تامر حسني يساند رامي جمال: «مايكل چاكسون جاله نفس اللي جالك»

ساند النجم تامر حسني الفنان رامي جمال، بعد إعلان إصابته بمرض البهاق منذ عام، قائلًا: «إلى الفنان الكبير والصديق الحقيقي والمحترم رامي جمال يا حبيبي انت فنان كبير ومحبوب وليك قيمتك وكل الناس بتحبك ومفيش حاجه هتعطلك عن نجاحك».
ونشر حسني صورة تجمعه برامي جمال مرفقة بصورة من خبر إعلانه عن مرضه، عبر حسابه الرسمي على موقع التواصل الاجتماعي «فيسبوك»، وقال: «تعبك دا لاهو مؤذي ولا مُعدي وكل الناس جواها تعب في منه اللي ظاهر وفي منه اللي مش ظاهر».
وتابع: «حتى لو كان تعب نفسي أو مادي كل شخص جواه وجع من حاجه معينة المهم اننا نبص ونتعلم من اللي ظروفهم اصعب مننا ورغم كدا عندهم صبر وبينجحوا في الاختبار وبيقولوا الحمدلله ومكملين وعندهم إراده وبينجحوا اكتر من الأول».
وطالبه بتكملة مشواره الفني والابتعاد عن أي مخاوف تتعلق بالمرض قائلًا: «لازم تكمل نجاح يا رامي وشيل أي هلاوس من دماغك واوعى تخبي نفسك اللي بيحبك بيحبك لشخصك وفنك صدقني دي حاجة عادية يا رامي والله ملهاش أي تأثير لا عليك ولا على جمهورك بالعكس بقى انت اكيد شايف الناس كلها طيبين ازاي ونفسهم يفرحوك».
وأشار حسني إلى النجم العالمي مايكل جاكسون الذي أصيب بنفس المرض «وبعدين افتكر ان مايكل چاكسون جاله نفس اللي جالك وبقى اسطوره مبتتكررش خاااااص وانت فنان وعارف ...انا واثق انك مؤمن وبتحمد ربنا وهتقوم وهتكمل وهفكرك قدام كل الناس اللي شايفه كلامي انك هتنجح اكتر واكتر وربنا هيكرمك اجمل كرم وهتشوف قريب».
كانت التعليقات قد انهالت على رامي جمال فور نشر رسالته على حسابه بموقع انستجرام، ومن قبل المتابعين والفنانين الذين ساندوه، ومن بينهم حمدي الميرغني، ولطيفة، وإيمان العاصي، ومقدم البرامج خليل جمال.