الراقصة ورئيس التحرير

«سألته فى فضول» وإيه هى المزايا اللى حنستفيدها لو بقيت رئيس الجمهورية؟ - «قال فى هدوء» إنى ما انخدعش ( ثم وهو يناولنى صورة راقصة مشهورة بمغامراتها الساخنة) عارف مين دى؟ - «مبتسما فى خبث» وهو فى حد فى مصر مايعرفهاش - «قال فى جدية» وإيه رأيك فيها؟- «قلت مندهشا» حيكون إيه؟ رقّاصة فهى ترقص راقصة!.
«قال مخرجا صورة صحفى شهير» طب وده؟- «هتفت على الفور» ده رئيس تحرير إحدى الصحف القومية - «قال فى اهتمام» حتعمل إيه لو شفته؟- «قلت فى حماسة» يا سلام! حاسلم عليه وأتصور جنبه عشان أتمنظر على أصحابى.
«قال فى هدوء» يعنى أفهم من كلامك إنك بتحترم رئيس التحرير أكتر من الراقصة؟- «قلت فى دهشة» وإيه اللى جاب المثقف للراقصة!- «قال فى هدوء» ولو قلت لك إن الراقصة أشرف منه ألف مرة!، لدرجة إنى أستحى أحط الاتنين فى مجال المقارنة - «قلت وأنا أخبط بيدى على رأسى» إنت حتجننى يا شبح!.
«قال فى جدية» لازم تفهم إن الدعارة الفكرية أخطر مليون مرة من الدعارة الجسدية، وأخطر من الاتنين فقهاء السلطان. الراقصة تعتبر قديسة بالمقارنة لهما، فخطيئة الراقصة فردية وأثرها على أخلاقيات الشعوب قليل، أما كتاب السلطة وفقهاء السلطان فجريمتهم فى حق الشعب كله، لأنهم يزينون للحاكم الظلم والاستبداد - «قلت وقد فغرت فمى» إنت بتتكلم بالفصحى يا شبح! - «قال فى غضب» من كتر قرفى.
أنا عشت كتير وشفت المتزلفين والمنافقين وحاشية السلطان. كلهم لهم نفس الوجه الشهوانى والعينين الفاجرة، البطن اللى مابتشبعش، والقلب اللى مابيخشعش.
واقفين بين إيدين الحاكم كأنهم فى صلاة. لو قال لهم اسجدوا حيسجدوا، والحقيقة إنهم بيسجدوا لأنفسهم ومطامعهم الضيقة. وأول ما يموت الحاكم يهرولوا على الحاكم الجديد ليرفعوا له الصلاة.
«قلت فى تهيب» أعوذ بالله. اللهم لا تجعلنى منهم «ثم فى فضول» بس تفتكر يا شبح إن الحاكم بياكل من الأونطة؟ - «فقال على الفور» طبعا لا، هو فاهمهم وبيحتقرهم، بس للأسف مايقدرش يستغنى عنهم - «سألته فى دهشة» ليه؟
ما دام عارف إنهم مش بيحبوه لشخصه - «قال فى أسف» إنت مش فاهم النفس البشرية. الحاكم - زى أى إنسان - فيه الذرة التى تجلى الله عليها لحظة أخذ العهد، نقطة النور اللى عاوزه تتحول لشمس، لكن الاستقامة صعبة وتكاليفها متعبة.
وعشان يتوازن نفسيا بيفضل أن يكون جنبه أراذل الخلق عشان يحس إنه - بالمقارنة لهم - أحسن منهم. أما الناس المحترمة فيقدرهم ويبجلهم، لكن مايستحملش قربهم، والدليل اللى حصل بين مبارك والشيخ الغزالى - «قلت فى فضول» لازم تحكيلى الحكاية بالتفصيل.