كشفت الفنانة الشابة رحمة أحمد عن تعرضها لموقف محرج وصعب بعدما هاجمها أحد الكلاب الشرسة في الشارع، وقام بعضها في منطقة حساسة بجسدها.
وروت "رحمة"، عبر حسابها على "إنستجرام"، تفاصيل الموقف الذي تعرضت له مساء أمس ونُقلت على إثره إلى المستشفى، قائلة: "امبارح الساعة 11 بليل كنت نازلة أجيب حاجة من السوبر ماركت جنب البيت، وكنت ماشية على الرصيف، وكان في عربية بتركن جنبي عادي، فجأة الباب اتفتح ولقيت كلب (جيرمن شيبرد) تقريبًا مَش متأكدة أوي، بيهجم عليه بكل قوته، طبعًا حاولت أجري لكن للأسف الكلب كان قوي وشرس ووقعني على الأرض".
واستكملت: "حاولت أقوم واجري وصاحبته حاولت تشده، بس فك الليش بتاعه وعضني عضه كبيرة وغويطة بنابه في منطقة حساسة".
وتابعت: "صاحبة الكلب كتر خيرها أخذتني فورًا على مستشفي امبابة، ادوني حقنة تطعيم الكلب ولسه فاضلي 4 هاخدهم خلال شهر، بس المشكلة إن من امبارح الجرح بينزف دم كتير، وأنا طبعًا خايفة ومصدومة، و تعبانة وعندي تروما من امبارح، واللي واجعني أكتر اني مَش عارفه اتصرف ازاي، خصوصًا إني أكيد مَش عايزه الكلب يتأذي، بس كمان مَش عايزة أي إنسان كمان يتأذي ويتعض ويتبهدل في الشارع زيي".
وأردفت "رحمة" قائلة: "أنا كنت بشوف الكلب ده دائمًا مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه".
واستطرد: "امبارح صاحبة الكلب قالتلي متخافيش هو عض ولادي قبل كدا وتمام محصلش حاجه! طبعا أنا اتصدمت لما عرفت إنها مَش أول مرة الكلب يعض حد، ومع ذلك هي سايباه عادي في الشارع من غير كمامة أو حد قوي يمسكه.. بجد حرام عليكم".
وقالت إن "الكلب لما بيكون حجمه كبير وشرس بيعتبر سلاح، وصاحبه مسؤول مسؤولية كاملة عنه، ويُحاسب على إهمال مسؤليته، خصوصًا لو إهماله تسبب لشخص تاني في أذى بدني يحتاج أكتر من 21 يوم علاج وأذي نفسي ماعرفش هيحتاج قد ايه عشان يخف".
وأضافت: "أنا كنت بحب انزل احط أكل ومايه للكلاب والقطط تحت البيت، دلوقتي أنا حقيقي مرعوبة أقرب منهم وخايفة جدًا".
واختتمت: "أنا أسفة طولت عليكم أنا بجد مَش عارفه المفروض اعمل ايه عشان محدش تاني يتأذي".

View this post on Instagram

A post shared by Ru (@realrahmahassan)
DMCA
PROTECTED