كشفت دار الإفتاء المصرية الطريقة التي اتبعتها لتحديد قيمة زكاة الفطر، بالعامية عبر صفحتها الرسمية على موقع فيس بوك، اليوم الثلاثاء. وقالت «الإفتاء»: «اعرف دار الإفتاء المصرية قدرت قيمة زكاة الفطر ازاى بطريقة سهله وبسيطة وميسرة ولغة عامية أيضا سهله وبسيطة». وأضافت: «حسبناها على القمح اللى بيتعمل منه العيش اللى كل الناس في مصر بتاكله لأن بيوت كتير مش بتاكل لا رز ولا تمر ولا زبيب، طيب سعر أردب القمح كام 1700 جنيه والأردب فيه 150 كيلو، يبقى سعر الكيلو كام 11.33 إحدى عشر جنيه وثلاثة وثلاثون قرشًا». وتابعت: «طيب والزكاة أد ايه 2.6 كيلو، يبقى نضرب 2.6 كيلو * 11.33، يطلع الناتج 29.46 ودار الإفتاء قالت إنه 30 جنيه»، مضيفة «و 30 جنيه الحد الأدنى يعني طلع أكتر من 30 جنيه لو معاك ودخلك يسمح لك بس اللى مش هيقدر فأقل حاجه يطلعها عن الفرد 30 جنيه». وتابعت: «طيب أنا شايف إن 30 جنيه قليل مش هتعمل حاجه يبقى تطلع ما ترضاه نفسك وتحس إنه له قيمه لكن لا تقل عن 30 جنيه ولا تلزم غيرك يطلع زيك لأن ممكن يكون غير قادر وتخرج قبل صلاة العيد». اختتمت: «ولو ملحقتش تطلعها ممكن تاخد برأي السادة الشافعية إنك ممكن تطلعها قبل غروب شمس يوم عيد الفطر».