هاجم حسن شاهين، أحد مؤسسي حركة «تمرد»، عضو حملة حمدين صباحي، المرشح لرئاسة الجمهورية، المشير عبد الفتاح السيسي، وزير الدفاع السابق، قائلا إن «السيسي اتخذ مواجهة الإرهاب (رغم فشله في مواجهته) حجة للقضاء على الشباب»، بحسب قوله. وكتب «شاهين» عبر صفحته الشخصية على موقع التواصل الاجتماعي «فيس بوك»، فجر اليوم السبت: «بيقولوا إن عبد الفتاح السيسي بيشوف الناس من الهاشتاج.. طب وأنت خايف ليه ما تنزل للناس الشارع مش بتقول الشعب معاك بس انزل من غير ما يفضولك الشارع عشان كده إحنا بنقول (تحيا_مصر)، بس مصر الشعب مش القصر»، بحسب قوله. وأضاف: «بما أنك فاشل يعنى فشلت لما كنت نائب لرئيس الوزراء، وفشلت كمان في مواجهة الإرهاب اللى أخدته بعد كده حجة عشان تقضى على الشباب، عشان مش قادر تسمع غير صوت نفسك عشان كده (هنكمل_حلمنا) مع حمدين صباحى، وعشان (تحيا_مصر)، احنا اختارنا اللى معاه حلول لمشاكل مصر مش اللى واخدها فتونة وواخد الفاسدين معاه عشان هما دول اللى من غيرهم مش هيعرف يمشي»، على حد قوله. وتابع: «في مجموعة كده من اللى بيأيدوا عبد الفتاح السيسي محسوبين على شخص بعينه ماسكين في كلام من نوعية حسن شاهين منافق وكان بيأيد السيسي، وأنه أيد صباحى عشان أخد منه فلوس بصً ياعم الحاج عشان أنا أهم حاجة عندى #تحيا_مصر بس مش شعار على الفاضي نضحك بيه على الناس زى ما أنتوا بتعملوا والسياسة مش قرآن السياسة اجتهاد وانحيازات ومواقف بناء عن وقائع بتحصل كل يوم»، بحسب قوله. وواصل: «أنا فكرت أن السيسي ممكن يعمل شراكة بين الثورة والدولة زي أي مواطن هدفه الثورة مش الأشخاص وطلع تقديرى غلط وقررت أني أقول للسيسي لا أول ما نزل ملعب السياسة عارف ليه عشان السيسي شخص فاشل ميقدرش يحكم مصر لأن مصر عايزة حد عنده رؤية، وهو معندوش أي رؤية، وطالع يقولنا تقشفوا، وعشان عبد الفتاح السيسي عمل نفسه غطاء لكل الحرامية والفاسدين اللى سرقونا ونهبونا قبل كده وبيديهم الفرصة انهم يرجعوا تاني يكملوا علينا، وعرفت أني على الطريق الصح لما المخلوع مبارك بيدعو لانتخاب السيسي».
