ظرفاء تويتر يسخرون من الجو البارد .. مبارك من محبسه : أنا أو الساقعة .. العيسوى : معندناش ساقعة

لم تسلم موجة البرد القارس التي تضرب أنحاء البلاد من تعليقات المصريين الذين جمد البرد أطرافهم فهاجموه على طريقتهم واتخذوه مطية لتوصيل رسائل سياسية يحترف المصريون فك شفراتها.
عيش .. حرية .. دفايّة كهربائية .. هتاف مصري
المجلس العسكري: هنقعد حوالي عشر سنين عشان نحاول نسلم مصر تسليم آمن للجو المعتدل.
العباسيه: كفايه بقى تلجتوا البلد.
مبارك وهو حاطط صباعه فى مناخيره: أنا أنفي كل التهم الموجهة ليا بخصوص الجو الساقع.
معتز الدمرداش: يعنى يا استاذ فريد انت عايز تقنعني انه مبارك كان حايش الجو التلج ده عن مصر؟؟؟
فريد الديب: اومااااااااااااااال.
الاخوان: مفيش داعى للجو الساقعه ده وممكن نخليه جو معتدل عشان الانتخابات تعدى.
السلفيون:الجو الساقع حراااام شرعا.
الليبراليون : من حق المصريين إنهم يحسوا بجو ساقع زي أوروبا وده اللى بنحاول نعمله.
العلمانيون: يجب فصل الجو عن الساقعه
البرادعى :النظام غير القادر على حماية مواطنيه من البرد دا..نظام فاقد للشرعيه..الصيف قادم قادم لا محاله..الثوره ستنتصر.
عصام شرف : هو فى إيه ؟؟
الملا : الصيف هييجي فى معاده.
شاهين : الملا لا يمثل الصيف.
طنطاوي: أنا حزين على الناس اللى سقعانة.
العيسوي : إحنا معندناش ساقعه اصلا.
مبارك من محبسه : أنا أو الساقعه.
توفيق عكاشه: أول يوم صيف هيكون يوم 13/13/2013 انا بقول أهو...
البلطجية : إحنا كده مش عارفين نشتغل ومضطرين للمولوتوف عشان نتدفى.
ريم ماجد : هم فين الجماعه بتوع (مصر بتتحرئ) علشان ييجوا يشوفوا مصر بتتجمد.
ثائر: لو الجو فضل كده ليوم 25 يناير ساعتها مش هننزل التحرير ,, التحرير هو اللى هيجيلنا فى تاكسي.
أحلى حاجة فى الجو ده .. إن نص المتظاهرين هيكونوا مزكومين .. وسلملى ع الغاز.
الطقس طقس أوروبا ، والعيشة عيشة صومال.
مهما تسقع مهما تمطر .. يسقط يسقط حكم العسكر.