المتهم بقتل سائق «توك توك» بحلوان: «حبِّيت أعلمه الأدب»

«فرحة» لم تهنأ بشقتها الجديدة، وتواصل الليل مع النهار تبكى زوجها مع طفلتها، صاحبة العام، وكأنها تناجيه، حيث تردد: «الحِمل تقيل من غيرك»، وتحكى تفاصيل قتله المُروعة التى دارت أمام عينيها: «عاكسنى واحد اسمه (محمود)، جوزى عاتبه وانتهت مشادتهما باستعانة الأخير ب(محمد) و(عصام)، وضربوه بالخرطوش والسنجة والشومة، وانتهت حياته، قبل أن تكتمل فرحتنا بالمسكن الجديد».
«أحمد»، زوج «فرحة»، كان رجلًا بسيطًا يعمل سائق «توك توك»، منذ زواجهما قبل عامين، ويراودهما حُلم السكن بشقة مستقلة عن بيت أهله المتواضع، وبعد إنجابهما «مايا» اختارا شقتهما فى حلوان وقررا طلاءها على ذوقهما، ويوم الجريمة ذهبا إلى محل «البويات» لاختيار الألوان المناسبة، إذ تبددت فرحتهما إلى الأبد، الزوجة تقول: «نور عينى قتلوه، كأنهم مش عاوزينا نفرح، جوزى كان نفسه يفتح بيت ويربى بنته ونعيش زى الناس».
الزوج قال ل«فرحة» قبل دخوله المحل: «خليكى واقفة هنا، بعيد شوية علشان الناس وتكونىِ براحتك، وفجأة سمع صوتها يعلو وتوبخ شخصًا، طلع لقى (محمود)، من أبناء المنطقة، بيعاكسها، قال له: مش عيب عليك، إنت مش عارف إن دى مراتى؟!»، وتحكى الزوجة: «جوزى عارف إن (محمود) بيبيع مخدرات، فقال له: طيب روح ناديلى اللى مشغّلك، فرد عليه: لو جه هيزعّلك».
بعد مشادة كلامية دارت بين الزوج وجاره، تدخل الأهالى و«كل حىّ راح لحاله، وجوزى راح عند واحد صاحبه اسمه (وليد)»، هكذا تصورت «فرحة» انتهاء الموقف برمته، لكنها، وهى داخل الشقة الجديدة، سمعت صراخًا بالشارع، على وقعه نزلت تجرى لتجد «محمود» و«معاه ناس ملمومة على جوزى ومعاهم أسلحة».
«هو فينا من ضرب النار؟!».. قالها «أحمد»، لجاره «محمود»، الذى رد عليه: «أيوة»، ثم أطلق رصاصة من فرد خرطوش على رجله، على أثرها سقط سائق ال«توك توك» وهو يتلوى من الألم: «رجلى اتقطعت. رجلى اتقطعت».. ليتلقى ضربات أخرى فى القدم والرأس ب«شومة» و«سنجة» من قِبَل صديقى المتهم الأول.
كانت «فرحة» وشقيقة زوجها قد وقفتا على مسافة بضعة أمتار من «أحمد»، ولم تستطيعا الاقتراب منه، «كنا خايفين حد يضربنا احنا كمان»، وبعد دقائق حين هرول الجناة من مسرح الجريمة «شيلناه ووديناه المستشفى، وكان بيصرخ وكل اللى عليه بيقول: رجلى.. رجلى اتقطعت»، وتصفان إصابته «لحمه كله كان متقطع خالص».
داخل المستشفى، ووسط آلام وآهات «أحمد»، عاتب زوجته: «ليه ماجبتيش مايا، دى هتخفف عنى مصابى»، مندهشةً سألته: «هتعمل لك إيه الصغيرة دى؟!»، ليدخل العمليات لبتر القدم ويلفظ أنفاسه الأخيرة، وتقول الزوجة: «كان عاوز يودع البنت»، وتطالب: «عاوزة حقه، ده مات عمره 27 سنة، بنته تتربى إزاى دى؟!، بتنادى على أبوها فى البيت: يا بابا، بقول لها: أنا أبوكِ وأمك، البنت بتعيط وتقول: لأ عاوزة بابا».
وقبل عامين، كان المتهمون قد أصابوا شقيق «فرحة» بعاهة مستديمة: «فقأوا عينيه لأنه كان بيلم كراتين من محل واحد فيهم، وزعق له، فضربوه، وجوزى تدخل يشيل عن أخويا، ضربوه، ولما عاكسنى أحد المتهمين زادوا فى ضربه، والوحيد المقبوض عليه المتهم (محمود)، وهو اللى ضرب جوزى بالنار».
المتهم المقبوض عليه اعترف لجهات التحقيقات بارتكابه الجريمة، وقال: «إحنا بنفرض سيطرتنا على المنطقة، والمجنى عليه كان بيتخانق معايا، وحبِّيت أعلِّمه الأدب».