سلامة عقلك

المكتب علي . يبقي أنا قصرت . قزازة المية الفاضية علي المكتب مدلوقة زي القتيل . واللا انا اللي فضيت؟ الريكوردر ساكت . بقي له قد إيه ساكت؟ الريكوردر مرشوش بمبيد ضد الحشرات . من إمتي كانت المزيكا حشرة؟
النهارده الصبح صحيت ناسي ان النهارده الصبح صبح أو إنه النهارده الصبح .
مشيت حافي ع السجادة دخلت في رجلي قصيدة , وجعتني . قعدت ع السرير ونزعتها من القدم الحافي , نزف كلام
كلام .. زي النهر , بيزق بعضه نحو هدف هو مش عارفه , بس الخريطة عارفاه , الخريطة واللي رسمها , واللي بياخدوها في المدارس , حتي الفلاحين اللي بيزرعوا الأرض عارفين .. آخرة النهر بحر , بياخده بالأحضان ويغرقه .
برضه الكلام بيبقي مش عارف الكلمة بعد الكلمة ح تاخذه لفين . للمجد؟ للسجن؟ لأحضان الحبيبة؟ لمستشفي الأمراض العقلية؟ لجوابات تهديد؟ لمقالات نقدية لاذعة أو فرحانة؟ لابتسامات استغراب أو سخرية أو استمتاع ؟ لهزة الرأس رأسيا أو هزة الرأس أفقيا؟ شمال يمين فوق تحت وضع ثابت .. مين يعرف؟ تكشيرات تبريقات كركعات تتنيحات .. أو حركات معناها : أما والله العظيم ..
لكن في النهاية الكلام بيزق بعضه في اتجاه ومصب . هنا مثلا : الكلام بيتكلم عن نفسه .. حلوة دي؟ ودي حيلة قديمة عشان الواحد بيتكلم وخلاص ومايهموش اذا كان الناس فاهمة واللا مش ..
مش فارقة . تخيل حضرتك كل الكلام اللي بيتقال . قد إيه منه في المليان .
لو تأملت كمية الكلام الفاضي اللي بيتهيأ له انه مليان أو الفاضي اللي مش واخد باله انه بالونات صابون , أو المليان زيادة عن اللزوم بتقل الدم , ولو غربلت كل الكلام اللي بيقول ان له معني , ح تلاقي في الغربال قصيدتين تلاتة , مقالتين تلاتة , كلمتين حب نصيحتين , قرارين ثلاثة .. والباقي قلب دماغ ودوشة مخ .
إذن لما نهر الكلام ينساب من غير ما يتأمل نفسه ويحاول يفلسف نفسه , ويخترع هدف هو ح يكتشف بنفسه انه كان وهم أو فكرة تافهة , لما الكلام يعترف انه لا يدعي الحكمة , وانه مش كلام كبير . وانه مش مهتم يطلع منطق ما يطلع , المهم يطلع .. زي الشجر , هو طلوع الشجر له منطق؟ هبة الريح منطقية؟
زقزقة العصافير , صياح الديك , سقفة القرد علي باطاته لها حكمة؟
القزازة الفاضية المرمية علي المكتب , بتقول انا فعلا فاضية , كان لي وظيفة وانتهت .
وكان لي معني ما بقاش . وماليش مبرر وجود . وماليش هدف . ولو عايزين ترموني أرموني . المسألة ف إيدكم . وانا مش عارف ليه مش عايز امد إيدي وارميها في سلة المهملات .
حزر انت وفزر السبب .
حزر انت وفزر السبب
حزر انت وفزر الأسباب
إيه سبب .. إن العجوزة شباب
وان العريس في الزفة له قتب
حزر انت وفزر
اوزن انت وقدر
وإن زهقت يا شاطر
خد قصيرها وهزر
{{{
الكلام الفارغ
بالحكم مليان
والقزازة الفاضية
تسقي مرة كمان
تروي مرة كمان
عطشانين يازمان
عطشانين للرغبة
عطشانين للعطش
عطشانين للشوق
عطشانين للبرد
عطشانين للجوع
عطشانين للمعني
عطشانين للعبث
عطشانين للجنون
عطشانين للشباب
فضها شيخوخة
فين شباب الخوخة
فين صبا التفاحة
فينه شوك البامية
عملة العصفورة
علي راس النايم
او هدوم النايمة
أو فطار العيلة
والشجر ضليلة
والسرير ليل أخضر
والمخدة نجيلة
بالندي مبلولة
والزمن متوقف
عند سبعة الصبح
حزر انت وفزر
ليه علي مكتبي
ليه سريري أصغر
من سرير الدمية
من قرون البامية
زي حلم صغير
نام في قشرة جوز
أو كعقلة إصبع
جده كان أراجوز
وف غروب المدفع
القلوب عطشانة
الأمم عطشانة
الوجود عطشان
في الصيام الأطول
من صيام رمضان
سيب القزازة المقلوبة وقوم من ع المكتب , صلي لك ركعتين . ياللا سلي صيامك .. بالعطش للحب .
املا القزازة الفاضية . املا الزمزمية . املا القربة واسقي الناس مية غير اللي في المواسير .
الكلام بيزق بعضه في اتجاه ومصب .. وما كانش يتخيل ولا انا إنه ح ينتهي .
بتسبيح وجو رمضان . المية جابت المية .. المية العدمية ( قزازة المية الفاضية المقلوبة علي وشها ) إلي المية الصوفية اللي بتبتدي بالعطش للحب ثم السقاية حتي الارتواء وذلك قبل موعد مدفع الافطار . وبعد ما الواحد يتملي يصبح هو نفسه سقا , يسقي القلوب الفاضية , بمية سلسبيل , أحلي من مية المواسير , والتطورات الأخيرة لمية النيل .
والمكتب اللي علي علي عشان الواحد عند نقطة معينة بيبتدي يكش , من واحد لتلات أربع , لنص , لربع , لحد ما سريره يبقي سرير دمية , أو مهد وليد كركوب , إيه يعني؟ .. مش مهم .. لو فيه سلام في القلب .. مش مهم الجسم شكله إيه .. ومش مهم حتي العقل أخباره إيه .