أحمد مدين يكتب: «بإيه قدّروك» (شعر)

بإيه قدّروك ؟!
شعر - أحمد مدين
بعد سنين عمل ..
حزن ومشقة وأمل..
بعد سنين كفاح
جاى تقول إيه العمل ؟!
بإيه قدروك يا جمل ،،
وعود وحكايات
تملا مشنة وأكتر ..
و تدلق العمر اللى فات
و اللى شال هيصبر ..
و اللى صدّق زيّنا
كان غيرك يا حبيبى أشطر
كان نفع نفسه وعمل ..
بإيه قدروك يا جمل ،،
*
مين فيهم جالك ؟!
طيّب خاطرك بكلمتين
شافك.. قال أنت فين ؟
أنت موجود ولا مجهول
و لا مين ؟!
هل تسوى أصلًا كلمتين ؟!
هل تسوى شئ يبقاله قيمة ؟!
هما شافوا فيك ..
و نزعوا أجمل شئ ماليك
و زرعوا جواك الملل ،،
بإيه قدروك يا جمل ،،
تفرق فإيه إن كنت راضى
أو طال سكاتك !!
تفرق فإيه إن هُنت عادى ..
أصلاً ده قبلك ،فيه كتير وزيك
هانوا برده ومشيوا عادى
بدون سلام،
بدون كلام،
بدون زِلل ،،
بإيه قدروك يا جمل ،،
مابقتش فارقه
لو فضّلوك، أو ودعوك
مين جالك فيهم يوم سأل ؟!
*
بإيه قدروك ،،
رميت تحت نعالهم رقبتك ..
طاطيت وإنحنيت وإتجازيت
مين اللى حاشلك ؟!
مين دافِعلك، مين وقِفلك
مين اللى فاكرك ؟!
يوم ما جالك ظرف حالِك ..
يوم ما حالك هو جالك وإشتكالك
يوم ما قضّيت إرتجالك
وحيد ولا حد جالك..
و لا حد سألك إزاى حالك ؟!
و لا فرقت همومك وإنشغالك
و اللى صابك واللى سابك ،
هل ده صابك.. قام ف صادك ؟!
و لا صادك يوم ما صابك ؟!
و لا أنت مين أصلا جنابك
لا فارق صمتك من كلامك!!
و لا حد حبك ولا حد عابك
و لا حد نفسه تنول مرادك
كله سابك وتركوا فيك بس
العِلل !!
بإيه قدروك يا جمل