"امبارح كانت آخر حقنة ليّا".. رحمة حسن تكشف تطورات تعرضها ل"عضة كلب"

كشفت الفنانة رحمة حسن، عن تطورات جديدة بعد تعرضها لعضة كلب شرس منذ نحو شهر.
وكتبت رحمة، عبر حسابها بموقع "إنستجرام": "للأسف إحنا عملنا اللي علينا ومحصلش أي جديد بخصوص الكلب، وكل شوية تأجيل تأجيل، بداية بإن مفيش مكان عاوز يقبل الكلب لأن سنه 4 سنين ونص، لحد آه إن شاء الله بعد العيد نبقى نجيبله مدرب البيت بس لسه مش عارفين امتى".
أضافت: "حبيب بس أشارك معاكم اللي حصل، امبارح كانت آخر حقنة ليّا، وطبعا بعدها تعبانة لمدة يومين ومن أسبوعين فاتوا، بعد الحقنة الرابعة دخلت المستشفى بالليل لأني كنت تعبانة جدا بعدها، لو الكلب كان مدرب أو عارف أن مينفعش يهجم على إنسان من الأول مكنش كل ده حصل، وللأسف مفيش مسئولية".
وكانت الفنانة الشابة رحمة حسن، كشفت يوم 7 يونيو الماضي، عن تعرضها لهجوم كلب ضخم عليها وقيامه بعضها، وكتبت عبر حسابها على "إنستجرام": "كنت نازلة أجيب حاجة من السوبر ماركت جمب البيت، كنت ماشية على الرصيف وكان في عربية بتركن جمبي عادي، فجأة الباب اتفتح ولقيت كلب جيرمن شيبرد بيهجم عليه بكل قوته، طبعا حاولت أجري لكن للأسف الكلب كان قوي وشرس ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقة حساسة".
وأضافت: "صاحبة الكلب كتر خيرها أخذتني فورا على مستشفى إمبابة، ادوني حقنة تطعيم الكلب ولسه فاضل لي 4 هاخدهم خلال شهر، بس المشكلة أن من امبارح الجرح بينزف دم كتير، وأنا طبعا خايفة ومصدومة وتعبانة وعندي تروما من امبارح واللي واجعني أكتر أني مَش عارفة أتصرف إزاي، خصوصا أني أكيد مَش عايزة الكلب يتأذي، بس كمان مَش عايزة أي إنسان كمان يتأذي ويتعض ويتبهدل في الشارع زيي".
تابعت: "أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بمشي بعيد عنه لما بشوفه، امبارح صاحبة الكلب قالت لي متخافيش هو عض ولادي قبل كدا وتمام محصلش حاجة، طبعا أنا اتصدمت لما عرفت أنها مش أول مرة الكلب يعض حد، ومع ذلك هي سايباه عادي في الشارع من غير كمامة أو حد قوي يمسكه، بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسئول مسؤلية كاملة عنه ويحاسب علي إهمال مسؤليته، خصوصا لو إهماله تسبب لشخص تاني في أذى بدني يحتاج أكتر من 21 يوم علاج، وأذى نفسي ماعرفش هايحتاج قد إيه عشان يخف".
واختتمت: "أنا كنت بحب أنزل أحط أكل ومياه للكلاب والقطط تحت البيت، دلوقتي أنا حقيقي مرعوبة أقرب منهم وخايفة جدا.. أنا أسفة طولت عليكم بس أنا بجد مَش عارفة المفروض أعمل إيه عشان محدش تاني يتأذي".
View this post on Instagram
A post shared by Ru (@realrahmahassan)