والدة ضحية حادث «كورنيش حلوان»: «كلمني قبل وفاته بساعة وكأنه بيودعني» (فيديو وصور)

«هحزن قلب أمك عليك».. رددها «محمد.أ»، سائق ميكروباص على مسامع يوسف ياسر، طالب جامعى، أثناء قيادته «موتوسيكل» على الكورنيش بحلوان، وتبع تهديده بقوله: «هكسر عليك واقلبك»، ليفزع مستقلو سيارة الأجرة ويقولوا للسائق: «حرام عليك دا سايق على الهوا»، لكنهم فوجئوا ب«يوسف سايح في دمه»، والسائق يلوذ بالفرار ثم سلم نفسه لقسم الشرطة.
«كأنه بيودعني»
مأساة روتها هند محمد، والدة «يوسف» صاحب ال22 ربيعًا، وتذكر تفاصيلها الحزينة: «ابنى اتصل علىّ قبل الحادثة بساعة، وهو راجع بيطلب منىّ نتعشى سوا، لكنه مرجعش.. وكان بيكلمنى وكأنه بيودعنى»، تجفف دموعها وتكمل: «قاللى راجع ومرجعش تانى»، متابعة: «ياريته كان كسر له رجل ولا إيد، كان ساب ليا حاجة فيه يمكن نعالجه، خده منّى ليه؟.. أنا كنت عاوزاه يفضل جنبى».
حدس الأم جعلها تجيب على اتصالات من أرقام غريبة، وفق كلامها: «حاجة غريبة خلتنى أرد، لقيت المُسعف وأصحاب ابنى بيقولوا: يوسف عمل حادثة وإحنا رايحين مستشفى قصر العينى».
هال الأم منظر ابنها بغرفة المستشفى: «لقيت وشه منفوخ، وملامحه كلها ضايعة، والطبيب قاللىّ: نسبة إفاقة ابنك 4%، وبعدين قال: الولد قدامه 48 ساعة وهيموت».
«أول فرحتى وابنى الكبير وصاحبى وأبويا»
«هند» وسط نحيبها تشرح أن «يوسف كان عنده تهتك في المخ وكسر في الجمجمة والعمود الفقرى، وكان الأطباء واضعينه على جهاز التنفس الاصطناعى وأول ما يشيلوا الجهاز يفرفر».
كان منظر الطالب الجامعى داخل غرفة المستشفى مختلف عن بقية المرضى، تصفُ الأم ذلك فتقول إن الأطباء خلعوا عنه ملابسه، ووضعوا شريطًا لاصقًا على رقبته بتاريخ ووقت استقباله، و«لقيت أجهزة عمالة تصفر فجأة، وفى الآخر لقيت كل الورم اللى في وجهه كله راح، ورجع شكله كأنه في الإعدادية زى القمر، ولقيت رِجله متلجة وكان ميت وأنا جنبه وأنا معرفش».
منذ ذلك الحين والأم تبحث عن ابنها في كل أرجاء شقتها، وتتصل على هاتفه وتنتظر موعد مجيئه من عمله بأحد المطاعم، لكنه لم يأت أبدًا، تصرخ: «خلاص يوسف راح، دا أول فرحتى وابنى الكبير وصاحبى وأبويا، أول من نادانى بماما.. وأول ما إيدى شالت». وتسترجع تفاصيل الحادثة وتحكى ما قاله شهود العيان بتحقيقات النيابة العامة، أن السائق قال لابنها: «هحزّن أمك عليك»، تقول الأم: «فعلًا حزّنّى عليه.. ابنى راح.. وأهل المتهم باستفزاز كانوا عاوزين يتفاوضوا معانا، وابنهم عايش حياته وابننا دفناه.. والسائق المتهم كان سايق بدون رخصة».
«ماشى ورايا ومشغل النور العالى وعمال يضايقنى وأنا سايق»
والدة «يوسف» تنتابها حالة غضب، توجه كلامها للسائق المتهم: «كنت سبته، أنا كنت عايزاه، خلاص دنيتى راحت»، مطالبة بإحالة السائق للمحاكمة الجنائية والقصاص القانونى.
أحد شهود العيان قال في تحقيقات النيابة العامة: «كنت راكب الميكروباص، وإحنا ماشيين، فوجئت بالسائق بيتكلم مع الضحية وهو راكب الموتوسيكل، والسائق يقول له: بلاش بدل ما أرمى عليك وأوقعك.. والناس في الميكروباص قعدوا يقولوا للمتهم: بلاش دا غلط وممكن يقع».. وفجأة لقيناه حدف عليه تانى ووقعه، وسائق الموتوسيكل كان بيقول له: «أنا معملتلكش حاجة».
المتهم قال في التحقيقات: «أنا رخصتى ضايعة، وكنت هطلع بدل فاقد، واللى حصل كنت ماشى بالميكروباص اللى بشتغل عليه أنا وأبويا على الكورنيش، وفوجئت بواحد راكب موتوسيكل ماشى ورايا ومشغل النور العالى وعمال يضايقنى وأنا سايق، رحت خليته يعدى جنبى وعاتبته، وأثناء حديثنا عدّت سيارة أخرى فاختل توازنه وخبط بعربيتى ولقيته سايح في دمه، ومن الخوف استخبيت.. ولما هديت روحت القسم أسلم نفسى».