على إيه يافايزة .. أخدتى الجايزة (أوباما ونوبل)

لأول مرة أشوف جائزة بتتاخد عشان شوية كلام بيتقال
شوية كلام بس يعنى فى حجم الفنجان يعنى مش كتير :D
طب ما أنا تحت بيتى كل يوم بيتخانقوا وبيزعقوا وبيجعجعوا وبيتكلموا وبيصرخوا وبيشتموا كمان عشان شويه العربيات الغريبة اللى بتركن قدام المحلات
محدش يعنى جه وإداهم جايزة ولا حد قالهم برافو أنتم لسان أو بق خدوا الجايزة دى سدوا حنكم.
ولا حتى العربيات بطلت تركن ده إحنا غلابه أوى.
لكن بقى لو كنت معلم ومتعلم ومتقمع ومتلمع ومتفنن هتاخد الجايزة على شويه كلام يتقال.
فى يوم جمعة وفى ساعة صلاة ويوم حصار القدس ويوم الاعتصام لنصرة المسجد الأقصى وفى يوم تجمهر الأهالى والأشخاص فى كل البلاد العربية
الست بتاعت التلفزيون تقولك.
أوباما الفائز بجائزة نوبل للسلام لعام 2009
إفتكرت ساعتها أغنيه وديع الصافى - اه ياسلام - اللى قال فيها
ولا يوم إنحنينا بوجه اللى اعتدى
أحتلوا أراضينا وذلوا أهالينا
وحطوا العله فينا وبيحكموا بالسلام
وياسلام سلم عسلامهم ياسلام
أنا بسأل نفسى وبسألكم هو أخدها ليه ؟؟؟؟؟
يمكن إنسحب من العراق وإحنا مش عارفين
يمكن ساب أفغانستان وإحنا نايمين
ويمكن وقف الروس عن الشيشان وإحنا قاعدين
ويمكن ساند مسلمين الصين بالتبت وإحنا مش شايفين
يمكن قفل سجن جوانتاموا زى ما وعد بس هو اللى مرداش يتقفل
يمكن بطل يهدد سوريا وإيران وإحنا مش سامعين
ويمكن ساب لبنان فى حالها وإحنا تركينها
ويمكن ويمكن ويمكن
يمكن وقف الاستيطان ويمكن وقف بناء السور يمكن رفع الحصار عن غزة
يمكن خلى إسرائيل تنسحب من الضفة
ويمكن خلى إسرائيل تفك الحصار عن القدس وسمحت بالمصلين يصلوا فى الأقصى
يمكن أحل السلام وإحنا مش عارفين أصلنا نايمين على ميلودى ومزيكا شايفين
يا راجل عيب عليك تاخدها عشان السلام فى يوم القدس فيه بتتباد
خلاصة الكلام أنت واحد بياع كلام
وانا كلامى بيطير زى الفواحة
وأنت كلامك بيفوز بجوايز
حلال عليك الشهادة والميدالية الذهبية وال 10 مليون كرون نرويجى.