التفسير الشبحى للتاريخ

(قلت فى قلق) إنت لخبطتنى على الآخر يا شبح، حتقول إيه تانى؟- (قال وهو يعطينى ورقة) خد جاوب على الأسئلة دى - (قلت فى احتجاج) تانى! هو أنا مش حاخلص بقى من سيرة الامتحانات، طب أنا حاحكيلك حاجة تضحك أوى: واحد صاحبى سقطوه فى امتحان الدكتوراه ست مرات، فى كل مرة يسقط فيها كان بيحمل هم المرواح للبيت عشان ابنه الصغير حيقول له: ييييه، إنت سقطت تانى يا بابا!،
بذمتك مش حاجة تفطس من الضحك!- (قال فى جدية) بايخة. ياللا جاوب- (مغلوبا على أمرى) هات يا سيدى الورقة أمرى لله (ثم مبتهجا) والله إنت شبح عسل، يا ريت كل الأشباح زيك. ده امتحان سهل خالص وأكيد حاجيب عشرة من عشرة. السؤال الأول مين بيحكم مصر؟،
طبعا مبارك. السؤال التانى: مين بيحكم أمريكا؟ طبعا أوباما. السؤال التالت: مين.. - (قال الشبح مقاطعا) كل أجوبتك غلط، هات الورقة( ثم ممسكا بقلم أحمر) صفر من عشرة، وكمان كحكة.
(قلت وقد بدأت أشعر بالخطر) إيه اللخبطة دى بقى؟- (قال فى هدوء شبحى مخيف) الحاكم، أى حاكم فى الدنيا، هو رمز للشرعية، فكرة، صورة بتتعلق ورا المكاتب، لكنه فى نهاية الأمر مجرد إنسان له قدرات محدودة، لا بيطير ولاٍ بيعرف الغيب. الحاكم الحقيقى هو القوى صاحبة المصالح، بترسم الخطط وتكتب القوانين لمصلحتها وتوجّه الرأى العام فى خفاء.
مصر كعكة بآلاف المليارات، أراض مالهاش حصر، مصانع قطاع عام، بترول، غاز، شركات تصدير واستيراد، تفتكر مصالح بهذا الحجم حيسيبوها للصدفة؟- (قلت مذهولا) لأ طبعا.. بس مين هما؟- (قال هامسا) مستحيل تعرفهم، لأنهم مش مجرد أسماء، دول أكبر من كده: سياسات، ريح بيحرك العَلَم فى اتجاهات معينة.
لهم علامات بتتكّرر: أهمها إنك عمرك ما شفتهم ولا سمعت عنهم، لأنهم أصلا مش عاوزين يتعرفوا، ويفضلوا يبقوا خلف ستار- (قلت فى تلقائية) يبقوا أشباح- (مبتسما فى تقدير) دلوقت فهمت أنا ليه قلت لك إنكم دايما بيحكمكم أشباح!
(قلت فى ارتباك) تصدق إنك لخبطتنى، أنا حاسس دلوقت إنى إنسان ضئيل أمام قوى عاتية لا قبل لى بمقاومتها، فقاعة صابون منفوخة على الفاضى.
بجد إنت سودت الدنيا فى عينى يا شبح - (قال الشبح فى رثاء) دايما البشر بيفضلوا الأكاذيب على مواجهة الحقيقة - (فقلت وأنا أتنهد) لإننا مانقدرش نعيش بدون أمل.
نموت وإحنا لسه على قيد الحياة (ثم متسائلا) يعنى إنت عايز تقول إن مفيش فايدة؟- (قال فى قوة) لأ فيه فايدة ونص، أمال أنا جاى ليه؟
إنت مش متصور المزايا اللى حتحصلوا عليها لو انتخبتونى رئيس للجمهورية. (ترى ما هى هذه المزايا؟ انتظروا المقال القادم إن شاء الله).