عقار حي الحسين المنهار يتسبب في مأساة ل 15 أسرة (فيديو وصور)

صوت ارتطام صداه دوى في أركان حجرة أحمد على، خلف شارع المشهد الحسينى بحى الحسين بالقاهرة، هرول الرجل لمعرفة ما يحدث بالخارج: «لقيت البيت اللى ورانا بيقع علينا»، ليعود ثانيةً إلى زوجته وأطفالهما ال5، «جريت بيهم زى المجنون، وكل الجيران كانوا بيجروا ومش شايفين حاجة من التراب اللى نزل علينا»، وهو ما فعلته نحو 15 أسرة تقطن العقار المنكوب المكون من 4 طوابق بالأرضى، والحجرات الخلفية له، خوفًا من تأثير سقوط العقار عليهم.
في الشارع، وقف «على» يطمئن على صغاره وبينهم الرضيعة «تولين»، يقول: «عيالى انهاروا فور خروجنا بسرعة لإنقاذهم، ولحد دلوقتى من شدة الخوف بيصرخوا على طول، إحنا كنّا قعدين نفطر سوا، حصل الانهيار كأنه كابوس زارنا على غير موعد»، يشرح: «اتصلنا على النجدة والشرطة حضرت على الفور، وأثناء معاينة المنزل سبب الكارثة والحجرات التي نقيم بها سقطت أجزاء من العقار مرة أخرى، وحصل هرج ومرج، وبعد كده طُلب مننا نترك محال إقامتنا خشية على حياتنا، وأصبحنا ننام لدى الجيران والأقارب».
حنان رمضان، سيدة في أوائل الأربعينيات، أمام حجرتها تبكى حظها «مش معانا حتى هدوم، وكل حاجتنا راحت»، وقت انهيار العقار كانت تقضى احتياجات أسرتها «لقيت أختى بتتصل عليا بتعيط إن البيت اللى ورانا بيقع، وجريت على طول ناحية حجرتى وشلت عيالى وأنقذتهم من موت محقق»، تنظر إلى حطام مكان إقامتها وسرعان ما تتمتم «بس ضفر عيل واحد بالدنيا وما فيها»، تحتضنهم «بس نفسى في مكان يأوينا».
العجوز «منى»، وشقيقاتها يمتلكن 4 حجرات، إذ تعتز بمكان مولدها «إحنا هنا أبًا عن جد، ولا عمرنا فرطنا بمكاننا، ولمّا عرفنا إنّ هناك قرار إزالة زعلانين، عاوزين نفضل هنا جنب سيدنا الحسين»، تفيض عيناها دمعًا وتروى: «مش حيلتنا حاجة بالدنيا خالص، ولما سكنت دفعت إيجار 2000 جنيه، ومكسور عليّا فلوس ومش عارفه أدفعها»، تشير إلى زوج شقيقتها «دا رجله مبتورة ومريض قلب، لا يملك ما يعينه على ظروف الحياة».
أم حسين هريدى، نزلت من العقار قبل انهياره بدقائق، فتحت دكانا تبيع به الملابس البسيطة، «سمعت صوت طقطقة، جريت على البيت وخبطت على ابنى وعياله، اللى ساكن معايا بالدور الأرضى، لحقتهم وجريوا برا، لحد ما خرجنا الشارع تانى، وطلعته على أخوه الكبير (على) وأطفاله وكلهم بقوا قدام البيت، كإن هم من على قلبى وانزاح».
العقار توقف عن أصوات الطقطقة لثوانِ، ليصعد الأهالى إلى «نبيل»، و«محمد»، و«ناصر» وشقيقه «طارق»، الذين يقطنون الطابقين الثانى والثالث قبل الأخير، وهم من كبار السنّ ولا يستطيعون الحركة وكل منهم يقيم بشقة بمفردة، «لما نزلهم حسينا بفرحة كبيرة، والكل حضن بعضه كإننا انتصرنا على الموت، وكان الطلوع لهم مغامرة غير محسوبة العواقب، لحد ما حضرت قوات الحماية المدنية والإسعاف».. الجيران يحكون تفاصيل اللحظات التي حبسوا فيها أنفاسهم.
بعض الأسر المتضررة افترشت الشوارع، وأولادهم كانوا يمسكون بكتب مدرسية ويسألون أولياء أمورهم: «هنروح المدرسة تانى؟»، ويردون عليهم «الحاجات كلها في البيت»، بينما يبلغهم مسؤول بالحى «قدامكم 48 ساعة تجيبوا كل حاجة من الشقق».
النيابة العامة طلبت ملف العقار المنهار من الحى واستدعاء المسؤولين، وتبينّ أن قرار إزالة صادر له قبل نحو 20 عامًا، وشكا الأهالى مأساتهم للحى، مطالبين بالتدخل وحل أزمتهم، بعد القرار الصادر بتشميع المنزل ومنع دخول أحد إليه والحجرات الخلفية له ممن تقيم بها أسر.