وارحميني! قولتلك هصلحه.. الدنيا مطارتش! ياباااااي عليكي وعلي زنك يا شيخة!! ده انتِ تزهقي بلد!!
بعد مرور 50 سنة :
محمووووود.. هقولك وصيتي قبل ما أموت... كح كح كح... ناولني دوا السلّ الأول... شكلي بودّع.. محموووود أبوس ايدك إوعي تغسلّوني بمياه ساقعة! أبوس ايدك ارحمني علي الأقل بعد ما أموت! مياه ساقعة لأ يا محمود..كح كح كح..
يالهوي عليكي يا شيخة! لسه فيكي حِيل تزّني! قلبي قلبي! شكلي انا كمان هفطس من كتر زّنك! اهمدي بقي!! انا كلمت عم فرغلي السباك امبارح وحزنت لما عرفت ان جنازته كانت الأسبوع اللي فات! هدورلك علي سباك تاني بس اديني وقتي.. اصبري عليا.. وما بلاش صربعة! حرام عليكي يا شيخة!
الشكوى... رقوة !!
بسم الله ما شاء الله... حلوة أوي الصورة دي يا شيرين.. كنتوا فين؟
كنا في إيطاليا.. بس كانت سفرية غم وقطران بعيد عنك.
ليه بس ده حتي إيطاليا جميلة وفيها فُسح كتير؟!
اسكتي مش الباسبورات اتسرقت مننا هناك والسفرية كلها اتضربت وكانوا كام يوم ما يعلم بيهم الا ربنا! ده أنا عمري ما عيطت في حياتي قد العياط اللي عيطت هناك من البهدلة اللي شوفناها!
قعدتوا هناك كام يوم؟
خمسة وخميسة، قصدي خمس أيام بس قضّيناهم كلهم في المستشفى عشان أحمد شال الزايدة واتحجزنا هناك!
الزايدة! مش أحمد كان شالها قبل كده وانتوا في شهر العسل زي ما حكيتيلي؟! شالها تاني ازاي؟!
ايه؟! اااه صحيح! ما هي طلعتله في جنبه الشمال كمان!
ازاي يعني؟ انتي هاتخترعي طب؟! مفيش الكلام ده.
لأ فيه.. بس حالات نادرة! مش بقولك سفرية غم! ده الدكاترة كانت بتضرب كف علي كف هناك وكان ناقص يحطوه في المتحف! بس قالوا ممكن يكون من تغيير الجو عشان مش متعود علي السقعة! تلاقيه استهوي.
استهوي!! عامة ألف سلامة بس متنسيش تقفلي الشبابيك كويس بعد كده.. بس مش كنتِ تقوليلي يا ندلة إنك مسافرة كنت عايزاكي تشتريلي شوية حاجات أسعارها هناك تحفة.. احكيلي بقي عن الشوبينج.
يا حسرة! شوبينج ايه! ملحقتش أتهني.. الواد يوسف ابني أول ما دخلنا المول ولسه بنقول بسم الله الرحمن الرحيم تاه مني، ببص يميني وشمالي فص ملح وداب.. وأنا بقي علي صرخة واحدة وكنت مرعوبة حد يخطفه من عصابات المافيا اللي بيتاجروا في الأعضاء! قعدت أدور عليه خمس ساعات لحد ما لقيته!
وبعدين لقيته فين؟
لقيته واقف عند بتاع الآيس كريم قدامي وربنا ستر.. بس تفتكري اليوم خلص علي كده؟ الفيزا بتاعت أحمد اتسرقت ولا كنا لاقيين ناكل ولا نشرب، تقومي تقوليلي شوبينج.. يا دوب كل اللي اشتريناه فستان لتاليا شبَك في سور لعبة في ديزني لاند واتنسّل كله وقميص لأحمد وطلع اتضحك علينا في تمنه لقيناه في أسبانيا هو نفسه بنص التمن!!
ديزني لاند؟ هو انتوا بعدها روحتوا باريس؟ وأسبانيا؟ كويس والله شكلكوا لفيتوا كذا بلد والله كده أحسن أنا كمان نفسي أسافر السفرية دي.
مين قالي ديزني لاند؟ صحصحي معايا يا علا.. بقولك سور المستشفى الوغد.. ابقي سلكي ودانك يا حبيبتي! ومين قال أسبانيا؟! انت بقي بيتهيألك حاجات غريبة ولازم تروحي لدكتور تتطمني علي نفسك!
والله كانت أجازة هم و نكد.. يا ريتنا كنا روحنا الساحل بدل الفلوس اللي اترمت علي الأرض دي كلها.. احكيلي بقي انتوا عملتوا ايه في الساحل؟
مفيش والله... زي كل سنة.. روحنا في شاليه خالتي كام يوم عشان أسامة كان عنده شغل كالعادة!
اللي هو عملتوا ايه يعني وخرجتوا مع مين؟
عادي يا شيرين.. بنقضي طول اليوم علي البحر وماما جاتلنا هناك والعيال كانوا بيركبوا عجل واليوم بيخلص.. ما انتِ عارفة البرنامج مش بيتغير.
ما تحكي عِدل! مالك بتقطمي معايا في الكلام كده ليه؟ لا تكوني خايفة أحسدك!
يا بنتي تحسديني علي ايه! بطلي هبل.. ما تجيبي الموبايل تفرجيني صوركم في إيطاليا!
كان علي عيني.. بس الفيلم اتحرق.
فيلم ايه اللي اتحرق؟ هوا انتي بتصوري بكاميرا كوداك في الثمانينات!
ااااه ما انتِ ما تعرفيش أحمد لما بينشف دماغه! حلف عليا نتصور بالكاميرا الكوداك عشان نحمّض الفيلم ونستعيد ذكريات زمان.. بس الفيلم اتحرق في الاستوديو! مش بقولك كان في بومة بصالنا في السفرية!
بومة ايه يا ستي؟ هو في مخلوق كان يعرف إنك مسافرة عشان يبصلك فيها؟! عامة ابقي بلغي سلامي لأحمد وقوليله ألف سلامة وإن شاء الله نيجي نزوره أنا وعماد لما يشيل الزايدة للمرة التالتة علي التوالي عشان نحتفل بدخوله موسوعه چينيس للأرقام القياسية!