فوائد انقطاع الكهرباء

اقطع ميه وافصل نور                 تزهق ناس تطق تغور
تخف الزحمة من حوالينا              نلقى الدنيا سعادة وسرور
شوارعنا تفضى وتهدى كمان        ونمنع ماس وشرار وشرور
إزاى إنسان يعيش متهنى؟!           تكييف تلاجة خلاط بيدور
إيه يعنى فرن العيش يتعطل          دى حسابات مش فى المنظور
أو حتى مريض محتاج لمراوح      بندرب فيه على حر قبور
نجفف لحمة بلاش تجميد              وعلاجنا يتلف يبقى عطور
تلميذ بيذاكر مش موضوعنا           يعنى يا سيدى هيكون دكتور؟!
تخفيف أحمال والنية سليمة            بنوفر قرش لكل فاتور
وكمان تتذكر معنى الغارة              تسمع صفارة تروح مستور
والضلمة تجدد مجد قديم                كلوب وشمعة فانوس بنور
ومن فوايدها النسل يزيد                والنظر بيقوى كإنه نسور
دفاية لبردك مش مطلوبة               اقفل شباك والبس كستور
عايز تنور هاتلك دينامو                بكهربة ناشفة جديد مسحور
دا النور بيزود حبس حرارى          خايفين على بيئة أوزون وبحور
موبايل ونت يدور بحجارة             وهسخّن مكوى بغاز وبابور
وهشغل بيتى بطاقة شمسية             دا حلم حقيقى ف كل عصور
بيقولوا تخفيف أحمال فى الحر        والحر بييجى فى كل شهور
راضى على أحمد حسين