زوجة «ضحية الشهامة» : «قتلوه عشان بيدافع عن البواب»

تبدلت الأحوال من الفرح لقدوم الأب يحمل «حاجات حلوة» لطفلتيه إلى صراخهما، وهما يشاهدان دماءه تغرق مدخل البيت، إحداهما قالت لأمها فى فزع: «يا ماما بابا مات»، صدق حدس الصغيرة، وفق والدتها: «جوزى كان بيدافع عن البواب، الجيران كان عندهم كلب رابطينه فى باب العمارة والسكان بتخاف منه، ولما الحارس اتكلم معاهم خوفوه بيه، وقتلوا حبيبى لما عاتبهم وحدثت مشاجرة بينهم».
زوجة محمد فيصل، عامل الدليفرى، كأنها تحمل جبلاً فوق ظهرها، بكت زوجها «العائل الوحيد لها ولابنتيها (آية)، و(أروى) كبراهما 5 سنوات»، حين تذكرت اتصاله الأخير بها قبل مجئيه لمنزلهما بعرب المعادى فى القاهرة: «قاللى جاى اتغدى معاكِ والعيال وحشونى، وجبت لهم شيبسى وكيكة وعصير»، يعتصرها الألم تضيف: «سمعت صراخ افتكرت خناقة عادية بالشارع، نزلت كام درجة على السلالم، لقيت النّاس بتردد كلمات: (سيبوه خلاص.. مات حرام عليكم)».
لم تكن الزوجة، تعرف أن «محمد» طرف بالمشاجرة التى سمعت ضجيجها وهى تردد «ربنا يسترها علينا»، حتى تلقت اتصالاً من هاتف الزوج بينما تجيب عليه وتظن أن «القدر استجاب لدعائها»، «لقيت واحد من الشارع بيقوللى جوزك مضروب ورايحين به مستشفى الريان»، قالتها حزينة «جريت على الشارع، ومعايا بناتى الكبيرة فيهم شافت دم أبوها بمدخل العقار، صرخت فيّا: (بابا مات، بابا مات يا ماما)».
زوجة «محمد»، توجهت للمستشفى، الأمل كان داخلها أن «جوزى يكون بخير، لأنى سمعت ناس بتقول هيقوم بالسلامة»، بدد الأطباء ما رسمته بمخيلتها على الفور، أحدهم قال لها «البقاء لله»، بالوقت ذاته «الشرطة حضرت للتحرى والتحقيق».
لم تقم الزوجة من مكانها، الصدمة جعلتها تروى مرثية عزاء لها ولابنتيها، تحتضنهما: «مين هيبريكم، مين هيدخل عليكم بالضحكة الحلوة، مين هيصرف علينا»، وبينما تسأل «إيه اللى حصل؟»، كان حارس العقار الرجل المسن، وشهرته «أبو شعبان»، يجيبها من بين دموعه: «يا بنتى (يوسف) اللى ساكن بالدور الأرضى، اتخانق معايا لأنى ضربت الكلب بتاعه وهو مربوط بمدخل البيت، لأنه بيضايق السكان، لقيته بيتشمنى بألفاظ نابية، وخوفنى بالكلب وسيّبه عليّا لحد ما جه جوزك وقال له: عيب دا قد أبوك، وحصل مشادة بينهم استعان خلالها صاحب الكلب بأخوه الكبير (أحمد) وقتلوه مع أصحابهم».
حارس العقار، روى أن (أحمد) كان «جاى وفى نيته غدر»، يشرح «كان معاه خنجر، ضرب (محمد) بكتفه فلف له قام ضربه ببطنه من الناحية اليمين، وكان معاه أصدقائه نزلوا ضرب بالضحية لحد ما سقط أرضًا، والنّاس كلها بالعافية طردت الجناة وحملوا المجنى عليه للمستشفى وكان السر الإلهى طلع».
زوجة «محمد» سمعت بتفاصيل الجريمة التى لم تستغرق ال15 دقيقة، ولطمت خديها «عيالى اتيتموا، مين هيربيهم، بقوا من غير أب»، تطالع صورا للزوج تجمعهما وطفلتيهما بحديقة الحيوان، كأنها تعاتبه: «بنتك آية، بتسألنى: بابا فين؟، بقول لها: فى الجنة؟، بترد عليّا: هيجى امتى؟، هتجنن مش عارفة أعيش من غيرك».
وحين حاولت زوجة المجنى عليه، العودة لشقتها قالت لها الصغيرتان: «لأ.. بابا مات هنا»، لتعيش داخل جراج يعمل به والدا «محمد»، حيث والدته تطالب «عاوزه حق ابنى بالقانون، اللى عملوا كده يتشنقوا علشان نارنا تبرد»، تتابع «إحنا منعنا الأكل والشرب من القهرة والحزن على ابننا الكبير وسندنا بعد ربنا».
ووالد عامل الدليفرى، لسانه لا يذكر سوى: «يا ناس كنت بالبلد، جيت على ملى وشى قالولى: ابنك مات، قلت لهم: كبيرى وأول فرحتى راح!».
شهود العيان وجيران المتهمين والمجنى عليه، قالوا إن مرتكبى الواقعة سلوكهم سيئ، وأشادوا بأخلاق «محمد»: «كان آية بتمشى على الأرض»، بالوقت ذاته أمرت النيابة العامة بحبس الجناة احتياطيًا، واعترفوا بأن «جارنا استفزنا، والخناقة مكانتش معاه».