تامر حسني لرامي جمال: مايكل جاكسون جاله مرضك نفسه وبقى أسطوره مبتتكررش

حرص الفنان تامر حسني على دعم صديقة المطرب رامي جمال، عبر صفحته الرسمية بموقع التواصل الاجتماعي "فيسبوك"، بعد الكشف عن إصابته بمرض البهاق الذي أثر بشكل كبير على حالته النفسية، ودفعه إلى التفكير في الاعتزال.
نشر حسني صورة جمعته ب"رامي"، وعلق عليها قائلًا: "إلى الفنان الكبير والصديق الحقيقي والمحترم رامي جمال، يا حبيبي انت فنان كبير ومحبوب وليك قيمتك وكل الناس بتحبك ومفيش حاجة هتعطلك عن نجاحك.. وتعبك دا لا هو مؤذي ولا مُعدي وكل الناس جواها تعب في منه اللي ظاهر وفي منه اللي مش ظاهر حتى لو كان تعب نفسي أو مادي
كل شخص جواه وجع من حاجة معينة، المهم إننا نبص ونتعلم من اللي ظروفهم أصعب مننا ورغم كدا عندهم صبر وبينجحوا في الاختبار وبيقولوا الحمدلله ومكملين وعندهم إرادة وبينجحوا أكتر من الأول".
وتابع: "لازم تكمل نجاح يا رامي و شيل أي هلاوس من دماغك وأوعى تخبي نفسك، اللي بيحبك بيحبك لشخصك وفنك، صدقني دي حاجة عادية يا رامي والله ملهاش أي تأثير لا عليك ولا على جمهورك بالعكس بقى انت أكيد شايف الناس كلها طيبين إزاي ونفسهم يفرحوك
وبعدين إفتكر إن مايكل چاكسون جاله نفس اللي جالك وبقى أسطورة مبتتكررش خالص، وانت فنان وعارف".
وأخيرًا قال تامر حسني: "أنا واثق إنك مؤمن وبتحمد ربنا وهتقوم وهتكمل وهفكرك قدام كل الناس اللي شايفه كلامي انك هتنجح أكتر وأكتر وربنا هيكرمك أجمل كرم وهتشوف قريب.. بحبك يا رامي".
جدير بالذكر أن المطرب رامي جمال أعلن عن إصابته بمرض البهاق، وكشف عن معاناته مع المرض نفسيًا وجسديًا وعن نيته الجادة في الاعتزال رغم حبه للغناء، وذلك في حالة عدم تقبل الجمهور لمظهره الذي تأثر بالمرض والذي حاول إخفاءه كثيرًا بالمساحيق أثناء إحيائه للحفلات، وتلقى رامي منذ الأمس الكثير من رسائل الدعم من نجوم الفن، أبرزهم المطربة التونسية لطيفة، أحمد زاهر، محمد نور، إيمان العاصي، إليسا، زينة، دينا، الشاعر تامر حسين، وغيرهم.