بعد اعتذار شريف منير.. ابنة الفنان تتحدث عن أسباب «خناقتها» مع والدها: «أبويا جريء»

قرر الفنان شريف منير التصرف بشجاعة من أجل مصالحة ابنته، حيث اعتذر لها عبر مواقع التواصل الاجتماعي، دون اختيار التحدث بطريقة ودية فيما بينهما، ويعلن أنه بتلك الطريقة يسعى إلى مصالحتها عبر المشاركة بفيديو يحمل لقطات مُصورة تجمعهما.
وقال «منير» عبر «إنستجرام»: «أنا منزّل الكليب ده علشان بصالح أسما، بنتي وحبيبتي، لأني كنت مزعلها، متزعليش مني يا أسما، أنا فعلاً كنت بايخ»، وشارك الفنان بفيديو ويظهران سويًا باللقطات المُصورة واقتصرت مشاهد ثانية على صورها بمفردها.
في المقابل، ردت ابنته على كلماته وتقول عبر «إنستجرام»: «هي دي تقريبا علاقتي أنا وأبويا ناقر ونقير، أبويا برج الثور وأنا برج الحمل الاتنين طيبين بس سخنين ومتسرعين، عايزة أحكيلكم على موقف مهم جداً وأثر فيا.. أبويا عمل حاجة امبارح علمتني حاجات كتير أوي، للي مايعرفش كان في سوء تفاهم كده وكنت زعلت شوية منه».
وتابعت: «فجأه لقيته منزل ڤيديو عنده على الإنستجرام بيطيب خطري وبيقولي ماتزعليش قدام كل الناس، طبعاً أنا كنت طايرة من الفرحة ونسيت أصلاً أني كنت في يوم زعلانة لأنها حركة في منتهى الجمال والحنية والطيبة، وكمان علمتني كتير أوي وده اللي خلاني أحكي الموضوع».
واستكملت: «أولًا اتعلمت أن الاعتذار بيكبر الواحد جداً عمره ما يصغره، الكبرياء اللي يخلي حد فاكر أنه لو ماعتذرش هو كده جامد ده كلام فارغ، علمني أني لما أزعل بنتي اعتذرلها لو فعلاً غلطانة عشان عرفت قد إيه بيفرق في النفسية ومش عشان إحنا أهل يبقي مش وارد أننا نغلط، أبويا جريء وصادق واللي في قلبه على لسانه وأنا بحترمه وبحبه وبتعلم منه كل يوم».
واستكملت: «عامل معادلة صعبة وحقيقي خطيرة، مكس كده ما بين أنه صاحبي وأبويا، يعني ضحك وتهريج واحكيله كل حاجة بس وقت الجد عسكري واقفة قدام حضرة الظابط، ربنا يبعد عنا العين الوحشة ويباركلي فيه وفي عمره وأفضل اتعلم منه كل يوم وأفضل فخورة أنه أبويا العمر كله».
View this post on Instagram
A post shared by Asma sherif moneer (@asma.sherif.moneer)