«#ايه_اللي_مصبرك_علي_مصر» يتصدر «تويتر».. ومغردون: «الأهلي والزمالك وجيشها العظيم»

تصدر هاشتاج «#ايه_اللي_مصبرك_علي_مصر»، صباح السبت، موقع «تويتر» للتدوينات القصيرة.
وتنوعت إجابات مستخدمي «تويتر»، حيث كتب حساب الكومي: «الأهلي»، وعلقت لوليتا: «الزمالك»، ورد أحمد الغباشي على هذا السؤال: «لأن مهما لفيت في الآخر ديه أرضك اللى هتلم عظمك، ورث ولادك من بعدك»، فيما قال السندباد: «مفيش مكان تحس فيه بمعنى العِشرة زي مصر».
وعلق حساب ويلسون: «الشيشة حقيقي أنت عارف لو في شيشة ف روسيا كان زماني ناطط ف الجلابية وخالع على أول طيارة»، ورأى إبراهيم المصري: «بنقول يمكن تتعدل، بينما قال حسام: «زى اللي مصبر الأب على مشاكل ولاده».
«فيها واحد زي السيسي وجيش مصر العظيم».. بهذه الكلمات رد محمود على هذا السؤال، بينما قال عمر الجمال: «إني ماليش وطن أعرف أعيش فيه زي وطني مع إني كاره العيش فيها بس بلدي مقدرش أبعد عنها لأن كل ذكرياتي فيها»، وعادل عزت: «مفيش أي حاجة مصبراني عليها ومن 7 سنين ومش بفكر غير في الهجرة».
كما علق محمد سلامة: «تذكروا أن مصر فيها خيرات الأرض اهبطوا مصر فإن لكم ما شئتم نهر أصله في الجنة جند خير الأجناد وصفهم الله بالأوتاد»، فيما قالت إلهام: «هيا اللي صبرت علينا كتير»، وقال خالد: «لسه مفيش فرصة سفر متاحة»، بينما رد رضا سعد: «مليش غيرها».
وأجاب ماجد حجازي: «إنها بلدي مثلها مثل أمي أصبر عليها مهما قست علي»، وعماد على رأى أن «مصر التاريخ القديم والتاريخ الإسلامي والعربي والأفريقي»، فيما علقت نجلاء رزق: «الحبايب والبحر طول سنة»، وشوقي رأى: «مصر هي روحى هي كل شىء مصر العزة مصر الأمان مصر الشهامة مصر أجمل بلاد العالم تحيا مصر وتسلم الأيادي تسلم جيش بلادي».