حكاية عم "رمضان" وطنط "كريمة" 2

صوت مذيع النشرة يقول : يشهد ميدان التحرير حالة من الكر والفر بين مؤيدين ومعارضين منذ فجر اليوم وحتى الآن"
صيام يستعد للخروج
رمضان: تعالي هنا .. رايح فين ؟ .. انت مش شايف البلد والعة ..انا مش هستني لما يكلموني عشان اجي استلمك من مستشفي ولا من مشرحة زينهم
صيام : لا ياحج .. انا مش رايح ناحية الاشتباكات خالص .. دول عالم فاضية !!
رمضان : أمال على فين إن شاء الله ؟
صيام " بتردد ": رايح درس تاريخ .. وهتأخر بتاع 4 5 ساعات ...متعملوش حسابي في الفطار
رمضان : درس إية ياض أنت هتشتغلني .. مانت واخد الأجازة الكبيرة من شهر ونص
صيام : لا ياحج مانا هبدأ السنة دي الدروس بدري .. أنت ناسي إني طالع 3 ثانوي ودي شهادة .. ولا عاوزني أسقط يعني عشان أعجبكوا ؟
صيام بعد صمت لحظات : أها صحيح أنا عاوز 25 جنيه عشان الدرس
رمضان : ماشي .. عشان لو مجبتش مجموع عدل هطلع الفلوس دي علي جتتك .. كريمة ادي إبنك 25 جنيه من باقي فلوس ياميش رمضان اللي معاكي
آذان المغرب..
(عم رمضان وكريمة وحسنات أثناء الإفطار أول يوم رمضان )
رمضان:تسلم إيديكي يا كريمة .. كل سنة وأنتوا طيبين
كريمة: إخص عليك يا صيام.. مش كنت فطرت في وسطنا
حسنات :ياماما دا طالع ثانوية عامة .. سيبيه يركز في دروسه عشان يجيب مجموع .. ادعيله
رمضان : فالح أوي يعني .. أهو بكرة يخلص ويقعدلنا زيك كدة
حسنات بعد أن تشعر بالضيق والإحراج : الحمد لله شبعت .. أنا قايمة
كريمة : ليه كدة يا راجل .. كسرت بخاطر البت واحنا في شهر كريم
رمضان بغضب: يوووووه . خلاص كلمة وقولتها يعني مش حكاية
( رمضان يترك ما كان يأكل وينظر مندهشا للتلفزيون المفتوح على إحدي القنوات التي تبث ما يحدث في الميدان مباشرة )
رمضان :إية دا .. مش ابنك اللي بيهتف في المظاهرة دا ياكريمة ولا انا مش واخد بالي
كريمة: اها والله هو يا أخويا .. الله أكبر عليه
رمضان بغضب شديد: إنتي فرحانة .. هاتي التليفون أكلمه بسرعة قبل ما ياخد طلقة ولا خرطوش إحنا مش حمل السكة دي
رمضان لصيام في التليفون :إنت فين ؟
صيام بتردد : أناأنا .. أنا لسة مخلص الدرس أهو وجاي ع البيت
رمضان يصرخ في صيام : وكمان بتكدب انا لسة شايفك حالا على التلفزيون بتهتف في التحرير.. ليلتك سودا .. وحيااااة أمك لو مشوفتكش قدامي في ظرف نص ساعة مانت نازل من البيت تاني
صيام: مظاهرات اية بس يا حج وتلفزيون أية .. دا فوتشوب ودي قنوات مضللة .. افتح انت التلفزيون المصري بس وأنا نص ساعة وهبقي قدامك.


(تتبع في الحلقة المقبلة)