«الديهي» و «الباز» يهاجمان إيمان البحر درويش بسبب «تحلية المياه»: «كلامه فارغ»

هاجم المذيع نشات الديهي، الفنان إيمان البحر درويش، عقب مهاجمة الأخير لمشروع تحلية مياه البحر الذي تقوم به مصر.
وقال «الديهي» خلال برنامجه «بالورقة والقلم» على قناة TeN T، الخميس، إن «إيمان البحر درويش عمال يتكلم على تحلية مياه البحر وبيسخر..هو راجل فنان، مطرب عظيم أو مش عظيم معرفش تقييم الناس. لكن أنا بسأل إيمان البحر درويش إنت إيه اللي بتفهمه في السياسة وفي تحلية مياه البحر، ما علاقة الفن والموسيقى بتحلية مياه البحر؟»
وأضاف: «إنت بتسخر وبتتريق على تحلية مياه البحر، وبتقول علينا إعلام العار. والله أنا مقدرش أقول له إنت فنان فن العار لإني مؤدب ومتربي. لكن بقول لك يا أستاذ إيمان إنت مش فاهم حاجة، ولا يجب عليك تتكلم فيما لا تفهمه».
وأكمل حديثه: «أنت فشلت في الغناء وأن تكون إنسان مثقف، جاي تسخر من الدولة والإعلام المصري ولا تفهم يعني أيه دولة ولا يعني إيه تحلية مياه البحر، أنت اللي عار لما تتكلم في حاجة مش فاهمها، أنت رجل لا تفهم وقليل المعرفة والعلم».
وتابع: «والله العظيم عيب، أنت قاعد فاضي عمال يتكلم، أي حد مسموح ليه يتكلم، هو علشان اسمه ايمان البحر شايف ان البحر ملكه وبتاعه وخايف عليه».
ومن جانبه، علق الكاتب محمد الباز على تصريحات إيمان البحر درويش، وقال عبر حسابه على فيس بوك: «ايه مشكلة ايمان البحر درويش؟ من زمان على فكرة وايمان البحر درويش فقد صلاحيته الفنية، ومن زمان كمان فقد صلاحيته العقلية».
وأكمل: «ومن زمان برضه بيحاول يدور على أي طريقة يفضل بيها تحت الأضواء، وتقريبا لما بقى مفيش فايدة من الهجوم على زملاءه من الفنانين، قال يبقى خلاص نهاجم الرئيس والجيش.».
واضاف: «كتب ايمان البحر كلام فارغ زى دماغه عن موضوع سد النهضة، ولو قلت لى إننا بنروج لكلامه وبنخلى الناس تقراه، هاقول لك مفيش مشكلة يا ريت الناس تقرأ كلامه عشان يتأكدوا إنه عايش بره الزمن، الكلام اللى قاله درويش مش بس بيأكد أنه جاهل باللى بيحصل حواليه، لا ده مغيب تماما، ولو فيه نصيحة رغم ان النصيحة خسارة فيه، هاقول له: اركن شوية على جنب، محدش فاضى لك فعلا».