قواعد "الأدد" الأربعون‬‬ (الإضافة يعني)

‫
1_ بلاش تبعت ادد لحد متعرفوش قبل ما تبعت تعالى على نفسك وخد جولة في بروفايله
2_ لما تبعت ادد متستعجلش على قبولها انت مش براد بت واحنا منعرفش
3_ بلاش اسمك يكون شفرة والفيس نفسه يحتار ياواد يابت
4_ بلاش أول ما تبعت الادد تدخل الانبوكس وهاى الناس بتتخض
5_ الفيس مش شات رووم الياهو بتاع زمان، أول سؤال بعد هاى اسمك ايه اكيد مكتوب قدامك يعنى ولا انت اتعميت
6_ بلاش التاج اللذيذ على صورتك بالفانله الحمالات لناس متعرفكش أصلا عشان يشوفوا جمال عضمك
7_ البنوته العسل اللى بتعمل تاج على الاستاتيوس وتسأل الناس هو انا بجد مجنونة على أساس انى بايته معاكى بس اللى تعمل كده أكيد مجنونة مفيش كلام
8_ الناس بتوع تاج أي مناسبة جواز طلاق طهور ميخصنيش أن مرات خالك سيد جابت بت ولا انك متضايقة عشان بتغسلى المواعين وتشعرى بالحزن
9_متضيفش حد على جروب بدون إذنه مش عشان انت بتحب المطرب شعبان البغبغان مش لازم أدخل الجروب معاك شاهد على الحب ده
10_ بلاش الهزار وخفة الدم والعشم القاتل مع حد متعرفهوش يعنى نكتك ومعرفتك جميع أسامى الدلع متهمنيش احتفظ بيها لنفسك
11_ البنت مش على الفيس عشان عريس أو إن حد يشقطها
12_ والشاب مش على الفيس بيدور على عروسة، أمه موجودة وتجيب له اتبطوا
13_ صورتك حلوة وعارفين انك مزة بس فيه ناس زبالة بتاخد صورتك وبتعمل عليها مزاد لايكات
14_ مش معنى انك شوفت حد عندك أونلاين أنه موجود وفاضى يسمعك، وارد جدا يكون سايبه ومات أو فاتح من الموبايل
15_ لو شفت حاجة معجبتكش مش لازم تشتم اللى منزلها وتعرفنا بتربيتك الحلوة
16_ لو في حاجة مش متأكد منها بلاش تفتى وتعمل فيها العالم العلامة حط لسانك جوه بوءك واسكت
17_ مش عشان عندك اكونت فأنت بقيت واعظ وتنفع تنصح أي حد وانت متعرفوش ولو صوابعك بتاكلك اوى ابعت له رساله بينك وبينه مش لازم تفضحه
18_ مش أي حد تختلف معاه في الرأى تشتمه مش لازم تثبت انك قليل الادب
19_الصور الخارجة والفاضحة مش حرية انك تفرج الناس عليها غصب عنهم انت مش في حمام بيتكم
20 _ بتحب الالعاب مش عيب بس مش عشان تلعب تفضل تزن عشان العب معاك وابعت لك جاروف هديه
21_ مش أي لينك قدامك تدوس عليه، لا فيلم هيفاء اتسرب ولا انت هتبقى كارتون ده فيرس يا عبيط
22_ موضوع دوس لايك هنا عامل زى ما تكون بتبيع لبان في المترو تفضل تغلس عشان تبيع بلاش تبقى سمج
23_ مش أي بوست تعمل عليه لايك هيعجبك في ايه انى أكلت ايس كريم النهارده بلاش مجاملة بزيادة
24_الحالة الاجتماعية (relationship ) بتبارك فيها في حالتين الخطوبه والجواز بس اكتر من كده شيل منقارك حاجات متخصكش
25_ مش عشان انت فاضى يبقى أي حد اونلاين فاضى زيك الفيس مش لعب بس
26_ اللايك معناها أن الكلام عجبك مش أن الشخص نفسه مالهاش معنى تانى (للمرتبطين والمسهوكين)
27_ صور لا تخرج قبل أن تقول سبحان الله انا هسألك سؤال انت ضميرك مرتاح وانت بتكتب كومنت في صورة انت متأكد انها مليون في الميه فوتوشوب
28_ مش لازم كل موجة تبقى محلل لها يعنى وقت ماتش تعمل نفسك شلبوكه ووقت سياسة تعمل نفسك عمرو اديب ارحمنا
29_ كون إنك أدمن بيدج دى حاجة بسيطة جدا انك عندك اكونت على الفيس مش معناها انك بقيت رئيس القبيله والفانز كلهم عبيد عندك
30 _الشاب الكيوت اللى بيعمل اكونت باسم بنت عشان يعرف يكلم بنات ليه تخبى طبيعتك عملية صغيرة وتبقى عدلات وتتكلم مع اخواتك براحتك وتلبس بلوزه شيفون وتحط روج
31_ البنت اللى تعمل اكونت تانى عشان تشوف خطيبها أو حبيبها هيرد ولا لا ريحى نفسك وبلاش نكد اكيد هيرد سيدنا يوسف مات يا حبيبتى
32_ لو أسمك مخيمر على اسم جدك دى حاجه مش عيب لكن لما تقول أن اسمك تامر تبقى كداب واهبل
33_لو صحيت ودخلت عند حد ليك ولاقيته عاملك ريموف عادى جدا متزعلش تلاقيه بيوسع مكان لناس جديده وانت كنت عامل زحمه
34_ عزيزى الطفل والطفله ذو ال 14 ربيعا مقدرين كلنا معاناتكم في الحب وضياع الشيكولاته منكم بس الفيس زى ماهو للأطفال هو للكبار اكتبوا بس خلى حد كبير جانبكم
35_ لما تلاقى بنت منزله حاجات حزينه مش معنى كده انك تعمل طبيب نفسانى وتسألها مالك ممكن تكون هي بتحب الحزن ومثلها الاعلى مصطفى كامل
36_عملتى عزومة أو اكلة جديدة وفرحانه مش عيب لكن مش لازم تصوريها الأول وتنزليها عشان نطلع الاختلافات أو نفك اللغز ونعرف اسم الاكل دى مش صفحه مطبخ
37_بره الفيس الاعاده فيها افاده لكن لما تفضل تنزل نفس البوست تلات اربع مرات وتقول ذكريات بتبقى عمال زى الخواجه اللى فلس وبيدور في دفاتره القديمه
38_ لما تتكلم مع بنت مرتين تلاته وتلاقيها بتضحك على هزارها معاك مش لازم تخضها وتقولها انا ايه بالنسبه لك يا هدى اكيد مش في غلاوه المرحومه ستها بلاش تبقى اوفر
39- على الفيس ياريت كل نوع يتصرف بطبيعته يعنى البنت تكون بنت والشاب شاب بلاش الجنس التالت ده وحياه ابوك
40- اتمنى الحاجات دى كلها تاخد بالك منها لأن في خاصيه جامده اوى كده اسمها بلوك دى معموله للكائن المتطفل اللزج
#قواعد_الادد_الأربعون