ياسمين عز عن المونديال: «لو جوزك قالك يا ميسي كده يبقى بيدلعك مش ناسي اسمك»

قدمت الإعلامية ياسمين عز، مجموعة من النصائح للسيدات لكي تستطيع التعامل مع زوجها خلال فعاليات كأس العالم قطر 2022، والذي ينطلق غدًا الأحد.
وقالت «عز» في تعليق خلال برنامجها «كلام الناس»، الذي يعرض عبر قناة «إم بي سي مصر»، اليوم السبت: «سيبه الشهر ده مع نفسه، وبلاش الأسئلة اللي بتجيب تصلب شرايين، زي سؤال أعملك إيه على الغدا، سيبيه مركز في اللي هو مركز فيه، ومتخرجيهوش من المود».
وأضافت: «لو حسستي جوزك وقت الماتش إنك بتشاركيه اهتمامته، وقتها هيكون جوزك أسعد واحد في الدنيا، اقعدي اتفرجي معاه وشجعي بس من غير مبالغة وأفورة ولا أسئلة مين لابس إيه والكلام ده».
وأوضحت: «المخرجين أحيانًا بيركزوا على المدرجات، وخاصة مع الستات الحلوة، فلما تلاقي جوزك بيبص ومبتسم، ده مش معناه إنه مش معجب بيها، هو مبسوط من الحدث نفسه، بلاش تنكدي عليه، هو حزين أصلًا عشان المنتخب مش في كأس العالم، يعني مش هتبقي إنتي والزمن ومنتخب السنغال عليه».
وتابعت «عز»: «آخر 5 دقايق في الماتش لو طلبتي من الراجل عينيه هيديهالك عشان يخلص ويعرف يركز في الماتش وهو غالبا بيكونمش سامعك أساسا ده أكتر هتلاقي في الحياة مسالم فيه».
وأكملت: «لو لقيتى جوزك بيندهك وبيقولك يا (ليفا) ولا يا (ليو) ولا (CR7) ده كده بيدلعك مش بيخونك أو نسي اسمك، دي أسامي لاعيبة عادي، ولو جوزك زملكاوي وهو بيتفرج على ماتش لتونس وقالك يا (جزيزي) عادي، ولو جوزك أهلاوي وقالك فين الشاي يا (علولو) كده يبقى بيدلعك مش ناسي اسمك، هو بينادي على الحاجة اللي قدامه، عديها».