تعليق ناري من شوبير بعد الهجوم على محمد صلاح بعد تغريدته عن الملكة إليزابيث

شن الإعلامي أحمد شوبير حارس مرمى منتخب مصر والنادي الأهلي السابق هجوما عنيفا على منتقدي محمد صلاح بعد التغريدة الأخيرة له التي قام فيها بتقديم التعزية في وفاة الملكة إليزابيث ملكة بريطانيا.
وقال أحمد شوبير في تصريحات إذاعية :«محمد صلاح أنا مبقتش الحقيقة فاهم الناس عايزة أيه منه.. حضراتكم طالبين أيه من محمد صلاح، محمد صلاح محدش له فضل عليه غير ربنا ومحمد صلاح نفسه، ولد مكافح شق طريقه راح لنادي مغمور اسمه عثماسون في طنطا كان مدربه كابتن مصطفى قرني اقتنع تماما بامكانياته ووداه للنادي الأم المقاولون العرب لإن عثماسون تابع للمقاولون العرب وهناك اهتموا بيه بشكل كبير خاصة كابتن حمدي نوح».
وتابع أحمد شوبير :«أنتوا سمعتوا كثير محمد صلاح وهو بيقص معاناته عشان يوصل وبعدما لمع في المقاولون العرب بدأ الأهلي والزمالك يكلموا عليه على استحياء بس محمد صلاح كان مؤمن إنه ممكن يكون حاجة كويسة وجاله عرض من نادي بازل وتم بيعه بمقابل كبير جدا في الوقت ده مقابل 2 مليون يورو ومن بازل بعد تألقه راح تشيلسي مع المدرب جوزيه مورينيو ولما مالعبش كثير مشي من تشيلسي راح فيورنتنا وتألق ومنه راح فريق روما ومنه إلى ليفربول ومحدش توقع له هذا النجاح الساحق وكلنا كنا فرحانيين به جدا».
وأضاف أحمد شوبير :«وبعد ذلك المدرب يورجن كلوب غير أسلوب محمد صلاح تماما وسرعان ما أصبح كتفه بكتف نجوم العالم الكبار قوي زي ميسي ورونالدو، وبعدها جدد محمد صلاح تعاقده مع ليفربول بعد ما كانت أكبر أندية العالم بتسعى خلفه وخلاص صلاح بقى نجم عالمي الناس بتتهافت على الظهور معاه».
وواصل شوبير منتقدًا بقوة مهاجمي صلاح: «حضرتك عليك إنك تفخر بمحمد صلاح إنما تفضل سانن السكينة لمحمد صلاح ده مرة اجوز مرة كان في الهيمالايا مرة كان في المالديف هو انت اللي صنعت تاريخه، سيبوه براحته».
أحمد شوبير: الكل سانن السكينة عشان محمد صلاح وهو وطني أكثر منكم كلكم
وأردف :«محمد صلاح كتب تعزية للمكلة إليزابيث دي حاجة ليها أكثر من معنى وأكثر من مفهوم ده مطلوب منه كلاعب محترف، إنت هيضيرك أيه ونقول أصل الإنجليز كانوا محتلين مصر، ياعم إنجلترا من أكثر الدول اللي مصر ليها علاقات معاها كلكوا ما شاء الله الوطنية واخدكم ودلوقتي جايين تفتكروا إن إنجلترا كانت محتلة مصر».
واختتم حارس الأهلي السابق :«اللي عملوه محمد صلاح عشان مصر أكثر 10 مليار مرة من كل اللي الناس اللي بتكتب دي، وعنده مواقف إنسانية ومواقف وطنية عظيمة وأنا بقول الكلام ده وما شوفتش محمد صلاح من 2019 يا أخي ده الأرجنتينين بيعملوا اللالي عشان ميسي، وبعد بطولة كوبا أمريكا شالوه فوق الراس وعملوا عمايل عشانه».
وأنهى حديثه موجهاً رسالة مهمة وقال :«محمد صلاح راجل عالمي يا جماعة مش كده حافطوا على الرموز احنا قدمنا 50 سنة عشان نشوف واحد زي صلاح تاني، محمد صلاح هو محمد صلاح واحد فقط مشرف الكرة المصرية والعربية».
تعليق ناري لشوبير على الهجوم الشديد الذي تعرض له محمد صلاح بعد تغريدته عن الملكة إليزابيثhttps://t.co/nDijEd7j14
— Ahmed Shobier (@ShobierOfficial) September 21, 2022