رحمة حسن تتعرض للعض من «جيرمن شيبرد»..الجرح بينزف وأنا خايفة ومصدومة

كشفت الفنانة رحمة حسن عن تعرضها لهجوم من كلب شرس، حيث قام بعضها في منطقة حساسة ونقلت إلى المستشفى.
وأوضحت حسن، تفاصيل الواقعة من خلال منشور عبر حسابها على «إنستجرام»، قالت فيه: «امبارح الساعة 11 بليل كنت نازلة أجيب حاجة من السوبر ماركت جمب البيت، كنت ماشية على الرصيف وكان في عربية بتركن جمبي عادي، فجأة الباب اتفتح ولقيت كلب جيرمن شيبرد بيهجم علي بكل قوته».
وتابعت: «طبعا حاولت أجري لكن للأسف الكلب كان قوي وشرس ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقة حساسة».
وأضافت: «صاحبة الكلب كتر خيرها أخذتني فورا على مستشفى إمبابة، أدوني حقنة تطعيم الكلب ولسه فاضل لي 4 هاخدهم خلال شهر، بس المشكلة إن من إمبارح الجرح بينزف دم كتير، وأنا طبعا خايفة ومصدومة وتعبانة وعندي تروما من إمبارح واللي واجعني أكتر أني مَش عارفه اتصرف إزاي، خصوصا أني أكيد مَش عايزة الكلب يتئذي، بس كمان مَش عايزة أي إنسان كمان يتئذي ويتعض ويتبهدل في الشارع زيي».
وأكدت رحمة حسن أنها اعتادت رؤية صاحبة الكلب وهي تنزهه، وكانت تتجنبه، موضحة: «أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه، إمبارح صاحبة الكلب قالت لي متخافيش هو عض ولادي قبل كدة وتمام محصلش حاجة».
وقالت: «طبعا أنا اتصدمت لما عرفت أنها مَش أول مرة الكلب يعض حد ومع ذلك هي سايباه عادي في الشارع من غير كمامة أو حد قوي يمسكه، بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسؤول مسؤولية كاملة عنه ويحاسب على إهمال مسؤوليته، خصوصا لو إهماله تسبب لشخص تاني في أذى بدني يحتاج أكتر من 21 يوم علاج وأذى نفسي ماعرفش هايحتاج قد إيه عشان يخف».
وأوضحت: «أنا كنت بحب أنزل أحط أكل ومياه للكلاب والقطط تحت البيت، دلوقتي أنا حقيقي مرعوبة أقرب منهم وخايفة جدا»، مضيفة: «أنا أسفة طولت عليكم بس أنا بجد مَش عارفة المفروض أعمل إيه عشان محدش تاني يتأذي».
View this post on Instagram
A post shared by Ru (@realrahmahassan)