احكى يا غزة

غزة قومى اتكلمى ع اللى فيكى من جراح
ضمى لينا مجزرة اتنفذت حتى الصباح
احكى لينا ملحمة شعب جاهد شعب صامد بدون سلاح
أوصفى إزاى ولادك وقفوا ضد الاجتياح
اشرحى للكون بحاله هوه إيه معنى الكفاح
قولى للناس جميعًا يعنى إيه طعم الأفراح
اصرخى وبلاش سكوتك علىّ صوتك بالصياح
اصرخى واصرخى علىّ صوتك بالنواح
قولى نخوة أمة ضاعت مخلوقة للفلاح
امة خرج منها عمر وعمرو وخرج منها صلاح
سطرى بالدم حكام تخاذلوا وأمرهم بان بافتضاح
ناموا لسنين طويلة وعدوهم اجتاح واستباح
أيها الراقدون ليكو عندى أحلى حل واقتراح
خليكوا أحسن فى العولمة والانفتاح
أصلهم بالنسبة ليكو أعلى مراتب النجاح
بكرة جورج واللى بعده يذكروكم بامتداح
وانتو رهن إشارة بيها تنولوا الرضا والسماح
غزة فوّقيهم قولى صامدة ولو بقيت بيوت أشباح
رامية حملى ورامية همى للى منهم ريحة الدم فاح
قولى عندى حماس وعندى قسام الجناح
قولى إيه هيطول أسودك م الكلاب إلا النباح
أحمد همام زعفان - إخصائى صحافة