مالك عدلي: «الشهيد الحي» للثورة يفيق من غيبوبته بعد 5 سنوات

قال المحامي مالك عدلي أنه زار معوض عادل معوض الملقب ب«الشهيد الحي» في لندن، مشيرًا إلى أنه أفاق من الغيبوبة.
وكتب «عدلي»، عبر صفحته الشخصية بموقع «فيس بوك»: «أنا هكتب كلمتين أرجو ماحدش يعتبرهم مزايدة ولا إساءة وأرجو ماحدش يعلق عندي عليهم بس هما للأسف كلمتين لو ماقلتهمش هطق.
أضاف: النهارده بترتيب ربنا وجدعنة Azza Ahmed Zaki Hassan الست الأصيلة الكريمة الجدعة قدرت أزور واحد من أسيادنا وتيجان رءوسنا معوض عادل الملقب بالشهيد الحي اللي اتصاب برصاصة في المخ في أحداث محمد محمود ومن يومها وهوا في غيبوبة.. وبعد الدولة ما رفضت علاجه باعتباره مصاب ثورة واترفعت قضية كسبها أهل معوض اتنقل معوض للعلاج في مستشفى متخصصة في الحالات اللي زي حالته في إنجلترا».
وأضاف: «معوض في مستشفى تبعد عن لندن ساعة ونص بالعربية.. رحت وأنا مش عارف إيه ممكن أحس بيه أو يحصللي بس دا عيل من عيالنا ولازم هشوفه يعني هشوفه.. مستشفى بسيطة معوض فيها في غرفة بسيطة على جهاز تنفس صناعي وأجهزة تانية.. شاب زي القمر تكوينه الجسماني يشي بأنه صاحب جسم قوي.. أبيضاني وشعره ناعم وعينيه بنية نايم على سرير أبيض مابيتحركش بس بيشوف وبيسمع والنهارده الممرضة حكت لأخوه أنه ضحك لما حاولت تهزر معاه وساعات بيحس لما حد يلمسه.. معوض في غيبوبة من نوفمبر 2011 وبره دنيانا خالص.. عزة ومصطفى وعلي كانوا كرماء وسابوني أدخله لوحدي.. يا ربي معوض بيبصلي ونايم قدامي.. هقوله إيه ؟ إزيك يا معوض أنا اسمي مالك واحد يعرفك وبيحبك وجاي من مصر يطمن عليك.. شد حيلك يا بطل.. فيه ناس كتير بيسلموا عليك.. معوض مركز معايا بعينيه.. ابتديت أقوله أسامي على بالي دايما بيسألوا عنه.. شد حيلك يا معوض إحنا كلنا مستنيينك تقوملنا بالسلامة علشان نكمل اللي بدأناه سوا.. بعد الجملة دي تاه كل الكلام من لساني وسرحت في عينيه.. يا ربي أقوله إيه؟ إننا تحت إيدين عالم... مبهدلينا؟ وإن مافيش حاجة اتغيرت وإن رقدته دي ببلاش؟ أحكيله عاللي حصل وبيحصلنا وفينا؟ ماقدرتش أنطق.. بوست دماغه تاني وإيديه ورجليه وخرجت الدنيا مغيمة في وشي ومش شايف».
وتابع: «اللي صدمني كمان إني عرفت إن محدش بيزور معوض غير عدد قليل جدا من الناس في حين إني أعرف ناس كتير ليهم رجل على هناك وناس أصلا عايشة هناك ومنهم كتير ظروفهم تسمح وكلهم بيتغنوا بالثورة والشهداء والمصابين بس ماحدش فكر يزوره ولا يطمن عليه ويشوفه ويشوف عينيه ويفتكر إحنا كنا فين وبقينا فين.. بالذمة إحنا نستاهل أي توفيق ؟ أنا غضبان قوي وزعلان من كل حد يقدر يروح يزور معوض ومراحش وكل حد نسي معوض وكل حد فاكره ومابيدعيلوش وكل حد نسي معوض نايم على سرير بقاله نحو خمس سنين ليه.. وغضبان من نفسي ومن الدنيا كلها.. العيال دي تستاهل مننا كده؟ يا رب اشفي معوض وفرح قلب أمه وأخوه الجدع مصطفى وقلوبنا ووفقنا يبقي فيه حاجة حلوة نقدر نقولها لمعوض لما يقوملنا بالسلامة».
يذكر أن معوض دخل في غيبوبة منذ أحداث محمد محمود الأولى 20 نوفمبر 2011 نتيجة طلق ناري بالرأس.