«مينفعش عشان مشتغلتش في النادي تولع الدنيا وتغير انتمائك».. شوبير يوجه رسائل نارية لأبناء الأهلي

وجه الإعلامى أحمد شوبير، رسائل نارية لنجوم النادى الأهلى السابقين، وذلك بعد هجومهم بعضهم على مجلس إدارة النادى برئاسة محمود الخطيب، فى الفترة الأخيرة.
وقال أحمد شوبير، في تصريحات تليفزيونية عبر فضائية «أون نايم سبورتس» :«بكل أمانة معظم جماهير الأهلي واقفة خلف ناديها.. الجديد إللي أنا شايفه دلوقتي واللي أنا مستغرب له، إن بعضًا من أبناء النادى الأهلى، متقدرش تقول غير إنهم من أبناء الأهلى، بدأت القصة غريبة شوية، أنا قولت قبل كده لا يمكن لنادى فى العالم إن كل اللاعيبة اللى لعبت فيه هتشتغل في النادى، يعنى مش لازم أنا اشتغل مدير كرة أو أكون عضو مجلس إدارة أو مشرف عام على الكرة».
وأضاف؛«مش لازم أنا كنت مديراً فنى في يوم من الأيام أرجع تانى مدير فنى، أو ماسك قطاع الناشئين أو الشباب أو مسؤول عن الأكاديميات أفضل موجود فيه طول العمر، سنة الحياة هى التدوير، مفيش حد بيقعد فى مكانه أبدًا لو دامت لغيرك ما وصلت إليك، الدنيا بتتغير وتطور»
وأشار :«محمود أبورجيلة، صانع أمجاد الزمالك، أدى دوره مع النادى، واعتزل التدريب، وعندما يتحدث عن الزمالك، يتحدث وكأنه المدير الفني للنادي، وغيره كتير جدًا من نجوم الأهلى».
وواصل: «الأمر زاد عن حده جدًا في الفترة الأخيرة، وأنا الحقيقة مش لاقيله سبب، هتهاجم الإدارة الحالية، مش عجباك، وماله هي مش لازم تعجب كل الناس أكيد عندهم أخطاء وأكيد بيقفوا على أخطاءهم وبيصلحوها ولكن مش معنى حضرتك متحطش في قطاع الناشئين تطلع تولع الدنيا، أو متحطش في جهاز الفريق الأول أو أي مكان أخر، تطلع تولع الدنيا».
وأوضح :«لو لأن هذا الهجوم، بسبب تراجع مستوى الأهلي وتكلم في جانب فني، لا توجد مشكلة، أنا بيعجبني جدًا محمد عامر، لما بيطلع يتكلم ويعجبنى رمضان السيد لما بيطلع يتكلم وماهر همام، على فكرة هما مبيشتغلوش في النادي، ولكنه أسماء كبيرة وأسماء عظيمة وعندهم انتماء للنادى بشكل كبير جدًا».
واسترسل: «من ينتمى لناديه ليس بحاجة إلى منصب وليس بحاجة إلى مكان داخل النادي، إذا كنت حضرتك ليك دور مع النادى، فلازم تتأكد بما لا يدع مجال للشك، أن النادي له الدور الأكبر مع كل واحد في أي نادي، أنا هنا بتكلم عن النادى الأهلي، أنا بفتكر بداياتى كنت جاى من طنطا عيل صغير، ولدى أحلام وطموحات وربنا أكرمني، ومنذ اعتزالى كرة القدم لم أعمل يومًا في النادى الأهلي، ومبسوط جدًا وراضي جدًا يمكن ربنا فتحلى مجالات تانية، أنا عاوز أقولك اللي أكتر من كده، أن النادي الأهلي، رفض اني أشتغل مدرب داخل النادي، عادي جدًا ولا فيها أي مشكلة، لم يتغير انتماءنا، لأن ده انتماء وإلا بقى تمثيل، ومعرفة مصلحة».
