هوامش على دفتر الوكسة (وكسة مايو 2002)

يتهم الزمالكاوية الأهلوية بأن الأهلى يفوز بكل بطولاته بالحكام
و تلاقيهم فاكربن أحداث غريبة
يقول لك بطولة سنة كام كانت بتاعة محمد حسام
و سنة مش عارف كام كانت بتاعة مروان كنفانى
و الهدف الإعتبارى
و الحكم اللى طرد أيمن عبد العزيز اللى ضرب منسق الجناين العام مقص رجل من أول الماتش فالحكم طبق القانون
فما كان منهم إلا الإنسحاب
و سب التيييت
و لما طريدة الأهلى
اللى طايرين بيه من الفرحة
و بيعملوا له أغانى
و فضلوه على كل ولاد النادى و الأندية المجاورة
لما الطريدة ده جاب جون شرعى من تمريرة فيلكس
إنسحبوا تانى
و قال لك قدرى عبد العظيم مش عارف أيه
و طبعا فى لقاء الإنهيار التاريخى
يوم النص دستة أجوان
يوم سوير هات تريك بيبو
يوم بيبو و بشير بيبو و الجون
يوم سيداتى أنساتى سادتى مدحت شلبى يحييكم من إستاد القاه...و جون
جووووووون
الجون الأول لرضا شحاتة
طلعوا اللعيبة فوتوا المتش
و الحكم ظلمهم فى آوتين و اتنين ضربة مرمى
لن أنسى منظر واحد من أكبر الزمالكاوية فى التاريخ
و هو بالمناسبة عديلى الآن
كان فى قمة إنفعاله و ثورته
يعلنها أدام كل الشلة بعد الستة واحد
أنه لن يشجع الفريق الزبالة ده(دى كانت كلماته بالظبط )و قالها قدام فرع موبيبنيل بكفرالشيخ
و يشهد عليه نجيب ساويرس نفسه
خد بقى عندك أربعات جوزيه و تلاتاته
كلها تتحول بفعل نظرية المؤامرة إلى إتهام الأهلى بأنه فريق الحزب الوطنى (قال يعنى الزمالك منضم لحركة ستة ابريل )
و هو آخره ينضم لحركة ستة واحد
كأن مرتضى و كمال درويش و ممدوح عباس من أقطاب الإخوان فى مصر
و حازم أمام و ميدو من أقطاب التنظيم الدولى للإخوان
أو أن عشان ابراهيم عيسى و عمرو أديب و بلال فضل و عمر طاهر زمالكاوية يبقوا كده خلاص
كل الزمالكاوية معارضة
و يقول لك تفريغ الأندية من نجومها
و الأندية هنا تعنى الاسماعيلى
قال يعنى هانى سعيد و الحضرى و لا رضا سيكا حتى كانوا متربيين مع شيكابالا تحت مدرجات ميت عقبة
يعنى لو تحيز الحكام الزمالكاوية أيضا للزمالك لفاز الزمالك
و لكنهم فى الوقت نفسه يدعون أنهم 40 مليون زملكاوى
يعنى المفروض نص الحكام يكونوا زمالكاوية
و يفوتوا للزمالك بنالتيات
و يحسب لهم أجوال فاولات
و أوفسايدات
زى ما الحكام الأهلوية بيعملوا لمعشوقهم
الأهلى
طيب فين بقى الحكام الزمالكاوية دول
مش موجودين
يبقى أسطورة ال 40 مليون زمالكاوى مجرد أسطورة
و أهم حاجة تميز كل الزمالكاوية هى عقدة الإضطهاد
و عقدة الأهلى
اللى وصلتهم لمرحلة أنهم لأنهم - مبيعرفوش- يفوزوا على الأهلى فى البلاى ستيشن حتى
دا حتى الحاج الطيب أخو المنسق العام
أصابته لوثة عقلية بعدما تمكن بركات من عمل الحركات
اللى هى أجوان بالمكسرات
و قعد يزعق
فربق محظوظ
ماتش الكاس هأعمل و أسوى
و يوم ماتش الكاس يا ولداه
قعد يلعب فى نعل جزمته
و رجع يقول لك الحكام
حكام ايه و اللعيبة بتوع الأهلى عملوا سكور تاريخى فى عدد الفرص الضائعة المحققة
و عدد التمريرات
اللى تقريبا بلغ 38 تمريرة أنهاها الساحر شيكابالا بفاول عنيف مع ابن بلده حسام عاشور
يفرحوا ازاى طيب
يستنوا لما الاسماعيلى يقطع الأهلى فى ماتش و تلاقيهم ايه ... الفرحة مش سايعاهم
الترجى يظبط الحكم و المساعد و المخرج و المراقب و مقدم الاستوديو و المحللين
و يفوز واحد يتيم
بهدف - قطعا - غير نظيف
و تلاقيهم
و على رأسهم شبانة و الغندور و محمد سيف يقولولك الاهلى ملعبش
يعنى هو الترجى اللى لعب
داحنا مكناش لاقيين الكورة يا حضرات
طيب أهم حبايبهم لعبوا فى الكونجو
لعبوا لما بان لهم أصحاب
و خدوا درس فى الشاى بالياسمين
يكفى بس أن تذكر اسم أحد هؤلاء أمام أى زمالكاوى حتى تنهى الحديث معه مباشرة:
*عدلى القيعى
*بيبو
* متعب
*بركوتة
* حسام حسن) فى ماتش 3-2 سنة 1985)