قدم الفنان فكري صادق اعتذارا لهند ابنة الفنان الراحل سعيد صالح على الهواء مباشرةً في برنامج «كلمة أخيرة». وقال فكري صادق: «أتقدم باعتذاري عن جميع تصريحاتي لحظة شيطان ولا وعي حصلت مني، وهو خطأ ومن كان منكم بلا خطيئة فليرمي الخطيئة بالحجر، وأنا زعلان جدا حتى أولادي ومراتي زعلانين مني وحقك عليا يا هند وأنا مش قليل، والشعب المصري يعرف أني على خلق وأتق الله ودي لحظة سيئة جدًا في حياتي». وردت هند سعيد صالح: «حضرتك قد أبويا وأنا عمري ما هخلي حد قد أبويا يعتذرلي، لكن حضرتك اللي حطيت نفسك في موقف زي ده». وتابع فكري صادق: «مش هدخل في تفاصيل لكني أتقدم بالاعتذار، وهجيلك لحد البيت وأعتذرلك، ودي أسوأ لحظة في ال 77 سنة اللي عشتها». تعلق هند سعيد صالح قائلة: «أنا قبلت الاعتذار لأني هيجي يوم وهطلب من كل الناس اللي زعلتها تسامحني، وأنا بس مستغربة مفيش مشاكل بينهم تخلي تصريحات زي دي تطلع، وكفاية اتصاله واعتذاره أمام الناس، وخلاص الموضوع انتهى، مش هندبح الناس».