النوم علينا حق

يوميات الأخبار

سارة الذهبى
ده بمجرد ما جوزك يقولك تصبحى على خير، ده ان كملها هو كده بقى فى سكة اللى يروح ميرجعش
ما تصحيش جوزك من النوم إلا لو:
- الأوضة اللى نايم فيها بتتهد رسمى فهمى نظمى، وأظن ان كلامى واضح لما قلت «الاوضة اللى نايم فيها» يعنى خلاص الحيطة هتتطربق على دماغه والأسمنت هيدخل فى بؤه اللى مفتوح سبعة متر ده.. لكن لو البيت نفسه بيتهد وأوضته لسه مجرلهاش حاجة سيبيه نايم.. مفيش داعى انك تصحيه وتقلقى منامه..
- لو بتولدى وخلاص شايفة نص جسم البيبى بعينك وكل المياه اللى حواليه نزلت... صحيه، لأن الطلق بالنسباله تفاسيح ودلع وملوش داعى يقطع نومه عشان حضرتك جالك الطلق.. صحّيه عشان يستلقّى الواد منك مش قبل كده.. أو عشان يأدن فى ودنه لما ربنا ينتعك بالسلامة..
لإنك لو قولتيله اصحى جالى الطلق، هيقولك يشرف ويآنس وهيتقلب على الجنب التانى وينفخ زى التنين مع شتايم بصوت مجلجل ومش هيتعاطف معاكى!!
- لو فى نيزك نزل عليكى وانتى قاعدة على الكنبة أو لو لقيتى كائنات فضائية بدأوا يتجولوا فى الشقة ورايحين يبلعوا عبد الرحمن ابنك، ساعتها انا اللى بقولك صحيه.. لكن لو جايين يلعبوا بالطحال والبنكرياس بتاعه كورة شراب وهياخدوا واجبهم ويمشوا خليه نايم.. ما تقلقيهوش...
- لو فى ماتش للأهلى والزمالك أو ماتش ليڤربول بيلعب فيه محمد صلاح... صدقينى يومك هيبقى مهبب لو نسيتى تصحيه... ده ان جاله نوم ونسى مواعيد الماتشات لا قدّر الله مع ان ده صعب يحصل.. ومهما كان الماتش بيتلعب متأخر عمره ما عينه هتغفل لحظة مع ان لو مفيش ماتش كان زمانه لضم نوم العصر بعد ما رجع من الشغل بنوم بالليل وصحيلك تانى يوم..
- لو لقيتى فار فى بيتكوا قد العجل كده وبيجرى وراكى انتى والعيال ما تصحيهوش، لو لقيتى بُرص بيسرح جنبكوا على الكنبة خليه مرتاح..
لو الموضوع دخل فى تعابين وتنانين ممكن تفكرى تصحيه خصوصاً لو التعابين وسطهم أناكوندا!!
- لو ولدتى خلاص وربنا رزقكوا بملوكة حبيبة قلب مامى ولازم يلحق يشوفها قبل السبوع عشان ميقولكيش بنت مين اللى انتى شايلاها دى ممكن ساعتها تصحيه على استحياء وخجل، وتديله حرية الإختيار لو هيحب يشارك معاكم احتفالات السبوع والا تحكيله اللى حصل فيه لما يصحى على رواقة.. الدنيا مش هتطير..
- لو البوتاجاز هبّ فى وشك وعندك حروق درجة أولى، وطبقتين من جلدك وقعوا كده ممكن تقوميه بس بالراحة وبنبرة صوت حنينة وتقوليله «حبيبى ممكن تصحى لحسن مش لاقية عينى فى مكانها وجلدى ساح عشان البوتجاز هبّ فى وشى» وقولتلك تختارى نبرة الصوت دى لإن الموضوع بالنسباله مش مستاهل يصحى مفزوع.. ده قضاء وقدر، ايييييه هنعترض على قضا ربنا!!! انتى هتكفرى بالله والا ايه!!!!!! وبعدين هو كده كده هيصحى ينأرزك ويديكى دروس فاستعدى لكل الكلام ده.. متتوقعيش انه هيتعاطف معاكى لمجرد ان عندك حرق وصحيتيه من أحلاها نومة..
- لو حرامى دخل عليكوا الشقة وخدك مطوة فى وشك وسرق اللى سرقه واتكل على الله خلاص.. ملوش لازمة تقلقيه.. اهو خد الشر وراح.. واوعى تصحيه.. نصيبكوا كده.. والا هتعترضى على دى كمان!! انا معرفش فين ايمانك بالقضاء والقدر الصراحة!
- لو حد من صحابه على القهوة كلّمه على الموبايل، انفضيه من مكانه كده وصحّيه.. صحّيه بعنف.. صحاب القهوة دول بيتعملهم ألف حساب يا ماما... ومينفعش يتأخر عليهم ولازم يلّبى الندا فى أسرع وقت والا عايزاهم يبدأوا بولة استيميشن وميلحقهمش لا قدر الله بسببك!!
