الثورة القناوية و علاقتها بالثورة المصرية

انا حموت و أعرف حاجتين اتنين مفيش غيرهم
أولا مين صاحب الفكرة العبقرية في اختيار المحافظين عموما و بالأخص محافظ قنا؟؟؟
بصراحة كدة المجلس العسكري أخطأ خطأ فادح في الاختيارات دي
يمكن يكون ليه عذره انه لسة شغال بالمنطق القديم بتاع نظام المخلوع....
يعني يتم اختيارهم على اساس الخلطة السحرية مثلا...و اللي حتى الان انا مش عارف مكوناتها ايه و غالبا لسة محدش عارف برضه..
يعني شوية لواءات شرطة على شوية لواءات جيش و يمكن يكونوا بيكرموهم الله اعلم..
و بعدين حط معاهم كام دكتور في الجامعة و دول طبعا للمحافظات الصعبة نسبيا زي القاهرة مثلا...
اما بالنسبة للصعيد فده حاجة تانية خالص , فممكن يكون لواء شرطة مثلا
مش مشكلة كدة كدة المحافظات دي ملهاش صوت و محدش فيها بيتكلم و بيرضوا باي حاجة بيقدمهالهم اللي بيحكم حاليا سواء كان المجلس العسكري او الرئيس السابق المخلوع
او حتى لو كان القذافي "زنجة..زنجة"....
لكن المفروض ان المنطق ده يكون اتغير بعد الثورة ده على اعتبار ان الثورة وصلت للصعيد طبعا..هو اي نعم ممكن تكون وصلت متأخر لكن في النهاية وصلت و ده المهم..
لسة الناس هنا ما اتغيرتش لكن مسيرهم يتغيروا حتى لو بعد سنين مش دي المشكلة خالص
المشكلة انك تهمش الناس دي و تعتبر ان صوتهم ملهوش وجود و انهم حيفضلوا ساكتين طول عمرهم و ده للاسف للي حصل...
لأن بعد تعيين المحافظ مباشرة و قبل ما يحلف اليمين ابتدت المظاهرات و كانت بسيطة و شعبية و مطالبها مشروعة...على الاقل يظهر للناس ان لسة فيه حد بيتكلم هنا و ان فيه شعب في قنا و ليه صوت....لكن للاسف تم التعامل معاهم بنفس المنطق القديم
و اللي شفناه في بداية المظاهرات قبل ما تبقى ثورة و هو التجاهل التام....
طب يعملوا اعتصام يمكن حد ياخد باله برضه محدش سأل فيهم..
هنا بقى الناس تتصرف ازاي؟؟؟
اكيد مع مستوى الجهل الثقافي اللي نشره نظام مبارك في كل مكان في مصر و بالاخص في الصعيد لدرجة انه لغى تقريبا كلمة ثقافة و اصبح الناس بتنظر للي بيعرف يحل الكلمات المتقاطعة و عنده كام معلومة بيتفزلك بيها عليهم على انه ده هو المثقف.....
فأكيد و من الطبيعي انهم يلجأوا لطرق أخرى يحاولوا يوصلوا صوتهم بيها
فخرجت علينا الفكرة العبقرية و هي قطع السكك الحديدية و الطرق البرية
و طبعا للاسف هما نسيوا او ما يعرفوش ان ده مش تظاهر او اعتصام سلمي
ده يدخل حتما في بند البلطجة و قطع الطرق...
انا مش ببرر الافعال دي لاني مش موافق عليها خالص...
لان ببساطة ايام الثورة الكلام ده محصلش و اسمها كانت ثورة و الشعب كله طالع في الشوارع..و حتى في قنا فيه ناس كتير طلعت بس الاعلام برضه تجاهلهم و كان الضوء كله على ميدان التحرير و الميادين الاخرى..
فيمكن هما يكونوا فاهمين فعلا ان اللي بيعملوه ده ثورة...مش مجرد احتجاجات على حاجة غلط عملتها الحكومة او المجلس العسكري....
يمكن يكون الناس اللي ماشركتش في الثورة نفسها تعمل ثورة لوحدها مثلا والله أعلم..
لكن يبقى شيئ مهم ان تعيين المحافظين ده أسوأ حاجة عملتها حكومة الثورة
سواء اختاروهم او حتى لو وافقوا عليهم...
انا كان رأيي انه يتم اختيار نصف المحافظين اقباط...بناءا على كفائتهم
مش ارضاءا لحد على حساب حد تاني....
و بكدة يكونوا اخمدوا اي اصوات للفتنة في اي مكان مش في قنا بس...
و في النهاية الحاجة التانية اللي نفسي اعرفها
من أنتم....من أنتم؟؟؟