بالفيديو.. شريف مدكور عن سخرية باسم يوسف: أنا مع حرية الإعلام

قال الإعلامي شريف مدكور إنه غير غاضب من سخرية الإعلامي باسم يوسف منه في برنامجه «البرنامج»، مؤكدًا أنه مع «حرية الإعلام والرأي.. ومع الحرية ومع كل واحد يعمل اللي هوة عاوزه».
وأوضح «مدكور» في حلقة برنامج «ساعة مع شريف» على فضائية «المحور»، مساء السبت: « كل يوم جمعة يكلموني، ويقولوا ده فلان بيسخر منك، بالنسبة للبرنامج اللي بيسخر أنا ليا وجهة نظر أنا مع حرية الإعلام والرأي، فيه برامج بتفرج عليها، وبرامج مش بتفرج عليها، زي بالظبط ما فيه ناس بتحب شريف مدكور وفيه ناس بتكرهه، فيه ناس شايفين إن برنامجي بينشر قيم ويرتقي بذوق المجتمع، فيه ناس شايفة إن برنامجي بينشر الرزيلة وبيرجع ببرنامجي لورا».
وتابع: «أنا مع حرية الرأي والإعلام، وكلمة إني أقول على حد متربي ومش متربي فكل واحد له فكره الخاص، أنا مبيفرقش معايا الكلام ده، فيه ريموت كنترول ممكن تغير به القناة».
وأشار إلى أنه لا يتابع برنامج باسم يوسف دائمًا، موضحًا «البرنامج اللي احنا بنتكلم عليه مثلا أنا مش بتفرج عليه دايما، ساعات بتفرج على الحاجات اللي تخصني، اللي مش عاجبه حاجة ميتفرجش عليها، ومش عاجبك فلان الآخر ماتتفرجش عليه».
ولفت إلى أن ما يضايقه هو دخول جماهير البرامج في مشادات كلامية بسبب هذا المذيع أو ذاك، « ماينفعش جماهير البرامج تقعد تتخانق مع بعض، القنوات والمذيعيين والبرامج على قفا من يشيل».
وأكد أنه «مع الحرية ومع كل واحد يعمل اللي هوة عاوزه، عندي مشكلة لو حد بيحرض على العنف وتكفير المجتمع».
ورحب مستخدمو شبكات التواصل الاجتماعي بتعليق شريف مدكور على تناول باسم يوسف لبرنامجه بالسخرية، وقالت منى محجوب في حسابها على «تويتر»: «تعليق شريف مدكور على باسم متزن ومتماسك، وهو شخصيًا ثابت ومتسق مع ذاته برغم التريقة عليه، أكتر من ناس كتير شغلتهم السياسة ولا يتقبلوا الآخر».
ومثلها كتب أحمد أنور، قائلا «أسهم شريف مدكور دلوقتى في السما وباسم في تراجع.. باسم يوسف ذكي.. مش هيسيب حد يكسب نمرة عليه.. الجمعة الجاية هيرفع أسهمه أعلى من شريف».