عشانك يا أنبوكس .. حنركب البوكس

بيقولك الحكومة ..ناوية تفرض رقابة. على الفيس بوك .والتويتر .ورسايل الفيس .وكل خدمات النت. من ساعة ربنا ما خلقها. وكمان مفيش مانع.. يدوروا .على حاجات تانية يراقبوها
وكله بالقلنون
ولصالح الدولة .
ولحماية الامن القومى ..
من الخونة. والقابضين .واصحاب الاجندات الخارجية من : بتوع الدولار. واليورو. والدراهم والذى منه
ورغم ان بعض اللى مزاجهم. فى الهلفطة الفارغة قالك: ان ده منافى للدستور. وطلع الدستور وحلف برحمة امه. والناس اللى ميتة جنب امه. ان المادة نمرة 57 منه.. بتحرم الاعتداء على الحريات الشخصية. وحرمة البنى امين
الا انك ..لا تملك فى الحقيقة .والواقع ..الا ان تشكر الحكومة. واللى بيجى .من ورا الحكومة وعلى راى المثل : اللى مالوش كبير. الحكومة تلمه
والحكاية.. يا لى مش فاهمين .ان الحكومة لو نفذت وعدها. وراقبت اللى بتقولك عليه
حتضرب.. مية عصفور. بقرار واحد
مش مصدقنى خد عندك مجرد امثلة
فى بيتك.. حترجع الاستقرار. والهدوء .والترابط الاسرى .ومش حتضطر مراتك .وربنا يجعل كلامنا خفيف عليهن جميعا. انها ولا مؤاخذة ..تفتش ورا فيس بوكك. او انبوكسك .او تويترك وتعرف.. بتتكلم مع مين .وكام عدد اصقائك بالفيس .اومتابعينك فى التويتر. او ولا مؤاخذة اللى بالى بالك. اللى بيكلموك. فى انصاص الليالى.. فى انبوكسك. اوحتى تعرف مين بيعملك ليك .ولا كومنت. ولا وبالعياذ بالله حظر. ولا نكزة من اياهم
وكمان الحكومة بكده ..حتوفر الكهربا. من غير قطع تيار. ولا زيادة اسعار. ولا حوجة من غاز من اللى يسوى. او ما يسواش
وبيقولك كمان ..مش حنبقى فى حوجة: للمض الموفرة اياها. ولا نكتفى بتكييف واحد ..من 3 او 4 .عندنا فى البيت. اذا كان عندنا بيت من اصله
عاوز تقتنع اكتر
اقولك.. ان الحكومة .عاوزاك تنام بدرى. زى الكتاكيت. وتصحى من 5 الصبح
ويافتاح يا عليم. ويا رزاق يا كريم
اصطبحنا. واصطبح الملك لله
وتروح على طول. شغلك .وتخلص مصالحك. بدرى بدرى
ده طبعا.. اذا كان عندك مصالح بتخلصها ولا شغل من اصله .
الحكومة يا سادة.. ترى ما لاترون .وعاوزة مصلحتكم.. اخر حاجة
كفاية بقى ..قعدة ادام الفيس .والتويتر. واللى بالى بالك
انت مراقب
خليك فاكر .
عشانك. وعشان ولادك والاجيال اللى جاية.. كمان وعشان كمان. ما تديش فرصة. لمراتك تخلعك. وتاخد اللى وراك. واللى ادامك وتهمتك جاهزة .. يا امور
اقتنعت وخفت . من اللى قلته لك . وعرفت فين مصلحتك .
طيب.. قوم بقى : نادى على البورسعيدى.. واخوك الصعيدى
ونبههم .
اننا #متراقبين ؟