- لو اترفدتى من الشغل ودخلتى فى تريلا وانتى مروحة بعربيتك عشان سايقة وانتِ متنكدة ما تصحيهوش.. وركزى فى ضمير الملكية اللى فى «عربيتك» عشان لو عربيته هو يبقى تلمى هدومك وعلى بيت أهلك وفكرى هتقومى انهى محامى عشان يحضر معاكى جلسات محكمة الأسرة. ما تفتكريش انه هيقولك فداكى يا حبيبتى وخدت الشر وراحت.. أصعب حاجة على قلب الراجل ان عربيته تتخدش فما بالك بقى لو عملت حادثة! ده انتِ ممكن تتشنقى فى ميدان عام بسبب عملتك دي، لأ وكمان مصحياه من النوم على خبر زى ده!! ده انتِ ليلتك ليلة حضرتك!!
- اوعى تصحيه لو جالكوا ضيوف حتى لو فضلوا مستنينه فى الصالون سبع ساعات.. فى داهية.. خليه نايم بدل ما يطلعلهم بالبيچاما وشعره منكوش ويمشى يكحت فى السيراميك بالشبشب وهو بيتاوب..استرى نفسك يا شابة.. وقوليلهم أى عذر منطقي، قوليلهم مثلاً معلش أصل جوزى طلع إعارة فجأة.. اتصرفى..
- لو حد من ولادك ربنا نفخ فى صورته ورتّب على الجمهورية فى الثانوية العامة مثلاً وطلع من الأوائل بلاش تتقلى عليه وتصحيه عشان يحضر التكريم، ما هو هيشوف الفيديو اللى اتكرّم فيه لما يصحي، وبعدين دى ثانوية عامة مخدش الدكتوراة الفخرية من هارفارد فمتكبروش الموضوع..
- اوعى تصحيه لو حد من الولاد دماغه رشقت فى سن الترابيزة، الموضوع يادوب خمس ست غُرز وممكن تدككيهم بإبرة وفتلة فى البيت على الضيق كده يعنى حتى ملهاش لازمة المستشفى وبعدين من مصلحتك جوزك ميصحاش عشان هيفضل يقطّمك ويسم بدنك ويحاسبك كإنك انتِ اللى مسكتى دماغ ابنك وبطحتيها فى الترابيزة وهيديكى محاضرات تربوية عن اهمالك كأم وهيلقح عليكى لحد ما ابنك يتجوز فخليه نايم أحسن لإنه عقبال ما يصحى ان شاء الله هتبقى الغرز اتفكت والواد بقى زى الفل..
- مفيش حاجة اسمها (حد يصحى بابا يا ولاد عشان العريس اللى جاى يتقدم لأختكم وصل) العريس المفروض يخلّى عنده دم وييجى فى اللحظات اللى جوزك بيصحاها وبيكون فايق فيها.. وأبسط امتحان لخطيب بنتك اننا نقيس ثباته الانفعالى وقوة تحمله وصبره انه يستنى حماه يصحى فى مده أقلها 72 ساعة، واعتقد الدنيا مش هتتهد لما يقعد يستناه شوية..
- الغى من قاموسك جملة (الغدا جاهز.. قولوا لبابا يصحى) الغدا يستني، والأكل اللى بِرد يتسخن تانى وتالت ولو اتسخن أكتر من 6 مرات يتعمل غيره لما يصحى وده ينطبق على وجبات اليوم الرئيسية ولو فى عزومة عندكم لأى مناسبة... مفيش أى سبب من دول يخليكى تصحيه وحرام عليكى تضّحى بحد من عيالك وتخليه يقوم بالمهمة الانتحارية دي.. بقى انتِ أم انتِ!!!
انا بس كنت عايزة أوضحلكم حقيقة عن نوم الرجالة...
الراجل لو غمض عنيه وعدّيتى من واحد لتلاتة هتسمعى صوت شخيره بيهز العمارة كلها.. لأ ومبتفرقش معاهم لو نايمين مبسوطين والا قلقانين... كده كده مش بيعدّوا ال3 ثوانى وبيروحوا فى النوم..
ودى ظاهرة احتار علماء الكوكب انهم يعرفوا تفسيرها او يشرحوا ازاى الرجالة بيدخلوا فى غيبوبة النوم خلال ثانيتين ونص، واعتبروا الظاهرة دى اضافة جديدة لعجائب الدنيا السبعة....
ده بمجرد ما جوزك يقولك تصبحى على خير، ده ان كملها هو كده بقى فى سكة اللى يروح ميرجعش وهيتطبق عليكى كل الكلام اللى فوق ده... هو كده راح ملكوت الرز باللبن والمهلبية واندمج... وفى رجالة كتير بتروح فى النوم ومبتقدرش تقول أى مقدمات فمتاخديش فى بالك..
وفى حقيقة تانية ان فى نوع من الرجالة عنده بيات صيفى شتوى خريفى ربيعى ويتحلى بقدرة فولاذية انه يُلضم يومين نوم مع بعض ودور حضرتك كزوجة متفهمة لطبيعة جوزك انك بس تتابعى العلامات الحيوية بتاعته وتتأكدى انه بيتنفس ده ان مكانش بيعزف مقطوعات أثناء النوم عشان بس تتطمنى عليه مش أكتر..
ونصيحة للستات لإن فى ستات يا جماعة بيوصل بيها العبث انها تصحى جوزها لو جالها شرخ فى الجمجمة او عندهم حالة وفاة لقريب من الدرجة الأولى!!!
...هتتعلقى مكان النجفة لحد ما يبانلك صاحب...
خليه نايم أكرملك وقد أعذر من أنذر....