مذيعة بالتلفزيون المصري تنتقد السيسي وتنهي الحلقة على الهواء (فيديو)

تداول نشطاء على مواقع التواصل الاجتماعي، مقطع فيديو للإعلامية عزة الحناوي، المذيعة بقناة «القاهرة» بالتليفزيون المصري تنتقد فيه الرئيس عبدالفتاح السيسي، في برنامجها «أخبار القاهرة»، المذاع مساء الأحد الماضي، مطالبة الرئيس بأن يعمل هو أولًا قبل أن يطالب الشعب المصري بالعمل، قائلة: «سيادتك مابتشتغلش الحقيقة، ومفيش ملف حليته لغاية دلوقتي من يوم ما جيت».
«اتعلمنا الوطنية من التعليم يعني إيه وطن يعني إيه بلد، يعني إيه انتمائنا للقوات المسلحة والجيش المصري اتعلمنا دا من خلال التعليم، دلوقتي في أطفال صغيرة طالعة مش حابة البلد من المعاناة اللي بيشوفوها، من أجهزة الدولة، بعض الناس شايفة كأن النظام رافع شعار (ضد الشعب المصري)، شعار يعني بيقوله (يا الرحيل التام يالموت الزؤام) كأن الشعب المصري محتل أشر، عندك ناس عايزة تسيب البلد، وفي ناس سابت، سواء بطرق شرعية أو غير شرعية، دي معلومات حقيقية من الناس في الشارع وفي كل مكان، وأقارب وجيران، ناس شباب عايزين ينتموا لجنسيات أخرى غير مصر، حتى إن كان فيها تنازل عن جنسيتهم المصرية وده خطر، لما ننبه ليه نبقى احنا عملاء وخونة وموجهين؟».
ورد ضيف الحلقة، الكاتب الصحفي أسامة شحاتة، نائب رئيس تحرير جريدة المساء، على المذيعة: «إحنا بنقول حاجة، بنقول إن احنا دولة في ظروف صعبة»، لتقاطعه «الحناوي»: «الرئيس بس زي ما بيطالب الشعب إنه يعمل، هو يعمل أولًا السيد الرئيس»، ليعود الضيف ويقول: «هو الراجل قال إيه، قال لو أقدر أبيع نفسي عشان أجيبلكم اللي انتوا عاوزينه أنا أبيع نفسي، دي متتقالش، أنا الكلمة دي ضد إنه يقولها، ضد إن أي رئيس مصري يقول الكلمة دي تمامًا، أيًا كان مين هو الرئيس المصري».
واختتمت مذيعة التليفزيون المصري قائلة: «كلمة أخيرة للسيد الرئيس، يعني ليه مقولة بيقول فيها (يعني لما حد يوجعني يا مصريين متردوش، اشتغلوا)، عظيم، المصريين بيشتغلوا لكن معظم القيادات في الدولة ويمكن كلهم هم اللي مبيشتغلوش، وسيادتك كمان مابتشتغلش الحقيقة، مفيش ملف حليته لغاية دلوقتي من يوم ما جيت، ومن يوم ما توليت حكم مصر، وبقي على انتهاء العامين من فترة ولاية سيادتك شهور قليلة، وسيادتك وعدت الشعب المصري بعد سنتين هتشوفوا مصر في دنيا تانية، منتظرين، السنتين قربوا ينتهوا، فات منهم سنة و8 شهور».
وقالت المذيعة: «إحنا عايزين بلدنا تمشي صح، يبقى فيها دولة قانون، يبقى فيها عدالة اجتماعية بجد، يبقى فيها عدل حقيقي، يبقى فيها احترام لمواطنيها ويتمنع الضابط عن حبس ناس واختفاء ناس قسريًا، ولولا نقابة الصحفيين عملت اعتصام مكنش يتعالج الناس المسجونين في سجن العقرب أو طرة أو غيره من زملاءنا الصحفيين، عندنا كمان سجن أطلقوا عليه دلوقتي سجن أبوغريب، ممنوع الزيارة ممنوع الأدوية، في ناس حالتها الصحية حرجة مابتطلعش تعمل عمليات، فدي ملفات كثيرة أمام السيد الرئيس ولم يتخذ فيها أي إجراء حقوقي تجاه الناس دي، بل بالعكس الحقوقين عندك منع سفر لحقوقيين كثيرين جدًا، ومرشح كمان إنه يزيد العدد يبقى 2000 خلال الفترة القادمة، ليه كل ده؟».
ورد الضيف، الذي دافع عن النظام والرئيس طوال الحلقة في مواجهة هجوم «الحناوي»: «يا مدام عزة أنا شايف الصورة اللي أنت بتقوليها كدة صورة سوداء، الصورة السوداء دي مش هتوصلك لحاجة»، لتقاطعه «الحناوي» وتتداخل أصواتهم قبل أن يقول الضيف: «إنت هتاخدي الحلقة كلها لنفسك، وتعيدي وتتكلمي»، لترد: «لا متشخصنش المسألة»، ليضيف الضيف: «إذا هتاخدي الحلقة لنفسك دي حاجة ترجعلك، إذا كنتي جاية موجهة في اتجاه معين وعايزة اتجاه معين»، لتقاطعه المذيعة مجددًا: «من فضلك الاتهامات دي تتقال في برامج تانية»، ليرد الضيف: «أنا بتكلم في التليفزيون المصري، التليفزيون المصري تليفزيون الشعب مش تليفزيون حد تاني».
وردت «الحناوي»: «أيوة تليفزيون الشعب مش تليفزيون الرئيس»، ليرد الضيف: «احنا مقولناش تليفزيون الرئيس ده تليفزيون الشعب، الرئيس على دماغنا من فوق، وإحنا لولا الرئيس مكناش احنا، مكناش الثورة، مكناش الإخوان بهدلونا في صحافتنا»، وقاطعته «الحناوي» لترفض اتهاماته وتنهي الحلقة رافضة أن يتهمها بأنها «موجهة»، فيما أصر هو على تأكيده أنه لا يتحدث عن الرئيس.