كلمة انا المصري . تبدو غريبة مش كده؟؟ زي ما واحد يقف يقولك أنا إنسان . تبص له و أنت مش فاهم قصده ايه !! البديهي لا يعرف .. مش كده ؟؟ بس بعد اللي حصل الفترة اللي فاتت دي من استغلال للدين للترويج لأفكار سياسية معينة و بعد ما كنت لما تتكلم مع ناس تلاقيها فعلا مش فاهمة او مش متصورة إيه اللي بيحصل و من الآخر مش عاوزة تفهم ممكن جدا نكون محتاجين نرجع نفتكر الحاجة الوحيدة اللي كلنا بنشترك فيها .. مصريتنا .. و إنه دي الجنسية اللي بتعني إن مصر هي بلدنا و إن كل ما كنا أحسن هنعيش فيها أحسن تويتر و فيس بوك قاعدين عليهم نتكلم مع بعض .. ناسين انه مش كل المصريين عندهم تويتر و فيس بوك .. مش واخدين بالنا إننا فجاة إتحولنا لجماعات كل جماعة بتتكلم بلغتها الخاصة و اللي برة اللغة دي منبوذ .. و طلع تعبير ( حزب الكنبة ) تعبيرا عن الناس اللي في بيوتها قعده متعرفش يعني ايه سياسة بالنسبة للمثقفين ساسيا .. ما نزلتش تقتحم أمن الدولة و يمكن كمان معرفتش تنزل التحرير. زيي كده مثلا ما أنا من الأقاليم . كتبت أقول لازم الثورة تنجح بس كان صعب أوي أنزل التحرير. (حزب الكنبة) !! كلنا بقينا أحزاب . بعد ما كنا بنسترجى حزب غير الوطني .معلش فجأة الدنيا اتفتحت .. النور قاد بعد ما كانت كحل المصريين اللي مش بيفهموا إيه المقصود بالأجندة و مش آخر همهم يقعدوا يعملوا هاش تاج (#) – العلامة دي اسمها كده – على تويتر عشان يهزروا و يترتيئوا و يشتموا و يلاقوا الأتباع بيزيدوا عشرة و مية و الف المصريين اللي مش عاوزين فلان بس مش هيهاجموه و عاوزين فلان بس ميقدروش يقفوا وراه في التحرير و اللي مؤمنين بس ملهومش توجه ديني محدد و اللي معندهمش طائفية . و متأكدين إنها حاجة مندسة عليهم من سنين المصريين دول .. اللي كل واحد يجي يقولهم كلمتين و يصرخ في وشهم إن هو ده الصح و يلعب في دماغهم .. هم دول اللي هيأثروا على الإنتخابات بجد ... أنا واحدة منهم بقول بمنتهى البساطة ( أنا المصري) و لازم أعلن عن وجودي و أفكر الكل إن أنا الأغلبية .. و فكري هيوصل في كل حته . فيس بوك , تويتر , تلفزيون و جرائد .. انا ببساطة المصري اللي يجي يتكلم في حاجة عشان يأثر عليا يشرحها صح .. يعمل الواجب اللي عليه و يذاكر و يبين لي إنه مذاكر و فاهم عصر ( بيقولك ) خلص خلاص .. يا اما اتريئنا و قلنا ( هو مين اللي بيقول؟) عرف نفسك .. فسر كلامك.. ما تستهونش بيا. مش عشان ما بينا كتير أمي .. مش عشان معظمنا ملوش حزب يمثله غير الكنبة. خلاص , هنخبط في بعض ! .. لا ... إحنا ممكن نعلم بعض. و دي فكرة الدعوة دي . دي مش دعوة فردية لفكر بعينه دي دعوة للتعلم لإننا نكمل بعض. أنا المصري اللي مش اهم حاجة إنه يوصل لكرسي . بس هو اللي بيشتغل في البلد عشان تكبر. و أنا اللي لازم الكل يعرف إنه بإيدي أحط فلان على الكرسي و بإيدي أشيله من عليه. أنا المصري كلمة بسيطة لكن ليها معنى كبير للي بيفهم و أهم حاجة إنها حقيقة لا جدال عليها.