وأردف:«ويحزني أكتر إن ناس لما تكبر في السن وناس ليها احترامها عندي، فجأة تتغير القصة ويتغير الحال، لك خلاف مع رئيس النادي، لك مع مجلس إدارة النادي هذا حقك، وتعلن رأيك مفيش مشكلة، ولكن تغيير الانتماء! من وجهة نظري أمر صعب شوية، ده مش موضوع احتراف، هذا من وجهة نظري الشخصية».
وأكمل:«أنا شايف إن القصة بتتزايد، أنا كتبت من يومين لسان حال النادي الأهلى الآن، (اللهم احمنى من بعض أبنائى أما أعدائى فأنا كفيل بهم)».
وزاد:«عشان الناس تتلم تبدأ منك، أصل الأهلي محصلوش مصيبة.. يعنى من الأفاضل المحترمين اللي بيتكلموا دول خسروا دوري واتنين وتلاتة ورا بعض وخسروا افريقيا واتنين وتلاتة ورا بعض، وهذا عادي جدًا خاصة انك مش بتخسر أمام نادي صغير، ده نادي الزمالك، فأنت حضرتك مريت بنفس التجارب دي، وخسرت من فرق صغيرة وخسرت بطولات كانت في إيدك وحاجات كتيرة جدًا، فالأمر الحقيقة أنك تقول إن أنت صاحب فضل على النادى لا، النادى هو صاحب فضل عليك سواء كان نادي صغيراً أو كبيراً، النادى صنع اسمك وشهرتك وساهم في ثروتك وأموالك بوضوح أي نادى خصوصًا الأندية الكبرى، هي اللي غيرت من شكلك ومن طريقتك وأسلوبك ومعيشتك، أه فى ناس كانت ميسورة الحال، لكن قصة أنك كل يوم بنفس الشكل ونفس الطريقة والناس فجأة تلاقيك انقلبت 180 درجة الأمر بالنسبة إلى أنا مش عارف أحلله!».
وأوضح:«أنا أكثر واحد كنت ممكن أغضب ونقدت جدًا في الجانب الفنى والجانب الإدارى، ولكن الناس تشعر أنك حابب هذا المكان، ولما بتنقد لأنك بتحبه وعاوزه يكون حاجة كويسة، ولكن قصة تغيير الانتماء، ده امر صعب جدًا».
واختتم :«أتمنى إن الناس تعيد حساباتها مع نفسها، والنادى الأهلى أيضًا لو فى أخطاء مفيش ما يمنع أبذًا أنه يعيد الحسابات، أزعل جدًا لما حد من الكبار قبضه طالع لحد النهاردة ويطلع يتكلم بشكل مش لطيف ومش حلو عن النادي، هي القصة إن الأهلي خسر بطولة أو بطولتين، ده يا أخي الجمهور بيقولك على الحلوة والمرة معاه، فأتت اللى انتميت لهذا النادى أول ما تيجي المرة بتدور ضهرك، بل أكتر من كدة بتبقى كأنك معاك كرباج وشغال ضرب بيه، هذا الأمر غريب بالنسبة لي.. أرجو وأتمنى أن الكل يراجع حساباته داخل مجلس إدارة الأهلي ونجوم الأهلي القدامى واللاعبين اللي اعتزلوا من قريب، والناس اللي نفسها تكون موجودة في النادي الأهلي، وهذا شئ جميل، ولكن الأهلي عنده كام مكان أو الزمالك عنده كام مكان والالتزامات والارتباطات الكثيرة موجودة أنا لا أدافع عن مجلس إدارة أنا بتكلم عن فكرة كيان، أنت تنتمى إليه حافظ على هذا الانتماء، حتى تظل دائمًا وأبدًا موضع احتراما، خصوصًا كلكم كان لكم دور كبير جدًا في انتصارات النادي الأهلي وتاريخه، ولكن النادي الأهلي هو من صنع الجميع بداية من نجومه الكبار العظام وصولًا بالأشبال اللى بنتغني بيهم دلوقتي.. هذه رسالة كنت حابب أقولها بمنتهى الهدوء والاحترام أرجو أن تصل للجميع»