امسك إخوان

- ايه يا عم الدقن الحلوه دي!
- هههههه… الله يكرمك، حاجه كده من ألاعيب الأربعين
- يااااااه، أنت لسه واصل الأربعين!
- يادوب، في التليين ..
- لا، بس دي دقن إخوانجيه خالص
- يااااا راااااجل!!
- آه، وخصوصاً إن كتاباتك برضه ماتطمنش
- حضرتك بتقرالي!
- طبعاً، عندك حاجات كده مش مريحه..
- معقول!.. زي إيه؟
- لاااا، دي عايزه قعده
- هههه… مينفعش يعني عالواقف!
‫-…….ههههههه..
- عموماً اللي يعرف الدقن بتاعة الاخوان يعرف إن الترتيبة دي مش تبعهم، واللي يعرف دقن السلفيين هياخد باله إن الشنب الطويل ده مش ماشي معاهم خالص..
- مش هتفرق كتير ..
- يا راااجل…!!! طيب والشعر المنكوش ونازل عالقفا ده!
- محدش هيبص عالشعر بأه..
- والجينز ده أخباره إيه!
- هههههه… ممكن يكون تمويه
- يا ساتر …! يعني اللي عايز يموّه فيقوم يلبس جينز ويطوّل شعره ..هيصعب عليه يحلق دقنه!
- هههههه….مبقاش في حاجه مضمونه
- طيب، يبقى نخلينا في المضمون بأه، مش في الشكل!
- آآه …المضمون بأه واضح في كتاباتك
- فعلاً.. هو أنا مكشوف للدرجه دي!
- آه.. بتشكك في كل حاجه في البلد ومش عاجبك العجب
- حضرتك كده طبعًا مقريتش كل كتاباتي، بس على كل حال، محدش قال لك إن اللي يحب حد يتمنى له الأفضل!
- آه.. طبعا..
- والأفضل دا معناه إيه … ولا مؤاخذه؟
- معناه إيه يا عم الفيلسوف؟
- يا سيدي الله يكرمك.. معناه إنك تشاور للي بتحبه على الغلطات عشان ينتبه لها ويصلّحها
- للدرجه دي مش شايف حاجه حلوه خالص!
- كلامي مش معناه كده طبعًا، بس احترامًا لحضرتك هأشرح لك
- تشرح إيه بس! تفرق ايه بأه عن الإخوان اللي بيشهروا بكل حاجه في البلد!!
- أفرق كتير يا دكتور... يا متعلم يا فاهم
- ‫….. ما أظنش
- أفرق إني مبقولش على الصح غلط، ولا باخلط الغلط بالصح عشان التشويش والتخويف
- بس دا مش وقت الكلام على الأخطاء خالص
- مفيش وقت مش مناسب للتنبيه لخطأ.. واقتراح تصحيح، بالعكس اللي يسكت هو المخطئ أو المغرض أو الغافل، وأنا بحاول مكونش واحد من دول
- لا، إحنا لازم ما نديش لحد فرصة يتكلم عنا
- السكوت عن الأخطاء أو تجاهلها تحت أي مبرر هو اللي هيخلي الحد اللي بتقول عليه دا- مش بس يتكلم عليك- لأ، يمسك عليك غلطات ويتحكم فيك كمان
- أهو دا الكلام اللي بيقولوه أعداء الوطن عشان يبرروا كلامهم المسئ له
- الله يسامحك، لكن دا الكلام اللي لازم يعمله كل واحد بيحب وطنه، إنه يشاور على الغلط اللي بيشوفه
- آه… بس لازم يكون في احترام
- دا الاتهام التالت اللي حضرتك بتوجهولي في حوار واحد.. عمومًا الله يسامحك، أنا عمري ما تجاوزت الاحترام في كتابة أو كلام
- طبعًا انت عارف إني بأقولك كده عشان بحبك، وخايف على مصلحتك
- أنا عارف طبعًا إن حضرتك بتشاورلي على أخطائي... لأنك مهتم بمصلحتي وبتحبني، مش كده؟
- ربنا هو الشاهد
- طيب ليه مش عاجبك إني أعمل كده مع بلدي اللي بحبها!
- ‫……آ..آ ...أنا بس حبيت أقول لك، خد بالك..
- آخد بالي من إيه؟
- تاخد بالك إنك ممكن تروح في الرجلين بسبب الدقن دي
- يعني حضرتك شايف كده!
- أنا باعمل الواجب اللي شايفه صح لدعم أصحاب القرار في البلد... في الوقت الحرج ده
- بس تعرف حضرتك إنك كده بتهين الناس أصحاب القرار، اللي بتقصد تخدمهم!
- حاااااشا لله، إزاي!
- لأن اللي معندوش عقل بس هو اللي بيحكم على الناس من دقن طويلة، ودا يبقى لا مؤاخذه يعني ….
- لا لا عيب … هما فاضيين بأه يفتشوا ورا كل واحد
- يعني شايف إنهم بس فاضيين يقفشوا كل واحد!
- انت مفيش فايدة من الكلام معاك ….. اللهم إني بلغت...
- اللهم إنك بلغتني …وإلا بلّغت عني…. هههههههه!
waleedalaa@hotmail.com
اشترك الآن لتصلك أهم الأخبار لحظة بلحظة