سيتغير اللاعبون، والمدربون، والإدارات، لكنهم سيبقون مهما حدث. «يمكنك تغيير زوجتك، اتجاهك السياسي، وحتى ديانتك، لكنك لا يمكن أن تغير فريقك المفضل»، مشهد من فيلم «البحث عن إريك» بما أن ديربي ليلة الخميس بين الزمالك والأهلي بدون جمهور، نقدم لكم قليلا من قصص من يصنعون النجوم.. ومن لأجلهم تُلعب كرة القدم. زياد فؤاد، أهلاوي: صديقي، عبدالرحمن مكاوي، زمالكاوي «حقنة»، شاهدت معه مباراتين فقط للقمة في حياتنا.. الأولى 6-1 والثانية 4-2 للأهلي، ومن بعدها يرفض نهائيًا التواجد معي في أي من لقاءات القمة، وتصادف أن شاهدني في نفس المقهى أثناء إحدى القمم، وفي سكات ترك المقهى مع رسالة ظريفة على الموبايل فحواها «يا أخي سيبني في حالي أطفش من المنطقة ولا أولع في نفسي ولا فيك ولا في الزمالك» فرددت عليه بكلمتين وبس.. في الزمالك» أحمد مصطفى، زمالكاوي: «أفضل ذكرى.. 3-1، لوب عبدالحليم في الحضري، أسوأ ذكرى دون شك للزملكاوي ماتش 4-3 مش 6-1.. انا شفت جثث في المدرجات من الصدمة فعلًا، بعد الجول الرابع شفت كمية ناس رهيبة اغمى عليهم غير العياط الهستيري بس في جمهور كتير سقفوا للاعيبة بعد الماتش ما خلص» طاهر الشيشيني، أهلاوي: «بعد انتهاء ماتش 6/1 جاري الزمالكاوي أعلن تغيير عقيدة تشجيعه من الزمالك للأهلي بعد زفة اهلاوية في الشارع بتاعنا (بجد والله)، والآخر اغلق محله لمدة أسبوع خوفًا من بطش تريقة الاهلاوية» ماتش 3/3 كنت باتفرج مع 3 زمالكاوية كانوا «حقن»، وكمان فكرة إن حسام حسن يغلبنا، الموت كان أهون لي وقتها، بعد جول بركات قلعت التيشرت وقعدت أجري في القهوة» أحمد الشمندي، أهلاوي: «ماتش السوبر المصري 2008 كنت في المدرجات وجنبنا عائلة معاهم طفلة صغيرة سايبنها بتتمشى وتلعب بين الصف اللي قدامهم واللي وراهم وبتجري حوالين الجمهور، كلمت باباها بقوله خلي بالك عشان الصف اللي قدام ده مش شايف حاجة ولو جه جون دلوقتي مش هتلاقي بنتك ورحت ناحيتها ورفعتها ولسه بديهاله كان إينو جاب الجون التاني والمدرج انفجر» أحمد الكاس، زمالكاوي: «مش هنسى جون احمد الكاس موسم 96/97 لما رقص 3 من على خط الكورنر بالحضري، ودة يخلي اللي بيني وبين أحمد الكاس مش تشابه أسماء وبس» حاتم ماهر، زمالكاوي: «أنا كزمالكاوي أكتر ديربي مهين ليا مكانش 6-1 خالص، أكتر ماتش مهين كان نهائي الكاس 2006، اللي الأهلي كسب فيه 3-0، بتاع طرد محمود محمود، الماتش ده كان ممكن يحصل فيه نتيجة أعلى بكتير من ال6 لو لعيبة الأهلي مستهبلتش كانوا بيقسموا جوه ال18 بتاعة الزمالك، ويرجعوا بالكرة ورا وبعدين يدخلوا ال18 تاني، وهكذا، وعبدالمنصف يضحك» اشترك وخليك في الملعب لمتابعة أخبار الدوريات
