الجرى نص الجدعنة والشجعنة والجبن يخلق فرعنة للشعننة كان عندى وصفة ممكنة لما يفيض بينا العنا والأرعنة و نشوف ذنوب متشرعنة . . بالعنعنة و الحوت يسوق الفجعنة و الملعنة كان عندى وصفة ممكنة : . . . . . . . . . . . إنك تسوق المسكنة تلاتين سنة و المستبد يمل قص الألسنة . . و يجِّسنا من تانى يعلا حسِّنا . . من نِفسنا و نفك بيه عن نفسنا . . . . . . . . . . . و يقول كلامهم فى الهوا . . بلا فهلوة اللأه عندى يعنى آه . . و إن قالوا آه جتهم أوا و الهوهوة مش فَنِنا . . ولا سننا . . . . . . . . . . . وإللى يحَضَّر جننا لا يوم حايقدر يصرفه . . أو يُظرُفه أو م البنوك حايسلفه . . و يسدِّنا أو بالمعالى يعرِّفه . . و يوظفه و ينغنغه من كَدِّنا و يشرفه . . يلعن أبونا و جدنا . . . . . . . . . . . إللى يحَضَّر جننا لا يوم حايقدر يصرفه أو يقرفه . . و يعنِّفه يأمر ولادنا يهتفوا . . و يخوِّفه أمه و عياله يختفوا . . و يكتفه . . و يهدنا و يصير مداسه خدِّنا و يلمنا . . يُعبُطنا ولَّلا يمدنا . . . . . . . . . . . ياريتها جت على مدنا أو جزرنا لو ننخلع من جِذرنا . . فيه بذرنا وسط الميدان وسط الميدان حانبعزقه من حجرنا فى ليلة وردية ليلة مطر برقية رعدية يشبط فى كومة طين مندية من غير مدادية . . يعرق بجدية . . يرضع عنادية يحلم براسه لفوق . . فوق الحيتان بشوات و افندية راسه براسهم . .و ف دمه ندِّية . . . . . . . . . . . و ف بورصة المخاليق تصبح لِنا ديِّه أما الكرامة ماهيش كوبرى و معديِّة مافيش غلطة معدية , ولا غلطة معديِّة و إنجى زى سعدية و سوزى زى نبوية . . . . . . . . . . . الوصفة كانت ممكنة أقراص خيابة مُسكنة للجرى بين الأمكنة دلوقتى إحنا الأمكنة و الأزمنة مين إللى تانى يُسُكنا ؟ العزبة صبحت ملكنا . . شئ مننا من غير أيامة و شعننة ولا جبن يخلق فرعنة و لا جرى نصه جدعنة. حسن العربى Elarabi.de