بعودة يا رمضان

شهر رمضان بيهل علينا عام ورا عام
وعشرة منه أحلى وأروع الأيام
وألف سلام للعسكرى المصرى ألف سلام
اللى لا همه صاروخ ولا طيارة ولا ألغام
                ■ ■ ■
عبر القناة فى ملحمة سجلها له التاريخ
عبر القناة وفوق دماغه القنابل والصواريخ
والعدو بيجرى قدامه ما بين هرولة وصريخ
واتلخبطت جولدا وديّان وموراديخ
                ■ ■ ■
قمنا بخطة خداع أروع منها مفيش
يومها العسكرى المصرى كان بيقزقز ياميش
واللى بيمص قصب واللى بياكل جبنة قريش
واللى بيغنى ويقول ياريت زمانى ما يصحنيش
                ■ ■ ■
والساعة اتنين طلعة مبارك بداية الانتصار
طيرانه دك الحصون وأربك الأشرار
وتم رفع العلم قبل ما يروح النهار
وخط بارليف انتهى والسد الترابى انهار
                ■ ■ ■
قضينا ع الوهم الكبير وع الأسطورة
وفى ست ساعات كانت العملية كلها مستورة
والعدو بيجرى هنا دستة وهنا طورة
وصرخت جولدا يا أمريكا اظهرى فى الصورة
                ■ ■ ■
والانتصار ده صنعناه وعاد عصر الجدود
وحرب استنزاف ناصر كانت دليل الصمود
وقرار السادات للحرب كان اليوم الموعود
ورفع مبارك العلم على طابا فى يوم مشهود
محمد شيحة
رئيس قطاع بالمعاش - السلطان حسين